13 shlokas
- 1
अथ यदि बन्धुनाम न विदितं स्वधा पितृभ्यः पृथिवीषद्भ्य इति प्रथमं पिण्डं दद्यात्
स्वधा पितृभ्यो ऽन्तरिक्षसद्भ्य इति द्वितीयम्
स्वधा पितृभ्यो दिविषद्भ्य इति तृतीयम्
atha yadi bandhunāma na viditaṃ svadhā pitṛbhyaḥ pṛthivīṣadbhya iti prathamaṃ piṇḍaṃ dadyāt
svadhā pitṛbhyo 'ntarikṣasadbhya iti dvitīyam
svadhā pitṛbhyo diviṣadbhya iti tṛtīyam
- 2
तूष्णीं चतुर्थं पिण्डं निधायात्र पितरो यथाभागं मन्दध्वम् इत्य् उक्त्वा पराङ् आवर्तते
tūṣṇīṃ caturthaṃ piṇḍaṃ nidhāyātra pitaro yathābhāgaṃ mandadhvam ity uktvā parāṅ āvartate
- 3
ओष्मणो व्यावृत उपास्ते
oṣmaṇo vyāvṛta upāste
- 4
व्यावृत्त ऊष्मण्य् अभिपर्यावर्तते ऽव्यावृत्ते वा अमीमदन्त पितरः सोम्या इति
vyāvṛtta ūṣmaṇy abhiparyāvartate 'vyāvṛtte vā amīmadanta pitaraḥ somyā iti
- 5
अभिपर्यावृत्य यः स्थाल्यां शेषस्तम् अवजिघ्रति वीरं धत्त पितर इति
abhiparyāvṛtya yaḥ sthālyāṃ śeṣastam avajighrati vīraṃ dhatta pitara iti
- 6
आमयाविना प्राश्यो ऽन्नाद्यकामेन प्राश्यो यो ऽलम् अन्नाद्याय सन्न् अन्नं नाद्यात्तेन प्राश्य इति विज्ञायते
āmayāvinā prāśyo 'nnādyakāmena prāśyo yo 'lam annādyāya sann annaṃ nādyāttena prāśya iti vijñāyate
- 7
तथैवोदकाञ्जलीन् उपनिनीयाञ्जनाभ्यञ्जने ददात्य् आङ्क्ष्वासौ
अभ्यङ्क्ष्वासाव् इति त्रिर् अनुपिण्डम्
tathaivodakāñjalīn upaninīyāñjanābhyañjane dadāty āṅkṣvāsau
abhyaṅkṣvāsāv iti trir anupiṇḍam
- 8
एतानि वः पितरो वासांस्य् अतो नो ऽन्यत्पितरो मा योष्टेति लोम छित्त्वोपन्यस्यति वाससो वा दशाम्
etāni vaḥ pitaro vāsāṃsy ato no 'nyatpitaro mā yoṣṭeti loma chittvopanyasyati vāsaso vā daśām
- 9
उत्तर आयुषि लोम छिन्दीत
uttara āyuṣi loma chindīta
- 10
छित्त्वा नमस्कारैर् उपतिष्ठते नमो वः पितरो रसायेति प्रतिपद्याहं तेषां वसिष्ठो भूयसाम् इत्यन्तेन
chittvā namaskārair upatiṣṭhate namo vaḥ pitaro rasāyeti pratipadyāhaṃ teṣāṃ vasiṣṭho bhūyasām ityantena
- 11
अथ पितॄन् उत्थापयत्य् उत्तिष्ठत पितरः प्रेत शूरा यमस्य पन्थाम् अनुवेता पुराणम्
धत्ताद् अस्मासु द्रविणं यच्च भद्रं प्र णो ब्रूताद्भागधान्देवतास्व् इति
atha pitṝn utthāpayaty uttiṣṭhata pitaraḥ preta śūrā yamasya panthām anuvetā purāṇam
dhattād asmāsu draviṇaṃ yacca bhadraṃ pra ṇo brūtādbhāgadhāndevatāsv iti
- 12
पितॄन्प्रवाहयति परेत पितरः सोम्या इत्य् एतया
pitṝnpravāhayati pareta pitaraḥ somyā ity etayā
- 13
मनस्वतीभिर् उपतिष्ठते मनो न्व् आ हुवामह इति तिसृभिः
manasvatībhir upatiṣṭhate mano nv ā huvāmaha iti tisṛbhiḥ

