34 shlokas
- 1
अथात इन्द्रियोपक्रमणीयम् अध्यायं व्याख्यास्यामः
athāta indriyopakramaṇīyam adhyāyaṃ vyākhyāsyāmaḥ
- 2
इति ह स्माह भगवानात्रेयः
iti ha smāha bhagavānātreyaḥ
- 3
इह खलु पञ्चेन्द्रियाणि पञ्चेन्द्रियद्रव्याणि पञ्चेन्द्रियाधिष्ठानानि पञ्चेन्द्रियार्थाः पञ्चेन्द्रियबुद्धयो भवन्ति इत्युक्तमिन्द्रियाधिकारे
iha khalu pañcendriyāṇi pañcendriyadravyāṇi pañcendriyādhiṣṭhānāni pañcendriyārthāḥ pañcendriyabuddhayo bhavanti ityuktamindriyādhikāre
- 4
अतीन्द्रियं पुनर्मनः सत्त्वसंज्ञकं चेतः इत्याहुरेके तदर्थात्मसंपदायत्तचेष्टं चेष्टाप्रत्ययभूतमिन्द्रियाणाम्
atīndriyaṃ punarmanaḥ sattvasaṃjñakaṃ cetaḥ ityāhureke tadarthātmasaṃpadāyattaceṣṭaṃ ceṣṭāpratyayabhūtamindriyāṇām
- 5
स्वार्थेन्द्रियार्थसङ्कल्पव्यभिचरणाच्चानेकमेकस्मिन्पुरुषे सत्त्वं रजस्तमःसत्त्वगुणयोगाच्च न चानेकत्वं नह्येकं ह्येककालमनेकेषु प्रवर्तते तस्मान्नैककाला सर्वेन्द्रियप्रवृत्तिः
svārthendriyārthasaṅkalpavyabhicaraṇāccānekamekasminpuruṣe sattvaṃ rajastamaḥsattvaguṇayogācca na cānekatvaṃ nahyekaṃ hyekakālamanekeṣu pravartate tasmānnaikakālā sarvendriyapravṛttiḥ
- 6
यद्गुणं चाभीक्ष्णं पुरुषमनुवर्तते सत्त्वं तत्सत्त्वमेवोपदिशन्ति मुनयो बाहुल्यानुशयात्
yadguṇaṃ cābhīkṣṇaṃ puruṣamanuvartate sattvaṃ tatsattvamevopadiśanti munayo bāhulyānuśayāt
- 7
मनःपुरःसराणीन्द्रियाण्य् अर्थग्रहणसमर्थानि भवन्ति
manaḥpuraḥsarāṇīndriyāṇy arthagrahaṇasamarthāni bhavanti
- 8
तत्र चक्षुः श्रोत्रं घ्राणं रसनं स्पर्शनमिति पञ्चेन्द्रियाणि
tatra cakṣuḥ śrotraṃ ghrāṇaṃ rasanaṃ sparśanamiti pañcendriyāṇi
- 9
पञ्चेन्द्रियद्रव्याणि खं वायुर्ज्योतिरापो भूरिति
pañcendriyadravyāṇi khaṃ vāyurjyotirāpo bhūriti
- 10
पञ्चेन्द्रियाधिष्ठानानि अक्षिणी कर्णौ नासिके जिह्वा त्वक्चेति
pañcendriyādhiṣṭhānāni akṣiṇī karṇau nāsike jihvā tvakceti
- 11
पञ्चेन्द्रियार्थाः शब्दस्पर्शरूपरसगन्धाः
pañcendriyārthāḥ śabdasparśarūparasagandhāḥ
- 12
पञ्चेन्द्रियबुद्धयः चक्षुर्बुद्ध्यादिकाः ताः पुनर् इन्द्रियेन्द्रियार्थसत्त्वात्मसन्निकर्षजाः क्षणिका निश्चयात्मिकाश्च इत्येतत्पञ्चपञ्चकम्
pañcendriyabuddhayaḥ cakṣurbuddhyādikāḥ tāḥ punar indriyendriyārthasattvātmasannikarṣajāḥ kṣaṇikā niścayātmikāśca ityetatpañcapañcakam
- 13
मनो मनोऽर्थो बुद्धिरात्मा चेत्यध्यात्मद्रव्यगुणसंग्रहः शुभाशुभप्रवृत्तिनिवृत्तिहेतुश्च द्रव्याश्रितं च कर्म यदुच्यते क्रियेति
