16 shlokas
- 1
आ वो देवास ईमह इति पूर्वया द्वारा प्राग्वंशं प्रविश्येन्द्राग्नी द्यावापृथिवी इत्य् अपरेणाहवनीयं दक्षिणातिक्रम्य त्वं दीक्षाणाम् अधिपतिर् असीत्य् आहवनीयम् उपोपविशति
ā vo devāsa īmaha iti pūrvayā dvārā prāgvaṃśaṃ praviśyendrāgnī dyāvāpṛthivī ity apareṇāhavanīyaṃ dakṣiṇātikramya tvaṃ dīkṣāṇām adhipatir asīty āhavanīyam upopaviśati
- 2
एष एवात ऊर्ध्वं यजमानस्य संचरो भवति
eṣa evāta ūrdhvaṃ yajamānasya saṃcaro bhavati
- 3
अत्र दीक्षणीयाम् एके समामनन्ति
atra dīkṣaṇīyām eke samāmananti
- 4
पुरस्ताद्दीक्षाहुतीभ्यः संभारयजूंष्य् एके
purastāddīkṣāhutībhyaḥ saṃbhārayajūṃṣy eke
- 5
यद्दीक्षणीयाया ध्रौवम् आज्यं ततो दीक्षाहुतीः स्रुवेण चतस्रो जुहोति
स्रुचा पञ्चमीम्
आकूत्यै प्रयुजे ऽग्नये स्वाहेत्य् एतैः प्रतिमन्त्रम्
yaddīkṣaṇīyāyā dhrauvam ājyaṃ tato dīkṣāhutīḥ sruveṇa catasro juhoti
srucā pañcamīm
ākūtyai prayuje 'gnaye svāhety etaiḥ pratimantram
- 6
द्वादशगृहीतेन स्रुचं पूरयित्वा विश्वे देवस्य नेतुर् इति पूर्णाहुतिं षष्ठीम्
dvādaśagṛhītena srucaṃ pūrayitvā viśve devasya netur iti pūrṇāhutiṃ ṣaṣṭhīm
- 7
यत्राध्वर्युर् औद्ग्रहणानि जुहोति तद्यजमानो ऽध्वर्युम् अन्वारभ्य पञ्च जुहोति वाचा मे वाग्दीक्षतां स्वाहा
प्राणेन मे प्राणो दीक्षतां स्वाहा
चक्षुषा मे चक्षुर्दीक्षतां स्वाहा
श्रोत्रेण मे श्रोत्रं दीक्षतां स्वाहा
मनसा मे मनो दीक्षतां स्वाहेति
yatrādhvaryur audgrahaṇāni juhoti tadyajamāno 'dhvaryum anvārabhya pañca juhoti vācā me vāgdīkṣatāṃ svāhā
prāṇena me prāṇo dīkṣatāṃ svāhā
cakṣuṣā me cakṣurdīkṣatāṃ svāhā
śrotreṇa me śrotraṃ dīkṣatāṃ svāhā
manasā me mano dīkṣatāṃ svāheti
- 8
अध्वर्युं वा जुह्वतम् अनुमन्त्रयते
adhvaryuṃ vā juhvatam anumantrayate
- 9
वातं प्राणं मनसान्वारभामहे प्रजापतिं यो भुवनस्य गोपाः
स नो मृत्योस्त्रायतां पात्व् अंहसो ज्योग्जीवा जराम् अशीमहीति पूर्णाहुतिं हूयमानाम् अनुमन्त्रयते
vātaṃ prāṇaṃ manasānvārabhāmahe prajāpatiṃ yo bhuvanasya gopāḥ
sa no mṛtyostrāyatāṃ pātv aṃhaso jyogjīvā jarām aśīmahīti pūrṇāhutiṃ hūyamānām anumantrayate
- 10
अत्र संभारयजूंष्य् एके
atra saṃbhārayajūṃṣy eke
- 11
कृष्णाजिनेन यजमानं दीक्षयति
kṛṣṇājinena yajamānaṃ dīkṣayati
- 12
द्वाभ्यां समस्य दीक्षेतान्तर्मांसाभ्यां बहिर्लोमाभ्याम्
dvābhyāṃ samasya dīkṣetāntarmāṃsābhyāṃ bahirlomābhyām
- 13
यद्य् एकं स्याद्दक्षिणं पूर्वपादं प्रतिषीव्येत्
अन्तान्वा
yady ekaṃ syāddakṣiṇaṃ pūrvapādaṃ pratiṣīvyet
antānvā
- 14
द्वे विषूची प्रतिमुञ्चेत पादं वा प्रतिषीव्येद् इत्य् एके
dve viṣūcī pratimuñceta pādaṃ vā pratiṣīvyed ity eke
- 15
अन्तर्वेदि कृष्णाजिनं प्राचीनग्रीवम् उत्तरलोमास्तृणाति
antarvedi kṛṣṇājinaṃ prācīnagrīvam uttaralomāstṛṇāti
- 16
ऋक्सामयोः शिल्पे स्थ इति शुक्लकृष्णे राजी आलभते
संमृशतीत्य् एके
ṛksāmayoḥ śilpe stha iti śuklakṛṣṇe rājī ālabhate
saṃmṛśatīty eke

