15 shlokas
- 1
उत्सं दुहन्ति कलशं चतुर्बिलम् इडां देवीं मधुमतीं सुवर्विदम्
तद् इन्द्राग्नी जिन्वतं सूनृतावत्तद्यजमानम् अमृतत्वे दधात्व् इति धाराघोषम्
utsaṃ duhanti kalaśaṃ caturbilam iḍāṃ devīṃ madhumatīṃ suvarvidam
tad indrāgnī jinvataṃ sūnṛtāvattadyajamānam amṛtatve dadhātv iti dhārāghoṣam
- 2
दुग्ध्वा हरति
dugdhvā harati
- 3
तं पृच्छति काम् अधुक्षः प्र णो ब्रूहीन्द्राय हविर् इन्द्रियम् इति
taṃ pṛcchati kām adhukṣaḥ pra ṇo brūhīndrāya havir indriyam iti
- 4
अमूम् इति निर्दिशति
यस्यां देवानां मनुष्याणां पयो हितम् इति प्रत्याह
amūm iti nirdiśati
yasyāṃ devānāṃ manuṣyāṇāṃ payo hitam iti pratyāha
- 5
सा विश्वायुर् इत्य् अनुमन्त्रयते
sā viśvāyur ity anumantrayate
- 6
देवस्त्वा सविता पुनातु वसोः पवित्रेण शतधारेण सुपुवेति कुम्भ्यां तिरः पवित्रम् आसिञ्चति
devastvā savitā punātu vasoḥ pavitreṇa śatadhāreṇa supuveti kumbhyāṃ tiraḥ pavitram āsiñcati
- 7
हुत स्तोको हुतो द्रप्स इति विप्रुषो ऽनुमन्त्रयते
huta stoko huto drapsa iti vipruṣo 'numantrayate
- 8
एवं द्वितीयां तृतीयां च दोहयति
evaṃ dvitīyāṃ tṛtīyāṃ ca dohayati
- 9
सा विश्वव्यचा इति द्वितीयाम् अनुमन्त्रयते
सा विश्वकर्मेति तृतीयाम्
sā viśvavyacā iti dvitīyām anumantrayate
sā viśvakarmeti tṛtīyām
- 10
तिस्रो दोहयित्वा बहु दुग्धीन्द्राय देवेभ्यो हव्यम् आप्यायतां पुनः
वत्सेभ्यो मनुष्येभ्यः पुनर्दोहाय कल्पताम् इति त्रिर्वाचं विसृज्यानन्वारभ्य तूष्णीम् उत्तरा दोहयित्वा दोहने ऽप आनीय संपृच्यध्वम् ऋतावरीर् इति कुम्भ्यां संक्षालनम् आनीयाविष्यन्दयन्सुशृतं करोति
tisro dohayitvā bahu dugdhīndrāya devebhyo havyam āpyāyatāṃ punaḥ
vatsebhyo manuṣyebhyaḥ punardohāya kalpatām iti trirvācaṃ visṛjyānanvārabhya tūṣṇīm uttarā dohayitvā dohane 'pa ānīya saṃpṛcyadhvam ṛtāvarīr iti kumbhyāṃ saṃkṣālanam ānīyāviṣyandayansuśṛtaṃ karoti
- 11
दृंह गा दृंह गोपतिं मा वो यज्ञपती रिषद् इति वर्त्म कुर्वन्प्राग् उद्वासयत्य् उदक्प्रागुदग्वा
dṛṃha gā dṛṃha gopatiṃ mā vo yajñapatī riṣad iti vartma kurvanprāg udvāsayaty udakprāgudagvā
- 12
एकस्या द्वयोस्तिसृणां वैकाहे द्व्यहे त्र्यहे वा पुरस्ताद् उपवसथाद् आतञ्चनार्थं दोहयित्वा संततम् अभिदुहन्त्य् ओपवसथात्
ekasyā dvayostisṛṇāṃ vaikāhe dvyahe tryahe vā purastād upavasathād ātañcanārthaṃ dohayitvā saṃtatam abhiduhanty opavasathāt
- 13
तेन शीतबुध्नम् आतनक्ति
tena śītabudhnam ātanakti
- 14
सोमेन त्वातनच्मीन्द्राय दधीति दध्ना
somena tvātanacmīndrāya dadhīti dadhnā
- 15
यज्ञस्य संततिर् असि यज्ञस्य त्वा संततिम् अनुसंतनोमीत्य् अग्निहोत्रोच्छेषणम् अन्ववधायायं पयः सोमं कृत्वा स्वां योनिम् अपिगच्छतु
पर्णवल्कः पवित्रं सौम्यः सोमाद्धि निर्मित इति परिवासनशकलम् अन्ववदधाति
yajñasya saṃtatir asi yajñasya tvā saṃtatim anusaṃtanomīty agnihotroccheṣaṇam anvavadhāyāyaṃ payaḥ somaṃ kṛtvā svāṃ yonim apigacchatu
parṇavalkaḥ pavitraṃ saumyaḥ somāddhi nirmita iti parivāsanaśakalam anvavadadhāti