mano mano'rtho buddhirātmā cetyadhyātmadravyaguṇasaṃgrahaḥ śubhāśubhapravṛttinivṛttihetuśca dravyāśritaṃ ca karma yaducyate kriyeti
- 14
तत्रानुमानगम्यानां पञ्चमहाभूतविकारसमुदायात्मकानामपि सतामिन्द्रियाणां तेजश्चक्षुषि खं श्रोत्रे घ्राणे क्षितिः आपो रसने स्पर्शने ऽनिलो विशेषेणोपपद्यते
तत्र यद्यदात्मकमिन्द्रियं विशेषात्तत्तदात्मकमेवार्थमनुगृह्णाति तत्स्वभावाद्विभुत्वाच्च
tatrānumānagamyānāṃ pañcamahābhūtavikārasamudāyātmakānāmapi satāmindriyāṇāṃ tejaścakṣuṣi khaṃ śrotre ghrāṇe kṣitiḥ āpo rasane sparśane 'nilo viśeṣeṇopapadyate
tatra yadyadātmakamindriyaṃ viśeṣāttattadātmakamevārthamanugṛhṇāti tatsvabhāvādvibhutvācca
- 15
तदर्थातियोगायोगमिथ्यायोगात्समनस्कमिन्द्रियं विकृतिमापद्यमानं यथास्वं बुद्ध्युपघाताय संपद्यते सामर्थ्ययोगात्पुनः प्रकृतिमापद्यमानं यथास्वं बुद्धिमाप्याययति
tadarthātiyogāyogamithyāyogātsamanaskamindriyaṃ vikṛtimāpadyamānaṃ yathāsvaṃ buddhyupaghātāya saṃpadyate sāmarthyayogātpunaḥ prakṛtimāpadyamānaṃ yathāsvaṃ buddhimāpyāyayati
- 16
मनसस्तु चिन्त्यमर्थम्
तत्र मनसो मनोबुद्धेश्च त एव समानातिहीनमिथ्यायोगाः प्रकृतिविकृतिहेतवो भवन्ति
manasastu cintyamartham
tatra manaso manobuddheśca ta eva samānātihīnamithyāyogāḥ prakṛtivikṛtihetavo bhavanti
- 17
तत्रेन्द्रियाणां समनस्कानाम् अनुपतप्तानाम् अनुपतापाय प्रकृतिभावे प्रयतितव्यमेभिर्हेतुभिः तद्यथा सात्म्येन्द्रियार्थसंयोगेन बुद्ध्या सम्यगवेक्ष्यावेक्ष्य कर्मणां सम्यक्प्रतिपादनेन देशकालात्मगुणविपरीतोपासनेन चेति
तस्मादात्महितं चिकीर्षता सर्वेण सर्वं सर्वदा स्मृतिमास्थाय सद्वृत्तमनुष्ठेयम्
tatrendriyāṇāṃ samanaskānām anupataptānām anupatāpāya prakṛtibhāve prayatitavyamebhirhetubhiḥ tadyathā sātmyendriyārthasaṃyogena buddhyā samyagavekṣyāvekṣya karmaṇāṃ samyakpratipādanena deśakālātmaguṇaviparītopāsanena ceti
tasmādātmahitaṃ cikīrṣatā sarveṇa sarvaṃ sarvadā smṛtimāsthāya sadvṛttamanuṣṭheyam
- 18
तद्ध्यनुतिष्ठन्युगपत्सम्पादयत्यर्थद्वयम् आरोग्यम् इन्द्रियविजयं चेति तत्सद्वृत्तम् अखिलेनोपदेक्ष्यामो ऽग्निवेश तद्यथा देवगोब्राह्मणगुरुवृद्धसिद्धाचार्यानर्चयेत् अग्निमुपचरेत् ओषधीः प्रशस्ता धारयेत्द्वौ कालावुपस्पृशेत्मलायनेष्वभीक्ष्णं पादयोश्च वैमल्यमादध्यात्त्रिः पक्षस्य केशश्मश्रुलोमनखान्संहारयेत्नित्यम् अनुपहतवासाः सुमनाः सुगन्धिः स्यात्साधुवेशः प्रसिद्धकेशः मूर्धश्रोत्रघ्राणपादतैलनित्यः धूमपः पूर्वाभिभाषी सुमुखः दुर्गेष्वभ्युपपत्ता होता