11 shlokas
- 1
अग्नौ प्रताप्याभिमृशति
अग्नेस्त्वा तेजसा सूर्यस्य वर्चसेन्द्रस्येन्द्रियेण विश्वेषां त्वा देवानां क्रतुनाभिमृशामि
अङ्गाद् अङ्गात्सम्भवसि हृदयाद् अधि जायसे
आत्मा वै पुत्रनामासि स जीव शरदः शतम् इति
agnau pratāpyābhimṛśati
agnestvā tejasā sūryasya varcasendrasyendriyeṇa viśveṣāṃ tvā devānāṃ kratunābhimṛśāmi
aṅgād aṅgātsambhavasi hṛdayād adhi jāyase
ātmā vai putranāmāsi sa jīva śaradaḥ śatam iti
- 2
अथैनं वात्सप्रेणाभिमृशति दिवस्परीत्यनुवाकेन
athainaṃ vātsapreṇābhimṛśati divasparītyanuvākena
- 3
यत्र शेते तद् अभिमृशति
वेद ते भूमि हृदयं दिवि चन्द्रमसि श्रितम्
वेदामृतस्य गोप्तारं माहं पौत्रमघं रुदम् इति
yatra śete tad abhimṛśati
veda te bhūmi hṛdayaṃ divi candramasi śritam
vedāmṛtasya goptāraṃ māhaṃ pautramaghaṃ rudam iti
- 4
अथैनं मातुर् उपस्थ आदधाति
मा ते पुत्रं रक्षो वधीन्मा धेनुर् अत्यासारिणी
प्रिया धनस्य भूया एधमाना स्वे वश इति
athainaṃ mātur upastha ādadhāti
mā te putraṃ rakṣo vadhīnmā dhenur atyāsāriṇī
priyā dhanasya bhūyā edhamānā sve vaśa iti
- 5
स्तनं प्रतिधापयति
अयं कुमारो जरां धयतु दीर्घमायुः
तस्मै त्वं स्तन प्रप्यायायुर्वर्चो यशो बलम् इति
stanaṃ pratidhāpayati
ayaṃ kumāro jarāṃ dhayatu dīrghamāyuḥ
tasmai tvaṃ stana prapyāyāyurvarco yaśo balam iti
- 6
संविष्टाभ्यां परिदां करोति नामयति न रुदति यत्र वयं वदामसि यत्र चाभिमृशामसीति
saṃviṣṭābhyāṃ paridāṃ karoti nāmayati na rudati yatra vayaṃ vadāmasi yatra cābhimṛśāmasīti
- 7
शिरस्त उदकुम्भं निदधात्य् आपः सुप्तेषु जाग्रत रक्षांसि निरितो नुदध्वमिति
śirasta udakumbhaṃ nidadhāty āpaḥ supteṣu jāgrata rakṣāṃsi nirito nudadhvamiti
- 8
नैतासाम् अपाम् उदकार्थं कुर्वन्ति
naitāsām apām udakārthaṃ kurvanti
- 9
अथ यदि चिरं न विजायते स्रजमेनां दर्शयेत्
atha yadi ciraṃ na vijāyate srajamenāṃ darśayet
- 10
परिमुक्तायां क्षिप्रम् एवोपनिर्हरेत्
parimuktāyāṃ kṣipram evopanirharet
- 11
यदा यदा सूतिकारोगः स्याद्दक्षिणस्य पदस्तप्तोदकेन पार्ष्णिं क्लेदयित्वा तदा तदा तं देशम् अवमार्ष्टि यत्रास्या दुःखं भवति धनुर्मटची पुरुषस्य हस्तयोर् एकशतं शृणोर् अङ्ग ते धापयितारस्त्वं रोगस्येशिषे त्वम् उ रोगस्य सूतिकारोगभैषज्यम् अस्यमुष्या इति
yadā yadā sūtikārogaḥ syāddakṣiṇasya padastaptodakena pārṣṇiṃ kledayitvā tadā tadā taṃ deśam avamārṣṭi yatrāsyā duḥkhaṃ bhavati dhanurmaṭacī puruṣasya hastayor ekaśataṃ śṛṇor aṅga te dhāpayitārastvaṃ rogasyeśiṣe tvam u rogasya sūtikārogabhaiṣajyam asyamuṣyā iti

