15 shlokas
- 1
श्वात्रा स्थ वृत्रतुर इत्य् आप्याय्याभिमन्त्रयते यत्ते सोम दिवि ज्योतिर् इति
śvātrā stha vṛtratura ity āpyāyyābhimantrayate yatte soma divi jyotir iti
- 2
अधिषवणफलके अभिमन्त्रयते धिषणे वीडू सती वीडयेथाम् इति
adhiṣavaṇaphalake abhimantrayate dhiṣaṇe vīḍū satī vīḍayethām iti
- 3
उपरिष्टाद्ग्रावा भवत्य् अधस्ताद् अंशवः
upariṣṭādgrāvā bhavaty adhastād aṃśavaḥ
- 4
अथ होतृचमसे प्रदक्षिणं परिप्लावयन्निग्राभम् उपैति प्राग् अपाग् उदग् अधराक्तास्त्वा दिश आधावन्त्व् अम्ब नि ष्वरेति
atha hotṛcamase pradakṣiṇaṃ pariplāvayannigrābham upaiti prāg apāg udag adharāktāstvā diśa ādhāvantv amba ni ṣvareti
- 5
षड् अंशून् उपयच्छति
आर्द्राः सन्तो ऽसंश्लिष्टा भवन्ति
ṣaḍ aṃśūn upayacchati
ārdrāḥ santo 'saṃśliṣṭā bhavanti
- 6
मा भेर्मा सं विक्था इति ग्रावाणम् उद्यम्य वदन्ति
mā bhermā saṃ vikthā iti grāvāṇam udyamya vadanti
- 7
यत्र तृणं मूलं वा पश्यति तत्प्रत्यभिषुनोत्य् अनागसस्त्वा वयम् इन्द्रेण प्रेषिता उप वायुष्टे अस्त्व् अंशभूर्मित्रस्ते अस्त्व् अंशभूर्वरुणस्ते अस्त्व् अंशभूर् अहतः सोमो राजा मयेति
yatra tṛṇaṃ mūlaṃ vā paśyati tatpratyabhiṣunoty anāgasastvā vayam indreṇa preṣitā upa vāyuṣṭe astv aṃśabhūrmitraste astv aṃśabhūrvaruṇaste astv aṃśabhūr ahataḥ somo rājā mayeti
- 8
एतयैवात ऊर्ध्वम् अभिषुणुयात्
etayaivāta ūrdhvam abhiṣuṇuyāt
- 9
अष्टौ कृत्वो ऽग्रे ऽभिषुत्य पुनर् एव निग्राभम् उपैति
aṣṭau kṛtvo 'gre 'bhiṣutya punar eva nigrābham upaiti
- 10
द्विर् आदितो ऽन्ततो वा
चतुर्निग्राभम् उपैति
dvir ādito 'ntato vā
caturnigrābham upaiti
- 11
त्रिर् उदचनेन संभृत्योदञ्चतीति विज्ञायते
trir udacanena saṃbhṛtyodañcatīti vijñāyate
- 12
अपात्तानाम् अंशूनां द्वाभ्यां प्रतिप्रस्थातोपांशुपात्रम् अपिधायोत्तरत उपयच्छति
apāttānām aṃśūnāṃ dvābhyāṃ pratiprasthātopāṃśupātram apidhāyottarata upayacchati
- 13
अञ्जलिना राजानम् आदायाध्वर्युर् उपांशुपात्रं नयति वाचस्पतये पवस्व वाजिन्न् इति
añjalinā rājānam ādāyādhvaryur upāṃśupātraṃ nayati vācaspataye pavasva vājinn iti
- 14
एवं विहिताव् अपरौ द्वाव् अभिषवौ भवतः
evaṃ vihitāv aparau dvāv abhiṣavau bhavataḥ
- 15
अपि वैकादशकृत्वो द्वितीयम् अभिषुणुयाद्द्वादशकृत्वस्तृतीयम्
api vaikādaśakṛtvo dvitīyam abhiṣuṇuyāddvādaśakṛtvastṛtīyam