यष्टा दाता चतुष्पथानां नमस्कर्ता बलीनामुपहर्ता अतिथीनां पूजकः पितृभ्यः पिण्डदः काले हितमितमधुरार्थवादी वश्यात्मा धर्मात्मा हेतावीर्ष्युः फले नेर्ष्युः निश्चिन्तः निर्भीकः ह्रीमान्धीमान्महोत्साहः दक्षः क्षमावान्धार्मिकः आस्तिकः विनयबुद्धिविद्याभिजनवयोवृद्धसिद्धाचार्याणाम् उपासिता छत्त्री दण्डी मौली सोपानत्को युगमात्रदृग्विचरेत्मङ्गलाचारशीलः कुचेलास्थिकण्टकामेध्यकेशतुषोत्करभस्मकपालस्नानबलिभूमीनां परिहर्ता प्राक्श्रमाद्व्यायामवर्जी स्यात्सर्वप्राणिषु बन्धुभूतः स्यात्क्रुद्धानाम् अनुनेता भीतानाम् आश्वासयिता दीनानाम् अभ्युपपत्ता सत्यसंधः सामप्रधानः परपरुषवचनसहिष्णुः अमर्षघ्नः प्रशमगुणदर्शी रागद्वेषहेतूनां हन्ता च
taddhyanutiṣṭhanyugapatsampādayatyarthadvayam ārogyam indriyavijayaṃ ceti tatsadvṛttam akhilenopadekṣyāmo 'gniveśa tadyathā devagobrāhmaṇaguruvṛddhasiddhācāryānarcayet agnimupacaret oṣadhīḥ praśastā dhārayetdvau kālāvupaspṛśetmalāyaneṣvabhīkṣṇaṃ pādayośca vaimalyamādadhyāttriḥ pakṣasya keśaśmaśrulomanakhānsaṃhārayetnityam anupahatavāsāḥ sumanāḥ sugandhiḥ syātsādhuveśaḥ prasiddhakeśaḥ mūrdhaśrotraghrāṇapādatailanityaḥ dhūmapaḥ pūrvābhibhāṣī sumukhaḥ durgeṣvabhyupapattā hotā yaṣṭā dātā catuṣpathānāṃ namaskartā balīnāmupahartā atithīnāṃ pūjakaḥ pitṛbhyaḥ piṇḍadaḥ kāle hitamitamadhurārthavādī vaśyātmā dharmātmā hetāvīrṣyuḥ phale nerṣyuḥ niścintaḥ nirbhīkaḥ hrīmāndhīmānmahotsāhaḥ dakṣaḥ kṣamāvāndhārmikaḥ āstikaḥ vinayabuddhividyābhijanavayovṛddhasiddhācāryāṇām upāsitā chattrī daṇḍī maulī sopānatko yugamātradṛgvicaretmaṅgalācāraśīlaḥ kucelāsthikaṇṭakāmedhyakeśatuṣotkarabhasmakapālasnānabalibhūmīnāṃ parihartā prākśramādvyāyāmavarjī syātsarvaprāṇiṣu bandhubhūtaḥ syātkruddhānām anunetā bhītānām āśvāsayitā dīnānām abhyupapattā satyasaṃdhaḥ sāmapradhānaḥ paraparuṣavacanasahiṣṇuḥ amarṣaghnaḥ praśamaguṇadarśī rāgadveṣahetūnāṃ hantā ca
- 19
नानृतं ब्रूयात्नान्यस्वमाददीत नान्यस्त्रियमभिलषेन्नान्यश्रियं न वैरं रोचयेत्न कुर्यात्पापं न पापे ऽपि पापी स्यात्नान्यदोषान्ब्रूयात्नान्यरहस्यम् आगमयेन्नाधार्मिकैर्न नरेन्द्रद्विष्टैः सहासीत नोन्मत्तैर्न पतितैर्न भ्रूणहन्तृभिर्न क्षुद्रैर्न दुष्टैः न दुष्टयानान्यारोहेत न जानुसमं कठिनमासनमध्यासीत नानास्तीर्णम् अनुपहितम् अविशालम् असमं वा शयनं प्रपद्येत न गिरिविषममस्तकेष्वनुचरेत्न द्रुममारोहेत्न जलोग्रवेगमवगाहेत न कुलच्छायाम् उपासीत