10 shlokas
- 1
सावित्रेण कृष्णाजिनम् आदायोत्करे त्रिर् अवधूनोत्य् ऊर्ध्वग्रीवं बहिर्विशसनम् अवधूतं रक्षो ऽवधूता अरातय इति
sāvitreṇa kṛṣṇājinam ādāyotkare trir avadhūnoty ūrdhvagrīvaṃ bahirviśasanam avadhūtaṃ rakṣo 'vadhūtā arātaya iti
- 2
उत्तरेण विहारं प्रतीचीनग्रीवम् उत्तरलोमास्तृणात्य् अदित्यास्त्वग् असीति
uttareṇa vihāraṃ pratīcīnagrīvam uttaralomāstṛṇāty adityāstvag asīti
- 3
प्रति त्वा पृथिवी वेत्त्व् इति प्रतीचीं भसदं प्रतिसमस्यति
prati tvā pṛthivī vettv iti pratīcīṃ bhasadaṃ pratisamasyati
- 4
अनुत्सृजन्कृष्णाजिनम् उलूखलम् अधिवर्तयत्य् अधिषवणम् असि वानस्पत्यम् इति
anutsṛjankṛṣṇājinam ulūkhalam adhivartayaty adhiṣavaṇam asi vānaspatyam iti
- 5
अनुत्सृजन्न् उलूखलं हविर् आवपत्य् अग्नेस्तनूर् असि वाचो विसर्जनं देववीतये त्वा गृह्णामीति त्रिर्यजुषा तूष्णीं चतुर्थम्
anutsṛjann ulūkhalaṃ havir āvapaty agnestanūr asi vāco visarjanaṃ devavītaye tvā gṛhṇāmīti triryajuṣā tūṣṇīṃ caturtham
- 6
अद्रिर् असि वानस्पत्य इति मुसलम् आदाय हविष्कृतं त्रिर् आह्वयति
हविष्कृद् एहीति ब्राह्मणस्याद्रवेति राजन्यस्यागहीति वैश्यस्य
adrir asi vānaspatya iti musalam ādāya haviṣkṛtaṃ trir āhvayati
haviṣkṛd ehīti brāhmaṇasyādraveti rājanyasyāgahīti vaiśyasya
- 7
अवहन्त्य् अव रक्षो दिवः सपत्नं वध्यासम् इति
avahanty ava rakṣo divaḥ sapatnaṃ vadhyāsam iti
- 8
प्रादुर्भूतेषु तण्डुलेषूच्चैः समाहन्तवा इत्य् आग्नीध्रं प्रेष्यति
prādurbhūteṣu taṇḍuleṣūccaiḥ samāhantavā ity āgnīdhraṃ preṣyati
- 9
कुटरुर् असि मधुजिह्व इत्य् आग्नीध्रो ऽश्मानम् आदाय शम्यां वा सावित्रेणोच्चैर्दृषदुपले समाहन्तीषम् आ वदोर्जम् आ वदेति
kuṭarur asi madhujihva ity āgnīdhro 'śmānam ādāya śamyāṃ vā sāvitreṇoccairdṛṣadupale samāhantīṣam ā vadorjam ā vadeti
- 10
द्विर्दृषदि सकृद् उपलायाम्
त्रिः संचारयन्नवकृत्वः सम्पादयति
dvirdṛṣadi sakṛd upalāyām
triḥ saṃcārayannavakṛtvaḥ sampādayati

