13 shlokas
- 1
यत्कृष्णो रूपं कृत्वा प्राविशस्त्वं वनस्पतीन्
ततस्त्वाम् एकविंशतिधा संभरामि सुसंभृता
त्रीन्परिधींस्तिस्रः समिधो यज्ञायुर् अनुसंचरान्
उपवेषं मेक्षणं धृष्टिं संभरामि सुसंभृतेति शुल्ब इध्मं संभरति
yatkṛṣṇo rūpaṃ kṛtvā prāviśastvaṃ vanaspatīn
tatastvām ekaviṃśatidhā saṃbharāmi susaṃbhṛtā
trīnparidhīṃstisraḥ samidho yajñāyur anusaṃcarān
upaveṣaṃ mekṣaṇaṃ dhṛṣṭiṃ saṃbharāmi susaṃbhṛteti śulba idhmaṃ saṃbharati
- 2
कृष्णो ऽस्य् आखरेष्ठो देव पुरश्चर सघ्यासं त्वेति संनह्यति
पुरस्तात्प्रत्यञ्चं ग्रन्थिम् उपगूहति पश्चात्प्राञ्चं वा
अनधो निदधाति
kṛṣṇo 'sy ākhareṣṭho deva puraścara saghyāsaṃ tveti saṃnahyati
purastātpratyañcaṃ granthim upagūhati paścātprāñcaṃ vā
anadho nidadhāti
- 3
इध्मप्रव्रश्चनानि निदधाति
idhmapravraścanāni nidadhāti
- 4
त्वया वेदिं विविदुः पृथिवीं त्वया यज्ञो जायते विश्वदानिः
अच्छिद्रं यज्ञम् अन्वेषि विद्वांस्त्वया होता संतनोत्य् अर्धमासान् इति दर्भाणां वेदं करोति
tvayā vediṃ vividuḥ pṛthivīṃ tvayā yajño jāyate viśvadāniḥ
acchidraṃ yajñam anveṣi vidvāṃstvayā hotā saṃtanoty ardhamāsān iti darbhāṇāṃ vedaṃ karoti
- 5
वत्सज्ञुं पशुकामस्य मूतकार्यम् अन्नाद्यकामस्य त्रिवृच्छिरसं ब्रह्मवर्चसकामस्य
vatsajñuṃ paśukāmasya mūtakāryam annādyakāmasya trivṛcchirasaṃ brahmavarcasakāmasya
- 6
शुल्बात्प्रादेशे परिवास्य वेदपरिवासनानि निदधाति
śulbātprādeśe parivāsya vedaparivāsanāni nidadhāti
- 7
अन्तर्वेदि शाखायाः पलाशान्य् असर्वाणि प्रशात्य मूलतः शाखां परिवास्योपवेषं करोत्य् उपवेषो ऽसि यज्ञाय त्वां परिवेषम् अधारयन्
इन्द्राय हविः कृण्वन्तः शिवः शग्मो भवासि न इति
antarvedi śākhāyāḥ palāśāny asarvāṇi praśātya mūlataḥ śākhāṃ parivāsyopaveṣaṃ karoty upaveṣo 'si yajñāya tvāṃ pariveṣam adhārayan
indrāya haviḥ kṛṇvantaḥ śivaḥ śagmo bhavāsi na iti
- 8
तृतीयस्यै दिवो गायत्रिया सोम आभृतः
सोमपीथाय संनयितुं वकलम् अन्तरम् आदद इति परिवासनशकलम् आदाय प्रज्ञातं निदधाति
tṛtīyasyai divo gāyatriyā soma ābhṛtaḥ
somapīthāya saṃnayituṃ vakalam antaram ādada iti parivāsanaśakalam ādāya prajñātaṃ nidadhāti
- 9
त्रिवृद्दर्भमयं पवित्रं कृत्वा वसूनाम्पवित्रम् असीति शाखायां शिथिलम् अवसजति मूले मूलान्य् अग्रे ऽग्राणि
न ग्रन्थिं करोति
trivṛddarbhamayaṃ pavitraṃ kṛtvā vasūnāmpavitram asīti śākhāyāṃ śithilam avasajati mūle mūlāny agre 'grāṇi
na granthiṃ karoti
- 10
त्रिवृत्पलाशे दर्भ इयान्प्रादेशसंमितः
यज्ञे पवित्रं पोतृतमं पयो हव्यं करोतु मे
इमौ प्राणापानौ यज्ञस्याङ्गानि सर्वशः
आप्याययन्तौ संचरतां पवित्रे हव्यशोधने इति क्रियमाणे यजमानो ऽनुमन्त्रयते
trivṛtpalāśe darbha iyānprādeśasaṃmitaḥ
yajñe pavitraṃ potṛtamaṃ payo havyaṃ karotu me
imau prāṇāpānau yajñasyāṅgāni sarvaśaḥ
āpyāyayantau saṃcaratāṃ pavitre havyaśodhane iti kriyamāṇe yajamāno 'numantrayate
- 11
समूहन्त्य् अग्न्यगारम् उपलिम्पन्त्य् आयतनानि
samūhanty agnyagāram upalimpanty āyatanāni
- 12
अलंकुर्वाते यजमानः पत्नी च
alaṃkurvāte yajamānaḥ patnī ca
- 13
नवे सांनाय्यकुम्भ्यौ यावच्छर्करं गोमयेनालिप्ते भवतः
nave sāṃnāyyakumbhyau yāvaccharkaraṃ gomayenālipte bhavataḥ