नाग्न्युत्पातमभितश्चरेत्नोच्चैर्हसेत्न शब्दवन्तं मारुतं मुञ्चेत्नानावृतमुखो जृम्भां क्षवथुं हास्यं वा प्रवर्तयेत्न नासिकां कुष्णीयात्न दन्तान्विघट्टयेत्न नखान्वादयेत्नास्थीन्यभिहन्यात्न भूमिं विलिखेत्न छिन्द्यात्तृणं न लोष्टं मृद्नीयात्न विगुणमङ्गैश्चेष्टेत ज्योतींष्य् अनिष्टम् अमेध्यम् अशस्तं च नाभिवीक्षेत न हुंकुर्याच्छवं न चैत्यध्वजगुरुपूज्याशस्तच्छायाम् आक्रामेत्न क्षपास्व् अमरसदनचैत्यचत्वरचतुष्पथोपवनश्मशानाघातनान्यासेवेत नैकः शून्यगृहं न चाटवीमनुप्रविशेत्न पापवृत्तान्स्त्रीमित्रभृत्यान्भजेत नोत्तमैर्विरुध्येत नावरानुपासीत न जिह्मं रोचयेत्नानार्यमाश्रयेत्न भयमुत्पादयेत्न साहसातिस्वप्नप्रजागरस्नानपानाशनान्यासेवेत नोर्ध्वजानुश्चिरं तिष्ठेत्न व्यालानुपसर्पेन्न दंष्ट्रिणो न विषाणिनः पुरोवातातपावश्यायातिप्रवाताञ्जह्यात्कलिं नारभेत नासुनिभृतो ऽग्निमुपासीत नोच्छिष्टः नाधः कृत्वा प्रतापयेत्नाविगतक्लमो नानाप्लुतवदनो न नग्न उपस्पृशेत्न स्नानशाट्या स्पृशेदुत्तमाङ्गं न केशाग्राण्यभिहन्यात्नोपस्पृश्य ते एव वाससी बिभृयात्नास्पृष्ट्वा रत्नाज्यपूज्यमङ्गलसुमनसो ऽभिनिष्क्रामेत्न पूज्यमङ्गलान्यपसव्यं गच्छेन्नेतराण्यनुदक्षिणम्
nānṛtaṃ brūyātnānyasvamādadīta nānyastriyamabhilaṣennānyaśriyaṃ na vairaṃ rocayetna kuryātpāpaṃ na pāpe 'pi pāpī syātnānyadoṣānbrūyātnānyarahasyam āgamayennādhārmikairna narendradviṣṭaiḥ sahāsīta nonmattairna patitairna bhrūṇahantṛbhirna kṣudrairna duṣṭaiḥ na duṣṭayānānyāroheta na jānusamaṃ kaṭhinamāsanamadhyāsīta nānāstīrṇam anupahitam aviśālam asamaṃ vā śayanaṃ prapadyeta na giriviṣamamastakeṣvanucaretna drumamārohetna jalogravegamavagāheta na kulacchāyām upāsīta nāgnyutpātamabhitaścaretnoccairhasetna śabdavantaṃ mārutaṃ muñcetnānāvṛtamukho jṛmbhāṃ kṣavathuṃ hāsyaṃ vā pravartayetna nāsikāṃ kuṣṇīyātna dantānvighaṭṭayetna nakhānvādayetnāsthīnyabhihanyātna bhūmiṃ vilikhetna chindyāttṛṇaṃ na loṣṭaṃ mṛdnīyātna viguṇamaṅgaiśceṣṭeta jyotīṃṣy aniṣṭam amedhyam aśastaṃ ca nābhivīkṣeta na huṃkuryācchavaṃ na caityadhvajagurupūjyāśastacchāyām ākrāmetna kṣapāsv amarasadanacaityacatvaracatuṣpathopavanaśmaśānāghātanānyāseveta naikaḥ śūnyagṛhaṃ na cāṭavīmanupraviśetna pāpavṛttānstrīmitrabhṛtyānbhajeta nottamairvirudhyeta nāvarānupāsīta na jihmaṃ rocayetnānāryamāśrayetna bhayamutpādayetna sāhasātisvapnaprajāgarasnānapānāśanānyāseveta nordhvajānuściraṃ tiṣṭhetna vyālānupasarpenna daṃṣṭriṇo