21 shlokas
- 1
चत्वारि विवाहकरणानि वित्तं रूपं प्रज्ञा बान्धवम् इति
catvāri vivāhakaraṇāni vittaṃ rūpaṃ prajñā bāndhavam iti
- 2
तानि चेत्सर्वाणि न शक्नुयाद्वित्तम् उदस्येत्ततो रूपम्
tāni cetsarvāṇi na śaknuyādvittam udasyettato rūpam
- 3
प्रज्ञायां च तु बान्धवे च विवदन्ते
prajñāyāṃ ca tu bāndhave ca vivadante
- 4
बान्धवम् उदस्येद् इत्येक आहुः
bāndhavam udasyed ityeka āhuḥ
- 5
अप्रज्ञेन हि कः संवासः
aprajñena hi kaḥ saṃvāsaḥ
- 6
अथैतद् अपरं न खल्वियमर्थेभ्य ऊह्यते
athaitad aparaṃ na khalviyamarthebhya ūhyate
- 7
प्रजननार्थोऽस्यां प्रधानः
prajananārtho'syāṃ pradhānaḥ
- 8
स यो ऽलं संलक्षणाय स्यात्स ताम् आवहेत यस्यां प्रशस्ता जायेरन्
sa yo 'laṃ saṃlakṣaṇāya syātsa tām āvaheta yasyāṃ praśastā jāyeran
- 9
न स्वपन्तीम् उपगृह्णीत न चरन्तीम्
na svapantīm upagṛhṇīta na carantīm
- 10
प्रथमम् अभ्यागच्छंस्तां मङ्गल्यानि परिपृच्छेत्
prathamam abhyāgacchaṃstāṃ maṅgalyāni paripṛcchet
- 11
चतुरो लोष्टान् आहरेद्वेदिलोष्टं गोमयलोष्टं सीतालोष्टं श्मशानलोष्टम् इति
caturo loṣṭān āharedvediloṣṭaṃ gomayaloṣṭaṃ sītāloṣṭaṃ śmaśānaloṣṭam iti
- 12
ताम् आहैषाम् एकम् आदत्स्वेति
tām āhaiṣām ekam ādatsveti
- 13
सा चेद्वेदिलोष्टम् आददीताध्यापकं यायजूकं जनयिष्यतीति विद्यात्
sā cedvediloṣṭam ādadītādhyāpakaṃ yāyajūkaṃ janayiṣyatīti vidyāt
- 14
यदि गोमयलोष्टं बहुपशुं जनयिष्यतीति विद्यात्
yadi gomayaloṣṭaṃ bahupaśuṃ janayiṣyatīti vidyāt
- 15
यदि सीतालोष्टं कृष्टराधिकं जनयिष्यतीति विद्यात्
yadi sītāloṣṭaṃ kṛṣṭarādhikaṃ janayiṣyatīti vidyāt
- 16
यदि श्मशानलोष्टम् आदहनशीक्ष्णी परिख्यातेति विद्यात्
yadi śmaśānaloṣṭam ādahanaśīkṣṇī parikhyāteti vidyāt
- 17
नैनाम् उपगृह्णीत
nainām upagṛhṇīta
- 18
अथ खलु बहूनि लक्षणानि भवन्ति
atha khalu bahūni lakṣaṇāni bhavanti
- 19
श्लोकं तु लाक्षणा उदाहरन्ति
यस्यां मनो ऽनुरमते चक्षुश्च प्रतिपद्यते
तां विद्यात्पुण्यलक्ष्मीकां किं ज्ञानेन करिष्यतीति
ślokaṃ tu lākṣaṇā udāharanti
yasyāṃ mano 'nuramate cakṣuśca pratipadyate
tāṃ vidyātpuṇyalakṣmīkāṃ kiṃ jñānena kariṣyatīti
- 20
उदगयन उपगृह्णीत
udagayana upagṛhṇīta
- 21
विज्ञायत उदगयनं देवानामिति दैवं पुनर् इदं कर्म
vijñāyata udagayanaṃ devānāmiti daivaṃ punar idaṃ karma

