11 shlokas
- 1
इमां प्राचीम् उदीचीम् इषम् ऊर्जम् अभिसंस्कृतां बहुपर्णाम् अशुष्काग्रां हरामि पशुपाम् अहम् इत्य् आहरति
imāṃ prācīm udīcīm iṣam ūrjam abhisaṃskṛtāṃ bahuparṇām aśuṣkāgrāṃ harāmi paśupām aham ity āharati
- 2
वायव स्थोपायव स्थेति तया षडवरार्ध्यान्वत्सान् अपाकरोति
vāyava sthopāyava stheti tayā ṣaḍavarārdhyānvatsān apākaroti
- 3
दर्भैर्दर्भपुञ्जीलैर्वा
darbhairdarbhapuñjīlairvā
- 4
देवो वः सविता प्रार्पयत्व् इति शाखया गोचराय गाः प्रस्थापयति
devo vaḥ savitā prārpayatv iti śākhayā gocarāya gāḥ prasthāpayati
- 5
प्रस्थितानाम् एकां शाखयोपस्पृशति दर्भैर्दर्भपुञ्जीलैर्वा
prasthitānām ekāṃ śākhayopaspṛśati darbhairdarbhapuñjīlairvā
- 6
आप्यायध्वम् अघ्निया इन्द्राय देवभागम् इत्य् एके समामनन्ति
महेन्द्रायेत्य् एके
āpyāyadhvam aghniyā indrāya devabhāgam ity eke samāmananti
mahendrāyety eke
- 7
इन्द्रं निगमेषूपलक्षयेद् इन्द्रयाजिनो महेन्द्रं महेन्द्रयाजिनः
indraṃ nigameṣūpalakṣayed indrayājino mahendraṃ mahendrayājinaḥ
- 8
शुद्धा अपः सुप्रपाणे पिबन्तीः शतम् इन्द्राय शरदो दुहानाः
रुद्रस्य हेतिः परि वो वृणक्त्व् इति प्रस्थिता अनुमन्त्रयते
śuddhā apaḥ suprapāṇe pibantīḥ śatam indrāya śarado duhānāḥ
rudrasya hetiḥ pari vo vṛṇaktv iti prasthitā anumantrayate
- 9
ध्रुवा अस्मिन्गोपतौ स्यात बह्वीर् इति यजमानस्य गृहान् अभिपर्यावर्तते
dhruvā asmingopatau syāta bahvīr iti yajamānasya gṛhān abhiparyāvartate
- 10
यजमानस्य पशून्पाहीत्य् अग्निष्ठे ऽनस्य् अग्न्यगारे वा पुरस्तात्प्रतीचीं शाखाम् उपगूहति पश्चात्प्राचीं वा
yajamānasya paśūnpāhīty agniṣṭhe 'nasy agnyagāre vā purastātpratīcīṃ śākhām upagūhati paścātprācīṃ vā
- 11
यो वा अध्वर्योर्गृहान्वेद गृहवान्भवति
आ चतुर्थात्कर्मणो ऽभिसमीक्षेतेदं करिष्यामीदं करिष्यामीत्य् एते वा अध्वर्योर्गृहाः
य एवं वेद गृहवान्भवतीति विज्ञायते
yo vā adhvaryorgṛhānveda gṛhavānbhavati
ā caturthātkarmaṇo 'bhisamīkṣetedaṃ kariṣyāmīdaṃ kariṣyāmīty ete vā adhvaryorgṛhāḥ
ya evaṃ veda gṛhavānbhavatīti vijñāyate

