6 shlokas
- 1
अपरेणाग्निं प्राङ्मुख उपविश्य सोपधानं मणिं प्रवयति सपाशं बादरं मणिम्
apareṇāgniṃ prāṅmukha upaviśya sopadhānaṃ maṇiṃ pravayati sapāśaṃ bādaraṃ maṇim
- 2
उदपात्रे ऽवधाय प्रदक्षिणं पर्याप्लावयतीयम् ओषधे त्रायमाणा सहमाना सहस्वती सा मा हिरण्यवर्चसं ब्रह्मवर्चसिनं मा करोत्व् इत्य् उद्धृत्याक्ष्णयैव पर्याहृत्य प्रतिमुञ्चते ऽपाशो ऽसीति
udapātre 'vadhāya pradakṣiṇaṃ paryāplāvayatīyam oṣadhe trāyamāṇā sahamānā sahasvatī sā mā hiraṇyavarcasaṃ brahmavarcasinaṃ mā karotv ity uddhṛtyākṣṇayaiva paryāhṛtya pratimuñcate 'pāśo 'sīti
- 3
उरसि स्थापयत्य् उरो मे मा संशारीः शिवो मोपशेष्व मह्यं दीर्घायुत्वाय शतशारदायेति हस्तेन बादरं मणिम् ऊर्ग् असीति
urasi sthāpayaty uro me mā saṃśārīḥ śivo mopaśeṣva mahyaṃ dīrghāyutvāya śataśāradāyeti hastena bādaraṃ maṇim ūrg asīti
- 4
अर्की मणिर्ब्राह्मणस्य पुलको वैश्यस्य राज्ञो गर्दभसुग्रीवः
अर्की मणिर्ब्राह्मणस्य वैश्यस्य पुलको मणिः
राज्ञो गर्दभसुग्रीवो यस्य कस्य कपित्थक इति मणिधारणे गाथा भवति
arkī maṇirbrāhmaṇasya pulako vaiśyasya rājño gardabhasugrīvaḥ
arkī maṇirbrāhmaṇasya vaiśyasya pulako maṇiḥ
rājño gardabhasugrīvo yasya kasya kapitthaka iti maṇidhāraṇe gāthā bhavati
- 5
निधायाहतम् अन्तरं परिधत्त आयुषे त्वेति
nidhāyāhatam antaraṃ paridhatta āyuṣe tveti
- 6
जराम् अशीयेत्य् उत्तरम् अहतस्य दशायां प्रवर्तौ प्रबध्य दर्व्याम् आधायाज्यस्योपघातं जुहोत्य् आयुष्यं वर्चस्यं सुवीर्यं रायस्पोषम् औद्भिद्यम् इदं हिरण्यम् आयुषे वर्चसे जैत्रियायाविशतान्मां स्वाहा
उच्चैर्वाजि पृतनाजित्सत्रासाहं धनंजयम्
सर्वाः समृद्धीर् ऋद्धयो हिरण्ये ऽस्मिन्समाहिताः स्वाहा
शुनमडं हिरण्यस्य पितुर् इव नामाग्रभैषम्
तं मा हिरण्यवर्चसं पुरुषु प्रियं कुरु स्वाहा
प्रियं मा देवेषु कुरु प्रियं मा ब्राह्मणे कुरु
प्रियं विश्वेषु शूद्रेषु प्रियं राजसु मा कुरु स्वाहा
संराजं च स्वराजं चाभिष्टीर्या च नो गृहे
लक्ष्मी राष्ट्रस्य या मुखे तया मा संसृजामसि स्वाहेति
jarām aśīyety uttaram ahatasya daśāyāṃ pravartau prabadhya darvyām ādhāyājyasyopaghātaṃ juhoty āyuṣyaṃ varcasyaṃ suvīryaṃ rāyaspoṣam audbhidyam idaṃ hiraṇyam āyuṣe varcase jaitriyāyāviśatānmāṃ svāhā
uccairvāji pṛtanājitsatrāsāhaṃ dhanaṃjayam
sarvāḥ samṛddhīr ṛddhayo hiraṇye 'sminsamāhitāḥ svāhā
śunamaḍaṃ hiraṇyasya pitur iva nāmāgrabhaiṣam
taṃ mā hiraṇyavarcasaṃ puruṣu priyaṃ kuru svāhā
priyaṃ mā deveṣu kuru priyaṃ mā brāhmaṇe kuru
priyaṃ viśveṣu śūdreṣu priyaṃ rājasu mā kuru svāhā
saṃrājaṃ ca svarājaṃ cābhiṣṭīryā ca no gṛhe
lakṣmī rāṣṭrasya yā mukhe tayā mā saṃsṛjāmasi svāheti

