13 shlokas
- 1
आपो अस्मान्मातरः शुन्धन्त्व् इति
हिरण्यवर्णाः शुचयः पावकाः प्रचक्रमुर्हित्वावद्यम् आपः
शतं पवित्रा वितता ह्य् आसु ताभिर्नो देवः सविता पुनात्व् इति
हिरण्यवर्णाः शुचयः पावका इति चैताभ्याम्
āpo asmānmātaraḥ śundhantv iti
hiraṇyavarṇāḥ śucayaḥ pāvakāḥ pracakramurhitvāvadyam āpaḥ
śataṃ pavitrā vitatā hy āsu tābhirno devaḥ savitā punātv iti
hiraṇyavarṇāḥ śucayaḥ pāvakā iti caitābhyām
- 2
उद् आभ्यः शुचिर् आपूत एमीत्य् उद्गाहमानो जपति
अपो ऽश्नाति
ud ābhyaḥ śucir āpūta emīty udgāhamāno japati
apo 'śnāti
- 3
एवं पत्नी केशवर्जम्
evaṃ patnī keśavarjam
- 4
अथास्मै क्षौमम् अहतं महद्वासः प्रयच्छति
athāsmai kṣaumam ahataṃ mahadvāsaḥ prayacchati
- 5
तत्प्रतिगृह्णाति दीक्षासि तपसो योनिस्तपो ऽसि ब्रह्मणो योनिर्ब्रह्मासि क्षत्रस्य योनिः क्षत्रम् अस्य् ऋतस्य योनिर् ऋतम् असि भूर् आरभे श्रद्धां मनसा दीक्षां तपसा विश्वस्य भुवनस्याधिपत्नीं सर्वे कामा यजमानस्य सन्त्व् इति
tatpratigṛhṇāti dīkṣāsi tapaso yonistapo 'si brahmaṇo yonirbrahmāsi kṣatrasya yoniḥ kṣatram asy ṛtasya yonir ṛtam asi bhūr ārabhe śraddhāṃ manasā dīkṣāṃ tapasā viśvasya bhuvanasyādhipatnīṃ sarve kāmā yajamānasya santv iti
- 6
सोमस्य तनूर् असि तनुवं मे पाहि दीक्षासि तनूर् असि तां त्वां शिवां स्योनां परिधिषीयेति तत्परिधाय सोमस्य नीविर् असीति नीविम् अनुपरिकल्पयते
somasya tanūr asi tanuvaṃ me pāhi dīkṣāsi tanūr asi tāṃ tvāṃ śivāṃ syonāṃ paridhiṣīyeti tatparidhāya somasya nīvir asīti nīvim anuparikalpayate
- 7
ऊर्जे त्वेत्य् अन्नम् अश्नाति सर्पिर्मिश्रं दधि चाभ्युपसेकम्
ūrje tvety annam aśnāti sarpirmiśraṃ dadhi cābhyupasekam
- 8
यद् अस्य मनसः प्रतिप्रियं तद् अश्नाति
yad asya manasaḥ pratipriyaṃ tad aśnāti
- 9
तद् एवास्यामुष्मिंल्लोके भवतीति विज्ञायते
तथाशितः स्याद्यथा ततो दीक्षासु कनीयः कनीयो व्रतम् उपेयात्
tad evāsyāmuṣmiṃlloke bhavatīti vijñāyate
tathāśitaḥ syādyathā tato dīkṣāsu kanīyaḥ kanīyo vratam upeyāt
- 10
पुरस्तात्केशवपनाद्वाससो वा परिधानाद्भोजनम् एके समामनन्ति
purastātkeśavapanādvāsaso vā paridhānādbhojanam eke samāmananti
- 11
महीनां पयो ऽसीति दर्भपुञ्जीलाभ्यां नवनीतम् उद्यौति
mahīnāṃ payo 'sīti darbhapuñjīlābhyāṃ navanītam udyauti
- 12
वर्चोधा असीति तेन पराचीनं त्रिर् अभ्यङ्क्ते
मुखम् अग्रे
varcodhā asīti tena parācīnaṃ trir abhyaṅkte
mukham agre
- 13
अनुलोमम् अङ्गानि
स्वक्तो भवति
anulomam aṅgāni
svakto bhavati

