8 shlokas
- 1
अग्निहोत्रं व्याख्यास्यामः
agnihotraṃ vyākhyāsyāmaḥ
- 2
अधिवृक्षसूर्य आविःसूर्ये वा धृष्टिर् असि ब्रह्म यच्छेत्य् उपवेषम् आदाय गार्हपत्यम् अभिमन्त्रयते सुगार्हपत्य इति
adhivṛkṣasūrya āviḥsūrye vā dhṛṣṭir asi brahma yacchety upaveṣam ādāya gārhapatyam abhimantrayate sugārhapatya iti
- 3
अथैनं बोधयत्य् उद्बुध्यस्वाग्ने प्रति जागृह्य् एनम् इष्टापूर्ते संसृजेथाम् अयं च
अस्मिन्सधस्थे अध्य् उत्तरस्मिन्विश्वे देवा यजमानश्च सीदतेति
athainaṃ bodhayaty udbudhyasvāgne prati jāgṛhy enam iṣṭāpūrte saṃsṛjethām ayaṃ ca
asminsadhasthe adhy uttarasminviśve devā yajamānaśca sīdateti
- 4
उद्धरेत्य् एव सायम् आह यजमानः
उद्धरेति प्रातः
uddharety eva sāyam āha yajamānaḥ
uddhareti prātaḥ
- 5
सहस्रं तेन कामदुघो ऽवरुन्द्धे
sahasraṃ tena kāmadugho 'varunddhe
- 6
वाचा त्वा होत्रा प्राणेनोद्गात्रा चक्षुषाध्वर्युणा मनसा ब्रह्मणा श्रोत्रेणाग्नीधैतैस्त्वा पञ्चभिर्दैव्यैर् ऋत्विग्भिर् उद्धरामीति गार्हपत्याद् आहवनीयं ज्वलन्तम् उद्धरति
vācā tvā hotrā prāṇenodgātrā cakṣuṣādhvaryuṇā manasā brahmaṇā śrotreṇāgnīdhaitaistvā pañcabhirdaivyair ṛtvigbhir uddharāmīti gārhapatyād āhavanīyaṃ jvalantam uddharati
- 7
भूर्भुवः सुवर् उद्ध्रियमाण उद्धर पाप्मनो मा यद् अविद्वान्यच्च विद्वांश्चकार
अह्ना यद् एनः कृतम् अस्ति पापं सर्वस्मान्मोद्धृतो मुञ्च तस्माद् इत्य् उद्ध्रियमाणम् अभिमन्त्रयते यजमानः सायम्
रात्र्या यद् एनः कृतम् अस्ति पापं सर्वस्मान्मोद्धृतो मुञ्च तस्माद् इति प्रातः
bhūrbhuvaḥ suvar uddhriyamāṇa uddhara pāpmano mā yad avidvānyacca vidvāṃścakāra
ahnā yad enaḥ kṛtam asti pāpaṃ sarvasmānmoddhṛto muñca tasmād ity uddhriyamāṇam abhimantrayate yajamānaḥ sāyam
rātryā yad enaḥ kṛtam asti pāpaṃ sarvasmānmoddhṛto muñca tasmād iti prātaḥ
- 8
अग्निपतये ऽग्नये मे विद्ध्य् अग्निपतये ऽग्नये मे मृड
अमृताहुतिम् अमृतायां जुहोम्य् अग्निं पृथिव्याम् अमृतस्य जित्यै
तयानन्तं कामम् अहं जयानि प्रजापतिर्यं प्रथमो जिगायाग्निम् अग्नौ स्वाहा
agnipataye 'gnaye me viddhy agnipataye 'gnaye me mṛḍa
amṛtāhutim amṛtāyāṃ juhomy agniṃ pṛthivyām amṛtasya jityai
tayānantaṃ kāmam ahaṃ jayāni prajāpatiryaṃ prathamo jigāyāgnim agnau svāhā