na viṣāṇinaḥ purovātātapāvaśyāyātipravātāñjahyātkaliṃ nārabheta nāsunibhṛto 'gnimupāsīta nocchiṣṭaḥ nādhaḥ kṛtvā pratāpayetnāvigataklamo nānāplutavadano na nagna upaspṛśetna snānaśāṭyā spṛśeduttamāṅgaṃ na keśāgrāṇyabhihanyātnopaspṛśya te eva vāsasī bibhṛyātnāspṛṣṭvā ratnājyapūjyamaṅgalasumanaso 'bhiniṣkrāmetna pūjyamaṅgalānyapasavyaṃ gacchennetarāṇyanudakṣiṇam
- 20
नारत्नपाणिर्नास्नातो नोपहतवासा नाजपित्वा नाहुत्वा देवताभ्यो नानिरूप्य पितृभ्यो नादत्त्वा गुरुभ्यो नातिथिभ्यो नोपाश्रितेभ्यो नापुण्यगन्धो नामाली नाप्रक्षालितपाणिपादवदनो नाशुद्धमुखो नोदङ्मुखो न विमना नाभक्ताशिष्टाशुचिक्षुधितपरिचरो न पात्रीष्वमेध्यासु नादेशे नाकाले नाकीर्णे नादत्त्वाग्रमग्नये नाप्रोक्षितं प्रोक्षणोदकैर्न मन्त्रैर् अनभिमन्त्रितं न कुत्सयन्न कुत्सितं न प्रतिकूलोपहितमन्नमाददीत न पर्युषितमन्यत्र मांसहरितकशुष्कशाकफलभक्ष्येभ्यः नाशेषभुक्स्यादन्यत्र दधिमधुलवणसक्तुसर्पिर्भ्यः न नक्तं दधि भुञ्जीत न सक्तून् एकान् अश्नीयान्न निशि न भुक्त्वा न बहून्न द्विर्नोदकान्तरितान्न छित्त्वा द्विजैर्भक्षयेत्
nāratnapāṇirnāsnāto nopahatavāsā nājapitvā nāhutvā devatābhyo nānirūpya pitṛbhyo nādattvā gurubhyo nātithibhyo nopāśritebhyo nāpuṇyagandho nāmālī nāprakṣālitapāṇipādavadano nāśuddhamukho nodaṅmukho na vimanā nābhaktāśiṣṭāśucikṣudhitaparicaro na pātrīṣvamedhyāsu nādeśe nākāle nākīrṇe nādattvāgramagnaye nāprokṣitaṃ prokṣaṇodakairna mantrair anabhimantritaṃ na kutsayanna kutsitaṃ na pratikūlopahitamannamādadīta na paryuṣitamanyatra māṃsaharitakaśuṣkaśākaphalabhakṣyebhyaḥ nāśeṣabhuksyādanyatra dadhimadhulavaṇasaktusarpirbhyaḥ na naktaṃ dadhi bhuñjīta na saktūn ekān aśnīyānna niśi na bhuktvā na bahūnna dvirnodakāntaritānna chittvā dvijairbhakṣayet
- 21
नानृजुः क्षुयान्नाद्यान्न शयीत न वेगितो ऽन्यकार्यः स्यात्न वाय्वग्निसलिलसोमार्कद्विजगुरुप्रतिमुखं निष्ठीविकावर्चोमूत्राण्युत्सृजेत्न पन्थानमवमूत्रयेन्न जनवति नान्नकाले न जपहोमाध्ययनबलिमङ्गलाक्रियासु श्लेष्मसिङ्घाणकं मुञ्चेत्
nānṛjuḥ kṣuyānnādyānna śayīta na vegito 'nyakāryaḥ syātna vāyvagnisalilasomārkadvijagurupratimukhaṃ niṣṭhīvikāvarcomūtrāṇyutsṛjetna panthānamavamūtrayenna janavati nānnakāle na japahomādhyayanabalimaṅgalākriyāsu śleṣmasiṅghāṇakaṃ muñcet
- 22
न स्त्रियमवजानीत नातिविश्रम्भयेत्न गुह्यमनुश्रावयेत्नाधिकुर्यात्
