14 shlokas
- 1
अथापराणि द्वारपोपस्पृश द्वारपाय स्वाहा द्वारप्य् उपस्पृश द्वारप्यै स्वाहेति चत्वारि
athāparāṇi dvārapopaspṛśa dvārapāya svāhā dvārapy upaspṛśa dvārapyai svāheti catvāri
- 2
अथ पर्णपुटं कृत्वा तस्मिन्न् उपस्तीर्णाभिघारितम् ओदनपिण्डं समवदाय परोगोष्ठे वृक्ष आसजति निषङ्गिण उपस्पृशत निषङ्गिभ्यः स्वाहेति
atha parṇapuṭaṃ kṛtvā tasminn upastīrṇābhighāritam odanapiṇḍaṃ samavadāya parogoṣṭhe vṛkṣa āsajati niṣaṅgiṇa upaspṛśata niṣaṅgibhyaḥ svāheti
- 3
अथोपतिष्ठते नमो निषङ्गिण इषुधिमत इति
athopatiṣṭhate namo niṣaṅgiṇa iṣudhimata iti
- 4
अप्रतीक्षम् एत्याथान्वासारिभ्यो जुहोत्य् अन्वासारिण उपस्पृशतान्वासारिभ्यः स्वाहेति द्वे पलाशे
apratīkṣam etyāthānvāsāribhyo juhoty anvāsāriṇa upaspṛśatānvāsāribhyaḥ svāheti dve palāśe
- 5
अथोपतिष्ठते नमस्ते रुद्र मन्यव इत्य् एतैर् एकादशभिर् अनुवाकैः प्रथमोत्तमाभ्यां वा
athopatiṣṭhate namaste rudra manyava ity etair ekādaśabhir anuvākaiḥ prathamottamābhyāṃ vā
- 6
अभित एतम् अग्निं गा स्थापयति यथा धूमम् आजिघ्रेयुर् इति
abhita etam agniṃ gā sthāpayati yathā dhūmam ājighreyur iti
- 7
आज्यशेषम् ओदनशेषम् उदकुम्भशेषम् इत्य् एकधा समवनीयोदुम्बरशाखया प्रदक्षिणं गास्त्रिः प्रोक्षति शिवं गोभ्यः शिवं गोपतय इति
ājyaśeṣam odanaśeṣam udakumbhaśeṣam ity ekadhā samavanīyodumbaraśākhayā pradakṣiṇaṃ gāstriḥ prokṣati śivaṃ gobhyaḥ śivaṃ gopataya iti
- 8
ऋषभस्य पृष्ठे शेषं निनयत्य् एतं युवानम् इत्य् एताभिः पञ्चभिः
ṛṣabhasya pṛṣṭhe śeṣaṃ ninayaty etaṃ yuvānam ity etābhiḥ pañcabhiḥ
- 9
अथातः क्षैत्रपत्यस्य गवां मार्गे ऽनग्नौ क्षेत्रस्य पतिं यजते क्षेत्रस्य पतये स्वाहेति चतुर्षु सप्तसु वा पलाशेषु
athātaḥ kṣaitrapatyasya gavāṃ mārge 'nagnau kṣetrasya patiṃ yajate kṣetrasya pataye svāheti caturṣu saptasu vā palāśeṣu
- 10
तं तथावाहयति यथा शूलगवम्
taṃ tathāvāhayati yathā śūlagavam
- 11
तूर्णं यजते
tūrṇaṃ yajate
- 12
पाको देवः
pāko devaḥ
- 13
उपतिष्ठते क्षेत्रस्य पतिना वयम् इति द्वाभ्याम्
upatiṣṭhate kṣetrasya patinā vayam iti dvābhyām
- 14
अथैनं क्षैत्रपत्यं ये सनाभयो भवन्ति ते प्राश्नन्ति यथा वैषां कुलधर्मो भवति
athainaṃ kṣaitrapatyaṃ ye sanābhayo bhavanti te prāśnanti yathā vaiṣāṃ kuladharmo bhavati

