15 shlokas
- 1
इदं देवानाम् इति निरुप्तान् अभिमृशति
इदम् उ नः सहेति यतो ऽधि निर्वपति
idaṃ devānām iti niruptān abhimṛśati
idam u naḥ saheti yato 'dhi nirvapati
- 2
स्फात्यै त्वा नारात्या इति हविर् आदायोपनिष्क्रामतीदम् अहं निर्वरुणस्य पाशाद् इति
sphātyai tvā nārātyā iti havir ādāyopaniṣkrāmatīdam ahaṃ nirvaruṇasya pāśād iti
- 3
विहारम् अभिवीक्षते सुवर् अभि वि ख्येषं वैश्वानरं ज्योतिर् इति
vihāram abhivīkṣate suvar abhi vi khyeṣaṃ vaiśvānaraṃ jyotir iti
- 4
दृंहन्तां दुर्या द्यावापृथिव्योर् इति प्रत्यवरोहति
dṛṃhantāṃ duryā dyāvāpṛthivyor iti pratyavarohati
- 5
आहरत्य् उर्व् अन्तरिक्षम् अन्विहीति
āharaty urv antarikṣam anvihīti
- 6
अपरेणाहवनीयम् उपसादयत्य् अदित्यास्त्वोपस्थे सादयामीति
apareṇāhavanīyam upasādayaty adityāstvopasthe sādayāmīti
- 7
परिददाति अग्ने हव्यं रक्षस्व
अग्नीषोमौ हव्यं रक्षेथाम् इति यथादेवतम्
paridadāti agne havyaṃ rakṣasva
agnīṣomau havyaṃ rakṣethām iti yathādevatam
- 8
अग्ने हव्यं रक्षस्वेति वा
agne havyaṃ rakṣasveti vā
- 9
सशूकायाम् अग्निहोत्रहवण्यां तिरः पवित्रम् अप आनीयोदगग्राभ्यां पवित्राभ्यां त्रिर् उत्पूयाभिमन्त्रयते यथा पुरस्तात्
saśūkāyām agnihotrahavaṇyāṃ tiraḥ pavitram apa ānīyodagagrābhyāṃ pavitrābhyāṃ trir utpūyābhimantrayate yathā purastāt
- 10
ब्रह्माणम् आमन्त्रयते ब्रह्मन्प्रोक्षिष्यामीति
brahmāṇam āmantrayate brahmanprokṣiṣyāmīti
- 11
प्रसूतो ब्रह्मणा हविः प्रोक्षति देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्याम् अग्नये जुष्टं प्रोक्षामि
अग्नीषोमाभ्याम् इति यथादेवतम्
एकैकं त्रिस्त्रिः प्रोक्षति
prasūto brahmaṇā haviḥ prokṣati devasya tvā savituḥ prasave 'śvinorbāhubhyāṃ pūṣṇo hastābhyām agnaye juṣṭaṃ prokṣāmi
agnīṣomābhyām iti yathādevatam
ekaikaṃ tristriḥ prokṣati
- 12
हविः प्रोक्षन्नाग्निम् अभिप्रोक्षति
haviḥ prokṣannāgnim abhiprokṣati
- 13
हविः प्रोक्ष्य पात्राणि प्रोक्षति
haviḥ prokṣya pātrāṇi prokṣati
- 14
उत्तानानि पर्यावृत्य शुन्धध्वं दैव्याय कर्मणे देवयज्याया इति त्रिः कुर्यात्
uttānāni paryāvṛtya śundhadhvaṃ daivyāya karmaṇe devayajyāyā iti triḥ kuryāt
- 15
प्रोक्षणीनां शेषम् इत्य् आश्मरथ्यः
सर्वाभिः प्रोक्षेद् इत्य् आलेखनः
prokṣaṇīnāṃ śeṣam ity āśmarathyaḥ
sarvābhiḥ prokṣed ity ālekhanaḥ