न रजस्वलां नातुरां नामेध्यां नाशस्तां नानिष्टरूपाचारोपचारां नादक्षां नादक्षिणां नाकामां नान्यकामां नान्यस्त्रियं नान्ययोनिं नायोनौ न चैत्यचत्वरचतुष्पथोपवनश्मशानाघातनसलिलौषधिद्विजगुरुसुरालयेषु न सन्ध्ययोर्नातिथिषु नाशुचिर्नाजग्धभेषजो नाप्रणीतसङ्कल्पो नानुपस्थितप्रहर्षो नाभुक्तवान्नात्यशितो न विषमस्थो न मूत्रोच्चारपीडितो न श्रमव्यायामोपवासक्लमाभिहतो नारहसि व्यवायं गच्छेत्
na striyamavajānīta nātiviśrambhayetna guhyamanuśrāvayetnādhikuryāt
na rajasvalāṃ nāturāṃ nāmedhyāṃ nāśastāṃ nāniṣṭarūpācāropacārāṃ nādakṣāṃ nādakṣiṇāṃ nākāmāṃ nānyakāmāṃ nānyastriyaṃ nānyayoniṃ nāyonau na caityacatvaracatuṣpathopavanaśmaśānāghātanasalilauṣadhidvijagurusurālayeṣu na sandhyayornātithiṣu nāśucirnājagdhabheṣajo nāpraṇītasaṅkalpo nānupasthitapraharṣo nābhuktavānnātyaśito na viṣamastho na mūtroccārapīḍito na śramavyāyāmopavāsaklamābhihato nārahasi vyavāyaṃ gacchet
- 23
न सतो न गुरून्परिवदेत्नाशुचिरभिचारकर्मचैत्यपूज्यपूजाध्ययनम् अभिनिर्वर्तयेत्
na sato na gurūnparivadetnāśucirabhicārakarmacaityapūjyapūjādhyayanam abhinirvartayet
- 24
न विद्युत्स्वनार्तवीषु नाभ्युदितासु दिक्षु नाग्निसंप्लवे न भूमिकम्पे न महोत्सवे नोल्कापाते न महाग्रहोपगमने न नष्टचन्द्रायां तिथौ न सन्ध्ययोर्नामुखाद्गुरोर्नावपतितं नातिमात्रं न तान्तं न विस्वरं नानवस्थितपदं नातिद्रुतं न विलम्बितं नातिक्लीबं नात्युच्चैर्नातिनीचैः स्वरैरध्ययनमभ्यस्येत्
na vidyutsvanārtavīṣu nābhyuditāsu dikṣu nāgnisaṃplave na bhūmikampe na mahotsave nolkāpāte na mahāgrahopagamane na naṣṭacandrāyāṃ tithau na sandhyayornāmukhādgurornāvapatitaṃ nātimātraṃ na tāntaṃ na visvaraṃ nānavasthitapadaṃ nātidrutaṃ na vilambitaṃ nātiklībaṃ nātyuccairnātinīcaiḥ svarairadhyayanamabhyasyet
- 25
नातिसमयं जह्यात्न नियमं भिन्द्यात्न नक्तं नादेशे चरेत्न सन्ध्यास्वभ्यवहाराध्ययनस्त्रीस्वप्नसेवी स्यात्न बालवृद्धलुब्धमूर्खक्लिष्टक्लीबैः सह सख्यं कुर्यात्न मद्यद्यूतवेश्याप्रसङ्गरुचिः स्यात्न गुह्यं विवृणुयात्न कंचिद् अवजानीयात्नाहंमानी स्यान्नादक्षो नादक्षिणो नासूयकः न ब्राह्मणान्परिवदेत्न गवां दण्डमुद्यच्छेत्न वृद्धान्न गुरून्न गणान्न नृपान्वाधिक्षिपेत्न चातिब्रूयात्न बान्धवानुरक्तकृच्छ्रद्वितीयगुह्यज्ञान्बहिष्कुर्यात्
