11 shlokas
- 1
मैत्रावरुणं गृह्णात्य् अयं वां मित्रावरुणा इति
maitrāvaruṇaṃ gṛhṇāty ayaṃ vāṃ mitrāvaruṇā iti
- 2
अथैनं शृतशीतेन पयसा श्रीणाति
राया वयं ससृवांसो मदेम हव्येन देवा यवसेन गावः
तां धेनुं मित्रावरुणा युवं नो विश्वाहा धत्तम् अनपस्फुरन्तीम्
इति
athainaṃ śṛtaśītena payasā śrīṇāti
rāyā vayaṃ sasṛvāṃso madema havyena devā yavasena gāvaḥ
tāṃ dhenuṃ mitrāvaruṇā yuvaṃ no viśvāhā dhattam anapasphurantīm
iti
- 3
अतीत्याश्विनं शुक्रं गृह्णात्य् अयं वेनश्चोदयत्पृश्निगर्भा इति
atītyāśvinaṃ śukraṃ gṛhṇāty ayaṃ venaścodayatpṛśnigarbhā iti
- 4
अथैनं हिरण्येन श्रीणाति शुक्रं ते शुक्रेण श्रीणामीति
athainaṃ hiraṇyena śrīṇāti śukraṃ te śukreṇa śrīṇāmīti
- 5
ततो मन्थिनं तं प्रत्नथा पूर्वथेति
tato manthinaṃ taṃ pratnathā pūrvatheti
- 6
अथैनं सक्तुभिः श्रीणाति
मनो न येषु हवनेषु तिग्मं विपः शच्या वनुथो द्रवन्ता
आ यः शर्याभिस्तुविनृम्णो अस्याः श्रीणीताद् इमं गभस्तात्
इत्य् अनभिध्वंसयन्न् आत्मानं चेतरांश्च ग्रहान्
athainaṃ saktubhiḥ śrīṇāti
mano na yeṣu havaneṣu tigmaṃ vipaḥ śacyā vanutho dravantā
ā yaḥ śaryābhistuvinṛmṇo asyāḥ śrīṇītād imaṃ gabhastāt
ity anabhidhvaṃsayann ātmānaṃ cetarāṃśca grahān
- 7
तत आग्रयणं द्वयोर्धारयोर्गृह्णाति
tata āgrayaṇaṃ dvayordhārayorgṛhṇāti
- 8
य एष आग्रयणस्थाल्यां राजा तम् अन्यस्मिन्पात्रे पर्यासिच्य द्वितीयां धारां कुरुते ये देवा दिव्य् एकादश स्थेति
ya eṣa āgrayaṇasthālyāṃ rājā tam anyasminpātre paryāsicya dvitīyāṃ dhārāṃ kurute ye devā divy ekādaśa stheti
- 9
रुग्णवत्यर्चा भ्रातृव्यवतो गृह्णीयात्त्रिंशत्त्रयश्च गणिनो रुजन्त इति
rugṇavatyarcā bhrātṛvyavato gṛhṇīyāttriṃśattrayaśca gaṇino rujanta iti
- 10
आग्रयणं गृहीत्वा त्रिर्हिंकृत्वा वाचं विसृजते सोमः पवते सोमः पवते सोमः पवते ऽस्मै ब्रह्मणे पवते ऽस्मै क्षत्राय पवते ऽस्मै विशे पवते ऽस्मै सुन्वते यजमानाय पवत इषे पवत ऊर्जे पवते ऽद्भ्यः पवत ओषधीभ्यः पवते वनस्पतिभ्यः पवते द्यावापृथिवीभ्यां पवते सुभूताय पवते ब्रह्मवर्चसाय पवते यजमानाय पवते मह्यं ज्येष्ठाय पवत इति
āgrayaṇaṃ gṛhītvā trirhiṃkṛtvā vācaṃ visṛjate somaḥ pavate somaḥ pavate somaḥ pavate 'smai brahmaṇe pavate 'smai kṣatrāya pavate 'smai viśe pavate 'smai sunvate yajamānāya pavata iṣe pavata ūrje pavate 'dbhyaḥ pavata oṣadhībhyaḥ pavate vanaspatibhyaḥ pavate dyāvāpṛthivībhyāṃ pavate subhūtāya pavate brahmavarcasāya pavate yajamānāya pavate mahyaṃ jyeṣṭhāya pavata iti
- 11
शनैर् अभिव्याहरत्य् अथोच्चैर् अथ सूच्चैर् इति विज्ञायते
śanair abhivyāharaty athoccair atha sūccair iti vijñāyate

