15 shlokas
- 1
अत्रादित्योपस्थानं राज्ञश्च निवपनादि कर्मैके समामनन्ति
atrādityopasthānaṃ rājñaśca nivapanādi karmaike samāmananti
- 2
अपि पन्थाम् अगस्महीत्य् उद्धृतपूर्वफलकेनानसा परिश्रितेन छदिष्मता प्राञ्चः सोमम् अच्छ यान्ति
api panthām agasmahīty uddhṛtapūrvaphalakenānasā pariśritena chadiṣmatā prāñcaḥ somam accha yānti
- 3
शीर्ष्णा गिरौ क्रीतं हरन्ति
śīrṣṇā girau krītaṃ haranti
- 4
अपरेणोत्तरेण वा राजानं प्रागीषम् उदगीषं वा नद्धयुगं शकटं चुबुकप्रतिष्ठितम्
apareṇottareṇa vā rājānaṃ prāgīṣam udagīṣaṃ vā naddhayugaṃ śakaṭaṃ cubukapratiṣṭhitam
- 5
अंशुना ते अंशुः पृच्यताम् इति यजमानो राजानम् अभिमन्त्रयते
aṃśunā te aṃśuḥ pṛcyatām iti yajamāno rājānam abhimantrayate
- 6
यं कामयेतापशुः स्याद् इत्य् ऋक्षतस्तस्येत्य् उक्तम्
yaṃ kāmayetāpaśuḥ syād ity ṛkṣatastasyety uktam
- 7
क्षौमं वासो द्विगुणं त्रिगुणं वा प्राग्दशम् उत्तरदशं चर्मण्य् आस्तृणाति
उदग्दशं वा
kṣaumaṃ vāso dviguṇaṃ triguṇaṃ vā prāgdaśam uttaradaśaṃ carmaṇy āstṛṇāti
udagdaśaṃ vā
- 8
तस्मिन्हिरण्यपाणिर् अङ्गुष्ठेन कनिष्ठिकया चाङ्गुल्यांशून्संगृह्यान्यचन्न् अभि त्यं देवं सवितारम् इत्य् अतिच्छन्दसर्चा मिमीते
tasminhiraṇyapāṇir aṅguṣṭhena kaniṣṭhikayā cāṅgulyāṃśūnsaṃgṛhyānyacann abhi tyaṃ devaṃ savitāram ity aticchandasarcā mimīte
- 9
एवम् एकयैकयोत्सर्गम्
evam ekayaikayotsargam
- 10
सर्वास्व् अङ्गुष्ठम् उपनिगृह्णाति
sarvāsv aṅguṣṭham upanigṛhṇāti
- 11
यया प्रथमं न तया पञ्चमं तयैवोत्तमम्
yayā prathamaṃ na tayā pañcamaṃ tayaivottamam
- 12
पञ्चकृत्वो यजुषा मिमीते
पञ्चकृत्वस्तूष्णीम्
pañcakṛtvo yajuṣā mimīte
pañcakṛtvastūṣṇīm
- 13
एवं द्विस्त्रिर् अपरिमितकृत्वो वा
evaṃ dvistrir aparimitakṛtvo vā
- 14
प्रजाभ्यस्त्वेत्य् अवशिष्टान् अंशून् उपसमूह्य क्षौमेण वाससोपसंगृह्य प्राणाय त्वेति द्विगुणेनोष्णीषेणोपनह्य व्यानाय त्वेति विस्रस्यावेक्षते प्रजास्त्वम् अनुप्राणिहि प्रजास्त्वाम् अनुप्राणन्त्व् इति
prajābhyastvety avaśiṣṭān aṃśūn upasamūhya kṣaumeṇa vāsasopasaṃgṛhya prāṇāya tveti dviguṇenoṣṇīṣeṇopanahya vyānāya tveti visrasyāvekṣate prajāstvam anuprāṇihi prajāstvām anuprāṇantv iti
- 15
एष ते गायत्रो भाग इत्य् एतैर्यजमानो राजानम् उपतिष्ठते
eṣa te gāyatro bhāga ity etairyajamāno rājānam upatiṣṭhate

