16 shlokas
- 1
श्वो भूते इध्माबर्हिषी व्रतोपेते पौर्णमास्यां कुर्यात्
śvo bhūte idhmābarhiṣī vratopete paurṇamāsyāṃ kuryāt
- 2
पूर्वेद्युर् एवामावास्यायाम्
pūrvedyur evāmāvāsyāyām
- 3
याथाकामी पौर्णमास्याम् इत्य् अपरम्
yāthākāmī paurṇamāsyām ity aparam
- 4
दर्भमयं वेदं करोति वेदो ऽसि येन त्वं देव वेद देवेभ्यो वेदो ऽभवस्तेन मह्यं वेदो भूया इति
darbhamayaṃ vedaṃ karoti vedo 'si yena tvaṃ deva veda devebhyo vedo 'bhavastena mahyaṃ vedo bhūyā iti
- 5
वत्सज्ञुं पशुकामस्य मूतकार्यम् अन्नाद्यकामस्य त्रिवृतं ब्रह्मवर्चसकामस्य
त्रिवृच्छिरसं ब्रुवते
vatsajñuṃ paśukāmasya mūtakāryam annādyakāmasya trivṛtaṃ brahmavarcasakāmasya
trivṛcchirasaṃ bruvate
- 6
नित्यवत्पूर्वौ कल्पाव् एके समामनन्ति
nityavatpūrvau kalpāv eke samāmananti
- 7
अथैनं प्रादेशमात्रे परिवासयति
athainaṃ prādeśamātre parivāsayati
- 8
शुल्बात्प्रादेशमात्र इत्य् एकेषाम्
śulbātprādeśamātra ity ekeṣām
- 9
प्रज्ञातानि वेदाग्राणि निधाय यया शाखया वत्सान् अपाकरोति तस्या अन्तर्वेदि पलाशानाम् एकदेशं प्रशातयति
prajñātāni vedāgrāṇi nidhāya yayā śākhayā vatsān apākaroti tasyā antarvedi palāśānām ekadeśaṃ praśātayati
- 10
मूलतः शाखां परिवास्य तम् उपवेषं करोत्य् उपवेषो ऽसि यज्ञाय त्वां परिवेषम् अधारयन्
इन्द्राय हविः कृण्वन्तः शिवः शग्मो भवासि न इति
mūlataḥ śākhāṃ parivāsya tam upaveṣaṃ karoty upaveṣo 'si yajñāya tvāṃ pariveṣam adhārayan
indrāya haviḥ kṛṇvantaḥ śivaḥ śagmo bhavāsi na iti
- 11
अथास्या दर्भमयं प्रादेशमात्रं पवित्रं करोति त्रिवृद्वलयं वसूनां पवित्रम् असि शतधारं वसूनां पवित्रम् असि सहस्रधारम् इति
athāsyā darbhamayaṃ prādeśamātraṃ pavitraṃ karoti trivṛdvalayaṃ vasūnāṃ pavitram asi śatadhāraṃ vasūnāṃ pavitram asi sahasradhāram iti
- 12
मूले मूलम् अवसजत्य् अग्रे ऽग्रम्
न ग्रन्थिं करोति
mūle mūlam avasajaty agre 'gram
na granthiṃ karoti
- 13
क्रियमाणं यजमानो ऽनुमन्त्रयते
त्रिवृत्पलाशे दर्भ इयान्प्रादेशसंमितः
यज्ञे पवित्रं पोतृतमं पयो हव्यं करोतु म इति
kriyamāṇaṃ yajamāno 'numantrayate
trivṛtpalāśe darbha iyānprādeśasaṃmitaḥ
yajñe pavitraṃ potṛtamaṃ payo havyaṃ karotu ma iti
- 14
परिसमूहन्त्य् अग्न्यगाराण्य् उपलिम्पन्त्य् आयतनानि
parisamūhanty agnyagārāṇy upalimpanty āyatanāni
- 15
यावच्छर्करं सांनाय्यकुम्भ्यौ गोमयेनोपलिप्ते भवतः
yāvaccharkaraṃ sāṃnāyyakumbhyau gomayenopalipte bhavataḥ
- 16
अलंकुर्वाते यजमानः पत्नी च
alaṃkurvāte yajamānaḥ patnī ca

