21 shlokas
- 1
दक्षिणेन चात्वालम् उपविशन्ति
dakṣiṇena cātvālam upaviśanti
- 2
अग्रेण प्रस्तोतारम् उपविश्याध्वर्युः प्रस्तोत्रे बर्हिर्मुष्टिं प्रयच्छन्स्तोत्रम् उपाकरोति वायुर्हिंकर्तेति प्रतिपद्य ते देवाः प्राणभृतः प्राणं मयि दधतु
सोमः पवत इत्य् अन्तेन
agreṇa prastotāram upaviśyādhvaryuḥ prastotre barhirmuṣṭiṃ prayacchanstotram upākaroti vāyurhiṃkarteti pratipadya te devāḥ prāṇabhṛtaḥ prāṇaṃ mayi dadhatu
somaḥ pavata ity antena
- 3
एतेनैव सर्वाणि स्तोत्राण्य् उपाकरोति
etenaiva sarvāṇi stotrāṇy upākaroti
- 4
उपावर्तध्वम् इत्य् अन्यत्र पवमानेभ्यो ऽनन्तरं करोति
upāvartadhvam ity anyatra pavamānebhyo 'nantaraṃ karoti
- 5
चात्वालम् अवेक्षमाणाः स्तुवते
cātvālam avekṣamāṇāḥ stuvate
- 6
स्तोत्रं स्तूयमानं चत्वार ऋत्विज उपगायन्ति
दिग्भ्य उपगायन्ति
stotraṃ stūyamānaṃ catvāra ṛtvija upagāyanti
digbhya upagāyanti
- 7
यजमानपञ्चमा ऋत्विज उपगायन्ति
yajamānapañcamā ṛtvija upagāyanti
- 8
नाध्वर्युर् उपगायेद् इति विज्ञायते
nādhvaryur upagāyed iti vijñāyate
- 9
ओ इत्य् अन्य ऋत्विज उपगायन्ति
हो इति यजमानः
o ity anya ṛtvija upagāyanti
ho iti yajamānaḥ
- 10
स्तूयमानं यजमानो ऽन्वारोहं जपति श्येनो ऽसि गायत्रछन्दा इति
stūyamānaṃ yajamāno 'nvārohaṃ japati śyeno 'si gāyatrachandā iti
- 11
स्तुतम् अनुमन्त्रयते स्तुतस्य स्तुतमसीति
stutam anumantrayate stutasya stutamasīti
- 12
एतेनैव सर्वाणि स्तोत्राण्य् अनुमन्त्रयते
etenaiva sarvāṇi stotrāṇy anumantrayate
- 13
स्तुत उत्तिष्ठन्न् आहाग्नीद् अग्नीन्विहर बर्हिः स्तृणाहि पुरोडाशाꣳ अलंकुरु प्रतिप्रस्थातः पशुनेहीति
stuta uttiṣṭhann āhāgnīd agnīnvihara barhiḥ stṛṇāhi puroḍāśām̐ alaṃkuru pratiprasthātaḥ paśunehīti
- 14
प्रत्येत्य राजानं यजमान उपतिष्ठते विष्णो त्वं नो अन्तम इति
pratyetya rājānaṃ yajamāna upatiṣṭhate viṣṇo tvaṃ no antama iti
- 15
आग्नीध्राद् अङ्गारान् आहृत्य यथान्युप्तम् आग्नीध्रो धिष्णियान्विहरति
āgnīdhrād aṅgārān āhṛtya yathānyuptam āgnīdhro dhiṣṇiyānviharati
- 16
पुरस्तात्प्रत्यङ्ङ् आसीनः प्रतिप्रस्थाता धिष्णियान्व्याघारयति
purastātpratyaṅṅ āsīnaḥ pratiprasthātā dhiṣṇiyānvyāghārayati
- 17
द्रोणकलशात्परिप्लवया राजानम् आदायाहवनीयम् आग्नीध्रीयं होत्रीयम्
पञ्चगृहीतेनाज्येनेतरान्
सोमेन मार्जालीयम्
droṇakalaśātpariplavayā rājānam ādāyāhavanīyam āgnīdhrīyaṃ hotrīyam
pañcagṛhītenājyenetarān
somena mārjālīyam
- 18
य एव निवपनमन्त्रास्ते व्याघारणाः
ya eva nivapanamantrāste vyāghāraṇāḥ
- 19
सवनीयानां पात्राणि प्रक्षाल्य प्रयुनक्ति यान्य् औषधकारितानि भवन्ति
savanīyānāṃ pātrāṇi prakṣālya prayunakti yāny auṣadhakāritāni bhavanti
- 20
पवित्रे कृत्वा संप्रेष्यति यजमान वाचं यच्छेति
pavitre kṛtvā saṃpreṣyati yajamāna vācaṃ yaccheti
- 21
वाग्यतः पात्राणि संमृशति
vāgyataḥ pātrāṇi saṃmṛśati

