17 shlokas
- 1
निष्टप्तं रक्षो निष्टप्तो ऽघशंस इति गार्हपत्ये सांनाय्यपात्राणि प्रतितप्य धृष्टिर् असि ब्रह्म यच्छेत्य् उपवेषम् आदाय निरूढं जन्यं भयं निरूढाः सेना अभीत्वरीर् इति गार्हपत्याद् उदीचो ऽङ्गारान्निरूह्य मातरिश्वनो घर्मो ऽसीति तेषु कुम्भीम् अधिश्रयति
niṣṭaptaṃ rakṣo niṣṭapto 'ghaśaṃsa iti gārhapatye sāṃnāyyapātrāṇi pratitapya dhṛṣṭir asi brahma yacchety upaveṣam ādāya nirūḍhaṃ janyaṃ bhayaṃ nirūḍhāḥ senā abhītvarīr iti gārhapatyād udīco 'ṅgārānnirūhya mātariśvano gharmo 'sīti teṣu kumbhīm adhiśrayati
- 2
अप्रस्रंसाय यज्ञस्योखे उपदधाम्य् अहम्
पशुभिः संनीतं बिभृताम् इन्द्राय शृतं दधीति वा
aprasraṃsāya yajñasyokhe upadadhāmy aham
paśubhiḥ saṃnītaṃ bibhṛtām indrāya śṛtaṃ dadhīti vā
- 3
भृगूणाम् अङ्गिरसां तपसा तप्यस्वेति प्रदक्षिणम् अङ्गारैः पर्यूह्य वसूनां पवित्रम् असीति तस्यां प्रागग्रं शाखापवित्रम् अत्यादधाति
bhṛgūṇām aṅgirasāṃ tapasā tapyasveti pradakṣiṇam aṅgāraiḥ paryūhya vasūnāṃ pavitram asīti tasyāṃ prāgagraṃ śākhāpavitram atyādadhāti
- 4
उदक्प्रातः
udakprātaḥ
- 5
कुम्भीम् अन्वारभ्य वाचं यच्छति
kumbhīm anvārabhya vācaṃ yacchati
- 6
पवित्रं वा धारयन्न् आस्ते
pavitraṃ vā dhārayann āste
- 7
अदित्यै रास्नासीत्य् अभिधानीम् आदत्ते
adityai rāsnāsīty abhidhānīm ādatte
- 8
त्रयस्त्रिंशो ऽसि तन्तूनां पवित्रेण सहागहि
शिवेयं रज्जुर् अभिधान्य् अघ्नियाम् उपसेवताम् इत्य् आदीयमानाम् अभिमन्त्रयते यजमानः
trayastriṃśo 'si tantūnāṃ pavitreṇa sahāgahi
śiveyaṃ rajjur abhidhāny aghniyām upasevatām ity ādīyamānām abhimantrayate yajamānaḥ
- 9
पूषासीति वत्सम् अभिदधाति
pūṣāsīti vatsam abhidadhāti
- 10
उपसृष्टां मे प्रब्रूताद् इति संप्रेष्यति
upasṛṣṭāṃ me prabrūtād iti saṃpreṣyati
- 11
उपसृजामीत्य् आमन्त्रयते
अयक्ष्मा वः प्रजया संसृजामि रायस्पोषेण बहुला भवन्तीर् इति वत्सम् उपसृजति
upasṛjāmīty āmantrayate
ayakṣmā vaḥ prajayā saṃsṛjāmi rāyaspoṣeṇa bahulā bhavantīr iti vatsam upasṛjati
- 12
गां चोपसृष्टां विहारं चान्तरेण मा संचारिष्टेति संप्रेष्यति
gāṃ copasṛṣṭāṃ vihāraṃ cāntareṇa mā saṃcāriṣṭeti saṃpreṣyati
- 13
यद्य् उपसृष्टां व्यवेयात्सांनाय्यं मा विलोपीति ब्रूयात्
yady upasṛṣṭāṃ vyaveyātsāṃnāyyaṃ mā vilopīti brūyāt
- 14
उपसीदामीत्य् आमन्त्रयते
अयक्ष्मा वः प्रजया संसृजामि रायस्पोषेण बहुला भवन्तीः
ऊर्जं पयः पिन्वमाना घृतं च जीवा जीवन्तीर् उप वः सदेयम् इति दोग्धोपसीदति
upasīdāmīty āmantrayate
ayakṣmā vaḥ prajayā saṃsṛjāmi rāyaspoṣeṇa bahulā bhavantīḥ
ūrjaṃ payaḥ pinvamānā ghṛtaṃ ca jīvā jīvantīr upa vaḥ sadeyam iti dogdhopasīdati
- 15
न शूद्रो दुह्याद्दुह्याद्वा
na śūdro duhyādduhyādvā
- 16
दारुपात्रे दोग्धि
dārupātre dogdhi
- 17
उपसृष्टां दुह्यमानां धाराघोषं च यजमानो ऽनुमन्त्रयते
अयक्ष्मा वः प्रजया संसृजामीत्य् उपसृष्टाम्
द्यौश्चेमं यज्ञं पृथिवी च संदुहाताम्
धाता सोमेन सह वातेन वायुः
यजमानाय द्रविणं दधात्व् इति दुह्यमानाम्
upasṛṣṭāṃ duhyamānāṃ dhārāghoṣaṃ ca yajamāno 'numantrayate
ayakṣmā vaḥ prajayā saṃsṛjāmīty upasṛṣṭām
dyauścemaṃ yajñaṃ pṛthivī ca saṃduhātām
dhātā somena saha vātena vāyuḥ
yajamānāya draviṇaṃ dadhātv iti duhyamānām

