15 shlokas
- 1
ततो द्विदेवत्यैश्चरतः
tato dvidevatyaiścarataḥ
- 2
वायव इन्द्रवायुभ्याम् अनुब्रूहीति संप्रेष्यति
vāyava indravāyubhyām anubrūhīti saṃpreṣyati
- 3
आदित्यपात्रेण प्रतिप्रस्थातैन्द्रवायवस्यैकदेशं गृह्णाति उपयामगृहीतो ऽसि वाक्षसद् असि वाक्पाभ्यां त्वा क्रतुपाभ्याम् अस्य यज्ञस्य ध्रुवस्याध्यक्षाभ्यां गृह्णामीति
ādityapātreṇa pratiprasthātaindravāyavasyaikadeśaṃ gṛhṇāti upayāmagṛhīto 'si vākṣasad asi vākpābhyāṃ tvā kratupābhyām asya yajñasya dhruvasyādhyakṣābhyāṃ gṛhṇāmīti
- 4
द्रोणकलशाद्गृह्यन्ते ऽसन्ना हूयन्त इत्य् एकेषां प्रतिनिग्राह्याणां वदति
droṇakalaśādgṛhyante 'sannā hūyanta ity ekeṣāṃ pratinigrāhyāṇāṃ vadati
- 5
ऐन्द्रवायवम् आदायाध्वर्युर्द्रोणकलशात्परिप्लवया राजानम् आदायाघारम् आघारयति यत्रोपांशुर् अध्वरो यज्ञो ऽयम् अस्तु देवा ओषधीभ्य इति
aindravāyavam ādāyādhvaryurdroṇakalaśātpariplavayā rājānam ādāyāghāram āghārayati yatropāṃśur adhvaro yajño 'yam astu devā oṣadhībhya iti
- 6
तत्रैषो ऽत्यन्तप्रदेशः
मध्ये ऽग्नेर् आज्याहुतीः पश्वाहुतीः पुरोडाशाहुतीश्च जुहोति
आद्यन्तयोर् आघारस्य सोमाहुतीः
tatraiṣo 'tyantapradeśaḥ
madhye 'gner ājyāhutīḥ paśvāhutīḥ puroḍāśāhutīśca juhoti
ādyantayor āghārasya somāhutīḥ
- 7
यतो मन्येतानभिक्रम्य होष्यामीति तत्तिष्ठन्न् आश्रावयेत्
yato manyetānabhikramya hoṣyāmīti tattiṣṭhann āśrāvayet
- 8
अत्याक्रम्याश्राव्याह वायव इन्द्रवायुभ्यां प्रेष्येति
atyākramyāśrāvyāha vāyava indravāyubhyāṃ preṣyeti
- 9
वषट्कृते जुहोति
vaṣaṭkṛte juhoti
- 10
पुनर्वषट्कृते जुहुतः
punarvaṣaṭkṛte juhutaḥ
- 11
हुतम् अनुमन्त्रयते भूर् असि श्रेष्ठो रश्मीनां प्राणपाः प्राणं मे पाहि धूर् असि श्रेष्ठो रश्मीनाम् अपानपा अपानं मे पाहीति
hutam anumantrayate bhūr asi śreṣṭho raśmīnāṃ prāṇapāḥ prāṇaṃ me pāhi dhūr asi śreṣṭho raśmīnām apānapā apānaṃ me pāhīti
- 12
यद्य् एनं पूर्वः सन्भ्रातृव्यो ऽभिष्याद् अङ्गुल्याङ्गुष्ठम् उपनिगृह्णीयाद्यद्य् अपरो ऽङ्गुष्ठेनाङ्गुलिं यो न इन्द्रवायू अभिदासतीति
yady enaṃ pūrvaḥ sanbhrātṛvyo 'bhiṣyād aṅgulyāṅguṣṭham upanigṛhṇīyādyady aparo 'ṅguṣṭhenāṅguliṃ yo na indravāyū abhidāsatīti
- 13
अध्वर्युपात्रे प्रतिप्रस्थाता संस्रावम् आनयति
अध्वर्युः प्रतिप्रस्थातुः पात्रे
प्रतिप्रस्थातादित्यस्थाल्यां देवेभ्यस्त्वेति
adhvaryupātre pratiprasthātā saṃsrāvam ānayati
adhvaryuḥ pratiprasthātuḥ pātre
pratiprasthātādityasthālyāṃ devebhyastveti
- 14
होत्रे ऽध्वर्युर्भक्षं प्रयच्छति मयि वसुः पुरोवसुर्वाक्पा वाचं मे पाहीति
hotre 'dhvaryurbhakṣaṃ prayacchati mayi vasuḥ purovasurvākpā vācaṃ me pāhīti
- 15
एतेनैव होता प्रतिगृह्णाति
etenaiva hotā pratigṛhṇāti

