11 shlokas
- 1
पत्नी पिनष्टि दासी वा
patnī pinaṣṭi dāsī vā
- 2
धृष्टिर् असि ब्रह्म यच्छेत्य् उपवेषम् आदाय गार्हपत्यात्प्रत्यञ्चाव् अङ्गारौ निरूह्यान्यतरम् उत्तरापरम् अवान्तरदेशं प्रतिनिरस्यत्य् अपाग्ने ऽग्निम् आमादं जहि निष्क्रव्यादं सेधेति
dhṛṣṭir asi brahma yacchety upaveṣam ādāya gārhapatyātpratyañcāv aṅgārau nirūhyānyataram uttarāparam avāntaradeśaṃ pratinirasyaty apāgne 'gnim āmādaṃ jahi niṣkravyādaṃ sedheti
- 3
आ देवयजं वहेत्य् अन्यतरम् अवस्थाप्य तस्मिन्कपालम् उपदधाति ध्रुवम् असि पृथिवीं दृंहेति
ā devayajaṃ vahety anyataram avasthāpya tasminkapālam upadadhāti dhruvam asi pṛthivīṃ dṛṃheti
- 4
तत्सव्यस्याङ्गुल्याधिनिधाय कपाले ऽङ्गारम् अधिवर्तयति निर्दग्धं रक्षो निर्दग्धा अरातय इति
tatsavyasyāṅgulyādhinidhāya kapāle 'ṅgāram adhivartayati nirdagdhaṃ rakṣo nirdagdhā arātaya iti
- 5
धर्त्रम् असि
धरुणम् असीति पूर्वं पूर्वं कपालम् उपदधाति
धर्मासीति दक्षिणम्
चित स्थेति उत्तरम्
मरुतां शर्धो ऽसीति षष्ठम्
चिद् असि
परिचिद् असीत्य् अवशिष्टे उपदधाति
तूष्णीं वाष्टौ सम्पादयति
dhartram asi
dharuṇam asīti pūrvaṃ pūrvaṃ kapālam upadadhāti
dharmāsīti dakṣiṇam
cita stheti uttaram
marutāṃ śardho 'sīti ṣaṣṭham
cid asi
paricid asīty avaśiṣṭe upadadhāti
tūṣṇīṃ vāṣṭau sampādayati
- 6
एवम् एवोत्तरं कपालयोगम् उपदधाति
evam evottaraṃ kapālayogam upadadhāti
- 7
एकादश सम्पादयति द्वादश वैन्द्राग्नस्य
ekādaśa sampādayati dvādaśa vaindrāgnasya
- 8
एवम् अनुपूर्वाण्य् एवैष्व् अत ऊर्ध्वं कर्माणि क्रियन्ते
evam anupūrvāṇy evaiṣv ata ūrdhvaṃ karmāṇi kriyante
- 9
अथैनान्य् अङ्गारैर् अध्यूहति भृगूणाम् अङ्गिरसां तपसा तप्यध्वम् इति
athaināny aṅgārair adhyūhati bhṛgūṇām aṅgirasāṃ tapasā tapyadhvam iti
- 10
अत्र मदन्तीर् अधिश्रयति
atra madantīr adhiśrayati
- 11
निष्टप्तोपवातायां पात्र्यां वाचंयमस्तिरः पवित्रं पिष्टानि संवपति देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्याम् अग्नये जुष्टं संवपामि
अग्नीषोमाभ्याम् इति यथादेवतम्
त्रिर्यजुषा तूष्णीं चतुर्थम्
niṣṭaptopavātāyāṃ pātryāṃ vācaṃyamastiraḥ pavitraṃ piṣṭāni saṃvapati devasya tvā savituḥ prasave 'śvinorbāhubhyāṃ pūṣṇo hastābhyām agnaye juṣṭaṃ saṃvapāmi
agnīṣomābhyām iti yathādevatam
triryajuṣā tūṣṇīṃ caturtham