nātisamayaṃ jahyātna niyamaṃ bhindyātna naktaṃ nādeśe caretna sandhyāsvabhyavahārādhyayanastrīsvapnasevī syātna bālavṛddhalubdhamūrkhakliṣṭaklībaiḥ saha sakhyaṃ kuryātna madyadyūtaveśyāprasaṅgaruciḥ syātna guhyaṃ vivṛṇuyātna kaṃcid avajānīyātnāhaṃmānī syānnādakṣo nādakṣiṇo nāsūyakaḥ na brāhmaṇānparivadetna gavāṃ daṇḍamudyacchetna vṛddhānna gurūnna gaṇānna nṛpānvādhikṣipetna cātibrūyātna bāndhavānuraktakṛcchradvitīyaguhyajñānbahiṣkuryāt
- 26
नाधीरो नात्युच्छ्रितसत्त्वः स्यात्नाभृतभृत्यः नाविश्रब्धस्वजनः नैकः सुखी न दुःखशीलाचारोपचारः न सर्वविश्रम्भी न सर्वाभिशङ्की न सर्वकालविचारी
nādhīro nātyucchritasattvaḥ syātnābhṛtabhṛtyaḥ nāviśrabdhasvajanaḥ naikaḥ sukhī na duḥkhaśīlācāropacāraḥ na sarvaviśrambhī na sarvābhiśaṅkī na sarvakālavicārī
- 27
न कार्यकालमतिपातयेत्नापरीक्षितम् अभिनिविशेत्नेन्द्रियवशगः स्यात्न चञ्चलं मनो ऽनुभ्रामयेत्न बुद्धीन्द्रियाणामतिभारमादध्यात्न चातिदीर्घसूत्री स्यात्न क्रोधहर्षावनुविदध्यात्न शोकमनुवसेत्न सिद्धावुत्सेकं यच्छेन्नासिद्धौ दैन्यं प्रकृतिमभीक्ष्णं स्मरेत्हेतुप्रभावनिश्चितः स्याद्धेत्वारम्भनित्यश्च न कृतमित्याश्वसेत्न वीर्यं जह्यात्नापवादमनुस्मरेत्
na kāryakālamatipātayetnāparīkṣitam abhiniviśetnendriyavaśagaḥ syātna cañcalaṃ mano 'nubhrāmayetna buddhīndriyāṇāmatibhāramādadhyātna cātidīrghasūtrī syātna krodhaharṣāvanuvidadhyātna śokamanuvasetna siddhāvutsekaṃ yacchennāsiddhau dainyaṃ prakṛtimabhīkṣṇaṃ smarethetuprabhāvaniścitaḥ syāddhetvārambhanityaśca na kṛtamityāśvasetna vīryaṃ jahyātnāpavādamanusmaret
- 28
नाशुचिरुत्तमाज्याक्षततिलकुशसर्षपैरग्निं जुहुयाद् आत्मानम् आशीर्भिर् आशासानः अग्निर्मे नापगच्छेच्छरीराद्वायुर्मे प्राणानादधातु विष्णुर्मे बलमादधातु इन्द्रो मे वीर्यं शिवा मां प्रविशन्त्वाप आपोहिष्ठेत्यपः स्पृशेत्द्विः परिमृज्योष्ठौ पादौ चाभ्युक्ष्य मूर्धनि खानि चोपस्पृशेद् अद्भिर् आत्मानं हृदयं शिरश्च
nāśuciruttamājyākṣatatilakuśasarṣapairagniṃ juhuyād ātmānam āśīrbhir āśāsānaḥ agnirme nāpagaccheccharīrādvāyurme prāṇānādadhātu viṣṇurme balamādadhātu indro me vīryaṃ śivā māṃ praviśantvāpa āpohiṣṭhetyapaḥ spṛśetdviḥ parimṛjyoṣṭhau pādau cābhyukṣya mūrdhani khāni copaspṛśed adbhir ātmānaṃ hṛdayaṃ śiraśca
- 29
ब्रह्मचर्यज्ञानदानमैत्रीकारुण्यहर्षोपेक्षाप्रशमपरश्च स्यादिति
brahmacaryajñānadānamaitrīkāruṇyaharṣopekṣāpraśamaparaśca syāditi
- 30
तत्र श्लोकाः
पञ्चपञ्चकमुद्दिष्टं मनो हेतुचतुष्टयम्
इन्द्रियोपक्रमे ऽध्याये सद्वृत्तमखिलेन च
tatra ślokāḥ
pañcapañcakamuddiṣṭaṃ mano hetucatuṣṭayam
indriyopakrame 'dhyāye sadvṛttamakhilena ca

