15 shlokas
- 1
उद्धृत्य प्रक्षाल्य दक्षिणम् एवाग्रे प्रतिमुञ्चत आयुष्यं वर्चस्यम् इति
uddhṛtya prakṣālya dakṣiṇam evāgre pratimuñcata āyuṣyaṃ varcasyam iti
- 2
एतद् एव मणिकुण्डलबन्धने विद्यात्
etad eva maṇikuṇḍalabandhane vidyāt
- 3
अथ स्रजं प्रतिमुञ्चते
शुभिके शिर आरोह शोभयन्ती मुखं मम
मुखं हि मम शोभय भूयांसं च भगं कुरु
याम् आहरज्जमदग्निः श्रद्धायै कामायान्यै
इमां तां प्रतिमुञ्चे ऽहं भगेन सह वर्चसेति
atha srajaṃ pratimuñcate
śubhike śira āroha śobhayantī mukhaṃ mama
mukhaṃ hi mama śobhaya bhūyāṃsaṃ ca bhagaṃ kuru
yām āharajjamadagniḥ śraddhāyai kāmāyānyai
imāṃ tāṃ pratimuñce 'haṃ bhagena saha varcaseti
- 4
अथाङ्क्ते यदाञ्जनं त्रैककुदं जातं हिमवत उपरि मयि पर्वतवर्चसम् इति
athāṅkte yadāñjanaṃ traikakudaṃ jātaṃ himavata upari mayi parvatavarcasam iti
- 5
आदर्शम् अवेक्षते
यन्मे वर्चः परापतितम् आत्मानं परिपश्यतः
इदं तत्पुनर् आददे भगेन सह वर्चसेति
ādarśam avekṣate
yanme varcaḥ parāpatitam ātmānaṃ paripaśyataḥ
idaṃ tatpunar ādade bhagena saha varcaseti
- 6
वाग्यत आस्त आ नक्षत्राणाम् उदयात्
vāgyata āsta ā nakṣatrāṇām udayāt
- 7
उदितेषु नक्षत्रेषूपानहाव् उपमुञ्चते द्यौर् असीति दक्षिणां पृथिव्यसीत्य् उत्तराम्
uditeṣu nakṣatreṣūpānahāv upamuñcate dyaur asīti dakṣiṇāṃ pṛthivyasīty uttarām
- 8
उपमुच्याभिमन्त्रयते प्रतिष्ठे स्थो देवते मा मा संताप्तम् इति
upamucyābhimantrayate pratiṣṭhe stho devate mā mā saṃtāptam iti
- 9
दण्डम् आदत्ते लोके वेदायास्मि द्विषतो वधाय सपत्नाञ्छ्वापदान्सरीसृपान्हस्तिनश्चेति
daṇḍam ādatte loke vedāyāsmi dviṣato vadhāya sapatnāñchvāpadānsarīsṛpānhastinaśceti
- 10
छत्रम् आदत्ते प्रजापतेः शरणम् असि ब्रह्मणः छदिर् इति
chatram ādatte prajāpateḥ śaraṇam asi brahmaṇaḥ chadir iti
- 11
उपनिष्क्रम्य दिशो ऽनुवीक्षते देवीः षड् उर्वीर् उरु नः कृणोतेति
upaniṣkramya diśo 'nuvīkṣate devīḥ ṣaḍ urvīr uru naḥ kṛṇoteti
- 12
चन्द्रमसम् उदीक्षते मा रधाम द्विषते सोम राजन्न् इति
candramasam udīkṣate mā radhāma dviṣate soma rājann iti
- 13
यत्रास्य रातिर्भवति तेन सम्भाष्य यथार्थम् एतीत्य् एकम्
yatrāsya rātirbhavati tena sambhāṣya yathārtham etīty ekam
- 14
अथैतद् अपरम्
तूष्णीम् एव तीर्थे स्नात्वोदेत्य तूष्णीं पालाशीं समिधम् आदधाति
athaitad aparam
tūṣṇīm eva tīrthe snātvodetya tūṣṇīṃ pālāśīṃ samidham ādadhāti
- 15
संवत्सरं न मैथुनं चरति द्वादशरात्रं त्रिरात्रं वा सर्वा स्थितयः
saṃvatsaraṃ na maithunaṃ carati dvādaśarātraṃ trirātraṃ vā sarvā sthitayaḥ

