17 shlokas
- 1
ततस्त्रीन् अतिग्राह्यान्गृह्णात्य् अग्न आयूंषि पवस इत्य् एतैस्त्रिभिर् अनुवाकैः
tatastrīn atigrāhyāngṛhṇāty agna āyūṃṣi pavasa ity etaistribhir anuvākaiḥ
- 2
तत उक्थ्यम् उपयामगृहीतो ऽसीन्द्राय त्वा बृहद्वते वयस्वत इति
tata ukthyam upayāmagṛhīto 'sīndrāya tvā bṛhadvate vayasvata iti
- 3
ततो ध्रुवं मूर्धानं दिवो अरतिं पृथिव्या इति
tato dhruvaṃ mūrdhānaṃ divo aratiṃ pṛthivyā iti
- 4
यं कामयेत सर्वम् आयुर् इयाद् इति तस्य पूर्णं ग्रहं गृह्णीयात्
yaṃ kāmayeta sarvam āyur iyād iti tasya pūrṇaṃ grahaṃ gṛhṇīyāt
- 5
हिरण्ये ऽधि सादयेद् आयुष्कामस्य
hiraṇye 'dhi sādayed āyuṣkāmasya
- 6
राजपुत्रो ध्रुवं गोपायतीति विज्ञायते
rājaputro dhruvaṃ gopāyatīti vijñāyate
- 7
ध्रुवे गृहीते यजमानो न प्रस्रावयत्य् आवनयनात्
dhruve gṛhīte yajamāno na prasrāvayaty āvanayanāt
- 8
द्रोणकलशे राजानम् अतिपावयति यावन्तं प्रातःसवनायाप्तं मन्यते
droṇakalaśe rājānam atipāvayati yāvantaṃ prātaḥsavanāyāptaṃ manyate
- 9
प्रपीड्य पवित्रं पूतभृति वितत्य मैत्रावरुणचमसीया एकधनासु व्यानयति
prapīḍya pavitraṃ pūtabhṛti vitatya maitrāvaruṇacamasīyā ekadhanāsu vyānayati
- 10
यथार्थम् एकधनानाम् आधवनीये ऽवनीयाधवनीयात्पूतभृत्य् एकदेशं राज्ञो ऽवनयति
yathārtham ekadhanānām ādhavanīye 'vanīyādhavanīyātpūtabhṛty ekadeśaṃ rājño 'vanayati
- 11
तत्रैषो ऽत्यन्तप्रदेशः
यत्र क्व च किं च पूतभृत्य् अवनयेत्तिरः पवित्रम् एवावनयेद् अन्यत्र द्रोणकलशात्
tatraiṣo 'tyantapradeśaḥ
yatra kva ca kiṃ ca pūtabhṛty avanayettiraḥ pavitram evāvanayed anyatra droṇakalaśāt
- 12
पवमानग्रहान्गृह्णाति
उपयामगृहीतोऽसि प्रजापतये त्वेति द्रोणकलशम् अभिमृशेत्
इन्द्राय त्वेत्य् आधवनीयम्
विश्वेभ्यस्त्वा देवेभ्य इति पूतभृतम्
pavamānagrahāngṛhṇāti
upayāmagṛhīto'si prajāpataye tveti droṇakalaśam abhimṛśet
indrāya tvety ādhavanīyam
viśvebhyastvā devebhya iti pūtabhṛtam
- 13
पुरस्तादुपयामा यजुषा गृह्यन्त उपरिष्टादुपयामा ऋचा यज्ञस्य धृत्या इति विज्ञायते
purastādupayāmā yajuṣā gṛhyanta upariṣṭādupayāmā ṛcā yajñasya dhṛtyā iti vijñāyate
- 14
वैप्रुषान्होमान्जुह्वति यस्ते द्रप्स स्कन्दतीत्य् एताभिस्तिसृभिः
vaipruṣānhomānjuhvati yaste drapsa skandatīty etābhistisṛbhiḥ
- 15
सप्तहोतारं च हुत्वोदञ्चः प्रह्वा बहिष्पवमानाय प्रसर्पन्ति
saptahotāraṃ ca hutvodañcaḥ prahvā bahiṣpavamānāya prasarpanti
- 16
अध्वर्युं प्रस्तोतान्वारभते प्रस्तोतारम् उद्गातोद्गातारं प्रतिहर्ता प्रतिहर्तारं ब्रह्मा ब्रह्माणं यजमानः
यजमानं ब्रह्मेत्येकेषाम्
adhvaryuṃ prastotānvārabhate prastotāram udgātodgātāraṃ pratihartā pratihartāraṃ brahmā brahmāṇaṃ yajamānaḥ
yajamānaṃ brahmetyekeṣām
- 17
बर्हिर्मुष्टिं धून्वन्न् अध्वर्युः प्रथमं सर्पति गायत्रः पन्था वसवो देवता वृकेणापरिपरेण पथा स्वस्ति वसून् अशीयेति वाग् अग्रेगा अग्र एत्व् इति च
barhirmuṣṭiṃ dhūnvann adhvaryuḥ prathamaṃ sarpati gāyatraḥ panthā vasavo devatā vṛkeṇāparipareṇa pathā svasti vasūn aśīyeti vāg agregā agra etv iti ca

