7 shlokas
- 1
अग्रेण हविर्धाने ग्रहौ संधत्तो ऽरत्नी वा ब्रह्म संधत्तं तन्मे जिन्वतम्
क्षत्रं संधत्तं तन्मे जिन्वतम्
इषं संधत्तं तां मे जिन्वतम्
ऊर्जं संधत्तं तां मे जिन्वतम्
रयिं संधत्तं तां मे जिन्वतम्
पुष्टिं संधत्तं तां मे जिन्वतम्
प्रजां संधत्तं तां मे जिन्वतम्
पशून्संधत्तं तान्मे जिन्वतम् इति
agreṇa havirdhāne grahau saṃdhatto 'ratnī vā brahma saṃdhattaṃ tanme jinvatam
kṣatraṃ saṃdhattaṃ tanme jinvatam
iṣaṃ saṃdhattaṃ tāṃ me jinvatam
ūrjaṃ saṃdhattaṃ tāṃ me jinvatam
rayiṃ saṃdhattaṃ tāṃ me jinvatam
puṣṭiṃ saṃdhattaṃ tāṃ me jinvatam
prajāṃ saṃdhattaṃ tāṃ me jinvatam
paśūnsaṃdhattaṃ tānme jinvatam iti
- 2
उत्तरवेद्यां ग्रहौ सादयित्वानाधृष्टासि इत्य् अङ्गुष्ठाभ्याम् उत्तरवेदिम् आक्रमेते
uttaravedyāṃ grahau sādayitvānādhṛṣṭāsi ity aṅguṣṭhābhyām uttaravedim ākramete
- 3
व्यपरिफन्ताव् इवोत्तरवेदिं विपरिक्रामतः
vyapariphantāv ivottaravediṃ viparikrāmataḥ
- 4
सुवीराः प्रजाः प्रजनयन्परीहि
शुक्रः शुक्रशोचिषेति दक्षिणेनाध्वर्युः
सुप्रजाः प्रजाः प्रजनयन्परीहि
मन्थी मन्थिशोचिषेत्युत्तरेण प्रतिप्रस्थाता
suvīrāḥ prajāḥ prajanayanparīhi
śukraḥ śukraśociṣeti dakṣiṇenādhvaryuḥ
suprajāḥ prajāḥ prajanayanparīhi
manthī manthiśociṣetyuttareṇa pratiprasthātā
- 5
शुक्रं यजमानो ऽन्वारभत इन्द्रेण सयुजो वयं सासह्याम पृतन्यत इति
śukraṃ yajamāno 'nvārabhata indreṇa sayujo vayaṃ sāsahyāma pṛtanyata iti
- 6
अग्रेणोत्तरवेदिं ग्रहौ संधत्तो ऽरत्नी वा संजग्मानौ दिव आ पृथिव्याः
आयुः संधत्तं तन्मे जिन्वतम्
प्राणं संधत्तं तं मे जिन्वतम्
अपानं संधत्तं तं मे जिन्वतम्
व्यानं संधत्तं तं मे जिन्वतम्
चक्षुः संधत्तं तन्मे जिन्वतम्
श्रोत्रं संधत्तं तन्मे जिन्वतम्
मनः संधत्तं तन्मे जिन्वतम्
वाचं संधत्तं तां मे जिन्वतम् इति
agreṇottaravediṃ grahau saṃdhatto 'ratnī vā saṃjagmānau diva ā pṛthivyāḥ
āyuḥ saṃdhattaṃ tanme jinvatam
prāṇaṃ saṃdhattaṃ taṃ me jinvatam
apānaṃ saṃdhattaṃ taṃ me jinvatam
vyānaṃ saṃdhattaṃ taṃ me jinvatam
cakṣuḥ saṃdhattaṃ tanme jinvatam
śrotraṃ saṃdhattaṃ tanme jinvatam
manaḥ saṃdhattaṃ tanme jinvatam
vācaṃ saṃdhattaṃ tāṃ me jinvatam iti
- 7
अथैनाव् अध्वर्युर् अभिमन्त्रयत आयुः स्थ आयुर्मे धत्तम्
आयुर्यज्ञाय धत्तम्
आयुर्यज्ञपतये धत्तम्
प्राणः स्थः प्राणं मे धत्तम्
प्राणं यज्ञाय धत्तम्
प्राणं यज्ञपतये धत्तम्
चक्षुः स्थश्चक्षुर्मे धत्तम्
चक्षुर्यज्ञाय धत्तम्
चक्षुर्यज्ञपतये धत्तम्
श्रोत्रं स्थः श्रोत्रं मे धत्तम्
श्रोत्रं यज्ञाय धत्तम्
श्रोत्रं यज्ञपतये धत्तम्
athaināv adhvaryur abhimantrayata āyuḥ stha āyurme dhattam
āyuryajñāya dhattam
āyuryajñapataye dhattam
prāṇaḥ sthaḥ prāṇaṃ me dhattam
prāṇaṃ yajñāya dhattam
prāṇaṃ yajñapataye dhattam
cakṣuḥ sthaścakṣurme dhattam
cakṣuryajñāya dhattam
cakṣuryajñapataye dhattam
śrotraṃ sthaḥ śrotraṃ me dhattam
śrotraṃ yajñāya dhattam
śrotraṃ yajñapataye dhattam

