16 shlokas
- 1
पयसा पशुकामस्य जुहुयाद्दध्नेन्द्रियकामस्य यवाग्वा ग्रामकामस्यौदनेनान्नाद्यकामस्य तण्डुलैर् ओजस्कामस्य
बलकामस्येत्य् एके
मांसेन यशस्कामस्य सोमेन ब्रह्मवर्चसकामस्याज्येन तेजस्कामस्य
payasā paśukāmasya juhuyāddadhnendriyakāmasya yavāgvā grāmakāmasyaudanenānnādyakāmasya taṇḍulair ojaskāmasya
balakāmasyety eke
māṃsena yaśaskāmasya somena brahmavarcasakāmasyājyena tejaskāmasya
- 2
प्रतिषेकं यवागूं श्रपयति
pratiṣekaṃ yavāgūṃ śrapayati
- 3
शृतां यजुषा प्रतिषिञ्चति
śṛtāṃ yajuṣā pratiṣiñcati
- 4
एवं मांसम्
evaṃ māṃsam
- 5
नाज्यं प्रतिषिञ्चति हरस्ते मा विनैषम् इति
द्वे दर्भाग्रे प्रत्यस्यत्य् एकं वा
nājyaṃ pratiṣiñcati haraste mā vinaiṣam iti
dve darbhāgre pratyasyaty ekaṃ vā
- 6
न दध्य् अधिश्रयति
शृतं हि तन्न प्रतिषिञ्चति प्रतिषिक्तं हि तद् आतञ्चनेनेति विज्ञायते
na dadhy adhiśrayati
śṛtaṃ hi tanna pratiṣiñcati pratiṣiktaṃ hi tad ātañcaneneti vijñāyate
- 7
एवं तण्डुलान् ओदनं सोमं च
evaṃ taṇḍulān odanaṃ somaṃ ca
- 8
आज्येन तण्डुलैर् ओदनेन सोमेन वा जुहुयाद्यस्याप्रतिषेक्यं स्यात्
ājyena taṇḍulair odanena somena vā juhuyādyasyāpratiṣekyaṃ syāt
- 9
आज्येन तेजस्कामः संवत्सरं जुहुयाद्द्वादशाहं वा
ājyena tejaskāmaḥ saṃvatsaraṃ juhuyāddvādaśāhaṃ vā
- 10
न राजन्यस्य जुहुयात्
na rājanyasya juhuyāt
- 11
होमकाले गृहेभ्यो ब्राह्मणायान्नं प्रहिणुयात्तेनो हैवास्य हुतं भवति
homakāle gṛhebhyo brāhmaṇāyānnaṃ prahiṇuyātteno haivāsya hutaṃ bhavati
- 12
नित्यम् अग्न्युपस्थानं वाचयितव्यः
nityam agnyupasthānaṃ vācayitavyaḥ
- 13
यो वा सोमयाजी सत्यवादी तस्य जुहुयात्
yo vā somayājī satyavādī tasya juhuyāt
- 14
अहर् अहर्यजमानः स्वयम् अग्निहोत्रं जुहुयात्
ahar aharyajamānaḥ svayam agnihotraṃ juhuyāt
- 15
पर्वणि वा
parvaṇi vā
- 16
ब्रह्मचारी वा जुहुयाद्ब्रह्मणा हि स परिक्रीतो भवति
क्षीरहोता वा जुहुयाद्धनेन हि स परिक्रीतो भवतीति बह्वृचब्राह्मणम्
brahmacārī vā juhuyādbrahmaṇā hi sa parikrīto bhavati
kṣīrahotā vā juhuyāddhanena hi sa parikrīto bhavatīti bahvṛcabrāhmaṇam

