17 shlokas
- 1
उत्तरेण गार्हपत्यम् असिदो ऽश्वपर्शुर् अनडुत्पर्शुर्वा निहिता
uttareṇa gārhapatyam asido 'śvaparśur anaḍutparśurvā nihitā
- 2
देवस्य त्वा सवितुः प्रसव इत्य् असिदम् अश्वपर्शुं वादत्ते तूष्णीम् अनडुत्पर्शुम्
devasya tvā savituḥ prasava ity asidam aśvaparśuṃ vādatte tūṣṇīm anaḍutparśum
- 3
यज्ञस्य घोषद् असीति गार्हपत्यम् अभिमन्त्र्य प्रत्युष्टं रक्षः प्रत्युष्टा अरातय इत्य् आहवनीये गार्हपत्ये वासिदं प्रतितपति
yajñasya ghoṣad asīti gārhapatyam abhimantrya pratyuṣṭaṃ rakṣaḥ pratyuṣṭā arātaya ity āhavanīye gārhapatye vāsidaṃ pratitapati
- 4
न पर्शुम्
na parśum
- 5
प्रेयम् अगाद् इत्य् उक्त्वोर्व् अन्तरिक्षम् अन्विहीति प्राचीम् उदीचीं वा दिशम् अभिप्रव्रज्य यतः कुतश्चिद्दर्भमयं बर्हिर् आहरति
preyam agād ity uktvorv antarikṣam anvihīti prācīm udīcīṃ vā diśam abhipravrajya yataḥ kutaściddarbhamayaṃ barhir āharati
- 6
देवानां परिषूतम् असीति दर्भान्परिषौति
devānāṃ pariṣūtam asīti darbhānpariṣauti
- 7
विष्णो स्तूपो ऽसीत्य् अभिप्रेतानाम् एकं स्तम्बम् उत्सृजति
viṣṇo stūpo 'sīty abhipretānām ekaṃ stambam utsṛjati
- 8
एकं वा स्तम्बं परिषूय तं सर्वं दाति
ekaṃ vā stambaṃ pariṣūya taṃ sarvaṃ dāti
- 9
अतिसृष्टो गवां भाग इति वैकां द्वे तिस्रो वा नाडीर् उत्सृजति
atisṛṣṭo gavāṃ bhāga iti vaikāṃ dve tisro vā nāḍīr utsṛjati
- 10
इदं देवानाम् इति परिषूतान् अभिमृशति
इदं पशूनाम् इत्य् अतिसृष्टान्
idaṃ devānām iti pariṣūtān abhimṛśati
idaṃ paśūnām ity atisṛṣṭān
- 11
देवस्य त्वा सवितुः प्रसवे ऽश्विनोर्बाहुभ्यां पूष्णो हस्ताभ्यां बर्हिर्देवसदनम् आरभ इति विशाखेषु दर्भान् आरभते
devasya tvā savituḥ prasave 'śvinorbāhubhyāṃ pūṣṇo hastābhyāṃ barhirdevasadanam ārabha iti viśākheṣu darbhān ārabhate
- 12
देवबर्हिर्मा त्वान्वङ्मा तिर्यग् इति संयच्छति
devabarhirmā tvānvaṅmā tiryag iti saṃyacchati
- 13
पर्व ते राध्यासम् इत्य् असिदम् अधिनिदधाति
parva te rādhyāsam ity asidam adhinidadhāti
- 14
आच्छेत्ता ते मा रिषम् इत्य् आच्छिनत्ति
ācchettā te mā riṣam ity ācchinatti
- 15
संनखं मुष्टिं लुनोति
saṃnakhaṃ muṣṭiṃ lunoti
- 16
स प्रस्तरः
sa prastaraḥ
- 17
कुल्मिमात्रो ऽरत्निः प्रादेश ऊर्वस्थि जान्वस्थि स्रुग्दण्ड इति वा तिर्यक्प्रमाणानि
kulmimātro 'ratniḥ prādeśa ūrvasthi jānvasthi srugdaṇḍa iti vā tiryakpramāṇāni

