14 shlokas
- 1
यत्राभिजानात्य् अभूद् उषा रुशत्पशुर् इति तत्प्रचरण्या जुहोति शृणोत्व् अग्निः समिधा हवं म इति
yatrābhijānāty abhūd uṣā ruśatpaśur iti tatpracaraṇyā juhoti śṛṇotv agniḥ samidhā havaṃ ma iti
- 2
अपरं चतुर्गृहीतं गृहीत्वा दर्भान् आदायोपनिष्क्रम्य संप्रेष्यत्य् अप इष्य होतर्मैत्रावरुणस्य चमसाध्वर्यव् आद्रवैकधनिन आद्रवत नेष्टः पत्नीम् उदानयोन्नेतर्होतृचमसेन वसतीवरीभिश्चात्वालं प्रत्युपास्वेति
aparaṃ caturgṛhītaṃ gṛhītvā darbhān ādāyopaniṣkramya saṃpreṣyaty apa iṣya hotarmaitrāvaruṇasya camasādhvaryav ādravaikadhanina ādravata neṣṭaḥ patnīm udānayonnetarhotṛcamasena vasatīvarībhiścātvālaṃ pratyupāsveti
- 3
त्र्यवरार्ध्या अयुज एकधना भवन्ति
tryavarārdhyā ayuja ekadhanā bhavanti
- 4
यथाचोदितं कुर्वन्ति
yathācoditaṃ kurvanti
- 5
प्रेह्य् उदेहीति नेष्टा पत्नीम् उदानयति
prehy udehīti neṣṭā patnīm udānayati
- 6
यत्र होतुः प्रातरनुवाकम् अनुब्रुवत उपशृणुयात्तद् अपो ऽध्वर्युर्गृह्णीयात्
यदि न शृणुयाद्बधिरः स्यात्
वाचोपच्छिद्येत
yatra hotuḥ prātaranuvākam anubruvata upaśṛṇuyāttad apo 'dhvaryurgṛhṇīyāt
yadi na śṛṇuyādbadhiraḥ syāt
vācopacchidyeta
- 7
यदि दूरे स्युः प्रत्युदूह्य गृह्णीयात्
yadi dūre syuḥ pratyudūhya gṛhṇīyāt
- 8
वहन्तीषु तृणं प्रास्यैतच्चतुर्गृहीतं जुहोति देवीर् आपो अपां नपाद् इति
vahantīṣu tṛṇaṃ prāsyaitaccaturgṛhītaṃ juhoti devīr āpo apāṃ napād iti
- 9
यदि वा पुरा तृणं भवति तस्मिन्न् एव जुहोति
yadi vā purā tṛṇaṃ bhavati tasminn eva juhoti
- 10
कार्षिर् असीति दर्भैर् आहुतिम् अपप्लाव्य घृतलिप्तानां मैत्रावरुणचमसेनोन्नयति समुद्रस्य वो ऽक्षित्या उन्नय इति
kārṣir asīti darbhair āhutim apaplāvya ghṛtaliptānāṃ maitrāvaruṇacamasenonnayati samudrasya vo 'kṣityā unnaya iti
- 11
एवम् एवैकधना उन्नयति
सोमस्य वो मूजवतो रसं गृह्णामीति वा
evam evaikadhanā unnayati
somasya vo mūjavato rasaṃ gṛhṇāmīti vā
- 12
पत्नी पन्नेजनीर्गृह्णाति वसुभ्यो रुद्रेभ्य आदित्येभ्यो विश्वेभ्यो वो देवेभ्यः पन्नेजनीर्गृह्णामि यज्ञाय वः पन्नेजनीर्गृह्णामीति
patnī pannejanīrgṛhṇāti vasubhyo rudrebhya ādityebhyo viśvebhyo vo devebhyaḥ pannejanīrgṛhṇāmi yajñāya vaḥ pannejanīrgṛhṇāmīti
- 13
आहरन्त्य् अपः
āharanty apaḥ
- 14
प्रेह्य् उदेहीत्य् एव नेष्टा पत्नीम् उदानयति
prehy udehīty eva neṣṭā patnīm udānayati

