10 shlokas
- 1
अमावास्यायां रात्र्यां स्वयं यजमानो यवाग्वाग्निहोत्रं जुहोत्य् अग्निहोत्रोच्छेषणम् आतञ्चनार्थं निदधाति
amāvāsyāyāṃ rātryāṃ svayaṃ yajamāno yavāgvāgnihotraṃ juhoty agnihotroccheṣaṇam ātañcanārthaṃ nidadhāti
- 2
नास्यैतां रात्रिं कुमाराश्चन पयसो लभन्ते
nāsyaitāṃ rātriṃ kumārāścana payaso labhante
- 3
हुते सायमग्निहोत्रे सायंदोहं दोहयति
hute sāyamagnihotre sāyaṃdohaṃ dohayati
- 4
अग्नीन्परिस्तीर्याग्निम् अग्नी वा सांनाय्यपात्राणि प्रक्षाल्योत्तरेण गार्हपत्यं दर्भान्संस्तीर्य द्वन्द्वं न्यञ्चि प्रयुनक्ति
agnīnparistīryāgnim agnī vā sāṃnāyyapātrāṇi prakṣālyottareṇa gārhapatyaṃ darbhānsaṃstīrya dvandvaṃ nyañci prayunakti
- 5
कुम्भीं शाखापवित्रम् अभिधानीं निदाने दारुपात्रं दोहनम् अयस्पात्रं दारुपात्रं वापिधानार्थम् अग्निहोत्रहवणीम् उपवेषं च
kumbhīṃ śākhāpavitram abhidhānīṃ nidāne dārupātraṃ dohanam ayaspātraṃ dārupātraṃ vāpidhānārtham agnihotrahavaṇīm upaveṣaṃ ca
- 6
समाव् अप्रच्छिन्नाग्रौ दर्भौ प्रादेशमात्रौ पवित्रे कुरुते
samāv apracchinnāgrau darbhau prādeśamātrau pavitre kurute
- 7
पवित्रे स्थो वैष्णवी वायुर्वां मनसा पुनात्व् इति तृणं काष्ठं वान्तर्धाय छिनत्ति
pavitre stho vaiṣṇavī vāyurvāṃ manasā punātv iti tṛṇaṃ kāṣṭhaṃ vāntardhāya chinatti
- 8
न नखेन
na nakhena
- 9
विष्णोर्मनसा पूते स्थ इत्य् अद्भिर् अनुमृज्य पवित्रान्तर्हितायाम् अग्निहोत्रहवण्याम् अप आनीयोदगग्राभ्यां पवित्राभ्यां प्रोक्षणीर् उत्पुनाति देवो वः सवितोत्पुनात्व् इति प्रथमम्
अच्छिद्रेण पवित्रेणेति द्वितीयम्
वसोः सूर्यस्य रश्मिभिर् इति तृतीयम्
viṣṇormanasā pūte stha ity adbhir anumṛjya pavitrāntarhitāyām agnihotrahavaṇyām apa ānīyodagagrābhyāṃ pavitrābhyāṃ prokṣaṇīr utpunāti devo vaḥ savitotpunātv iti prathamam
acchidreṇa pavitreṇeti dvitīyam
vasoḥ sūryasya raśmibhir iti tṛtīyam
- 10
आपो देवीर् अग्रेपुव इत्य् अभिमन्त्र्योत्तानानि पात्राणि पर्यावर्त्य शुन्धध्वं दैव्याय कर्मण इति त्रिः प्रोक्ष्य प्रज्ञाते पवित्रे निदधाति
आपो देवीः शुद्धा स्थेमा पात्राणि शुन्धत
उपातङ्क्याय देवानां पर्णवल्कम् उत शुन्धत
देवेन सवित्रोत्पूता वसोः सूर्यस्य रश्मिभिः
गां दोहपवित्रे रज्जुं सर्वा पात्राणि शुन्धतेति प्रोक्ष्यमाणान्य् अभिमन्त्र्यैता आचरन्ति मधुमद्दुहानाः प्रजावतीर्यशसो विश्वरूपाः
बह्वीर्भवन्तीर् उपजायमाना इह व इन्द्रो रमयतु गाव इति गा आयतीः प्रतीक्षते यजमानः
āpo devīr agrepuva ity abhimantryottānāni pātrāṇi paryāvartya śundhadhvaṃ daivyāya karmaṇa iti triḥ prokṣya prajñāte pavitre nidadhāti
āpo devīḥ śuddhā sthemā pātrāṇi śundhata
upātaṅkyāya devānāṃ parṇavalkam uta śundhata
devena savitrotpūtā vasoḥ sūryasya raśmibhiḥ
gāṃ dohapavitre rajjuṃ sarvā pātrāṇi śundhateti prokṣyamāṇāny abhimantryaitā ācaranti madhumadduhānāḥ prajāvatīryaśaso viśvarūpāḥ
bahvīrbhavantīr upajāyamānā iha va indro ramayatu gāva iti gā āyatīḥ pratīkṣate yajamānaḥ

