15 shlokas
- 1
या जाता ओषधयो देवेभ्यस्त्रियुगं पुरा
तासां पर्व राध्यासं परिस्तरम् आहरन्
अपां मेध्यं यज्ञियं सदेवं शिवम् अस्तु मे
आच्छेत्ता वो मा रिषं जीवानि शरदः शतम्
अपरिमितानां परिमिताः संनह्ये सुकृताय कम्
एनो मा नि गां कतमच्चनाहं पुनर् उत्थाय बहुला भवन्तु
इति परिस्तरणानां दर्भाणाम् अधिनिधान्याच्छेदनी संनहनीत्येता आम्नाता भवन्ति
yā jātā oṣadhayo devebhyastriyugaṃ purā
tāsāṃ parva rādhyāsaṃ paristaram āharan
apāṃ medhyaṃ yajñiyaṃ sadevaṃ śivam astu me
ācchettā vo mā riṣaṃ jīvāni śaradaḥ śatam
aparimitānāṃ parimitāḥ saṃnahye sukṛtāya kam
eno mā ni gāṃ katamaccanāhaṃ punar utthāya bahulā bhavantu
iti paristaraṇānāṃ darbhāṇām adhinidhānyācchedanī saṃnahanītyetā āmnātā bhavanti
- 2
एकविंशतिदारुम् इध्मं करोति पालाशं खादिरं वा
ekaviṃśatidārum idhmaṃ karoti pālāśaṃ khādiraṃ vā
- 3
अष्टादशदारुम् इध्मं संनह्यतीत्य् एकेषां
aṣṭādaśadārum idhmaṃ saṃnahyatīty ekeṣāṃ
- 4
पञ्चदश सामिधेनीदारूणि भवन्ति
pañcadaśa sāmidhenīdārūṇi bhavanti
- 5
त्रयः परिधयः
trayaḥ paridhayaḥ
- 6
पालाशाः कार्ष्मर्यमया वा शुष्का वार्द्रा वा सवल्कलाः
pālāśāḥ kārṣmaryamayā vā śuṣkā vārdrā vā savalkalāḥ
- 7
अथो खादिरा बैल्वा औदुम्बरा वैकङ्कता रौहितका वेति विज्ञायते
atho khādirā bailvā audumbarā vaikaṅkatā rauhitakā veti vijñāyate
- 8
स्थविष्ठो मध्यमो ऽणीयान्द्राघीयान्दक्षिणार्ध्यो ऽणिष्ठो ह्रसिष्ठ उत्तरार्ध्यः
sthaviṣṭho madhyamo 'ṇīyāndrāghīyāndakṣiṇārdhyo 'ṇiṣṭho hrasiṣṭha uttarārdhyaḥ
- 9
द्वे आघारसमिधौ
dve āghārasamidhau
- 10
अनूयाजसमिद् एकविंशी
anūyājasamid ekaviṃśī
- 11
समूलानाम् अमूलानां वा दर्भाणाम् अयुग्धातु तथैव शुल्बं करोति
samūlānām amūlānāṃ vā darbhāṇām ayugdhātu tathaiva śulbaṃ karoti
- 12
तस्मिन्न् इध्मं संभरति
tasminn idhmaṃ saṃbharati
- 13
यत्कृष्णो रूपं कृत्वा प्राविशस्त्वं वनस्पतीन्
ततस्त्वाम् एकविंशतिधा संभरामि सुसंभृता
त्रीन्परिधींस्तिस्रः समिधो यज्ञायुर् अनुसंचरान्
उपवेषं मेक्षणं धृष्टिं संभरामि सुसंभृता
इति संनह्यति
yatkṛṣṇo rūpaṃ kṛtvā prāviśastvaṃ vanaspatīn
tatastvām ekaviṃśatidhā saṃbharāmi susaṃbhṛtā
trīnparidhīṃstisraḥ samidho yajñāyur anusaṃcarān
upaveṣaṃ mekṣaṇaṃ dhṛṣṭiṃ saṃbharāmi susaṃbhṛtā
iti saṃnahyati
- 14
कृष्णो ऽस्य् आखरेष्ठः
देव पुरश्चर सघ्यासं त्वेति पुरस्तात्प्रत्यञ्चं ग्रन्थिम् उपगूहति
kṛṣṇo 'sy ākhareṣṭhaḥ
deva puraścara saghyāsaṃ tveti purastātpratyañcaṃ granthim upagūhati
- 15
अथैनम् अनधः सादयित्वा प्रज्ञातानीध्मप्रव्रश्चनानि निदधाति
athainam anadhaḥ sādayitvā prajñātānīdhmapravraścanāni nidadhāti

