18 shlokas
- 1
ओषधयः पूतिकाः क्वलास्तण्डुलाः पर्णवल्का इत्य् आतञ्चनविकल्पाः
oṣadhayaḥ pūtikāḥ kvalāstaṇḍulāḥ parṇavalkā ity ātañcanavikalpāḥ
- 2
उच्छेषणाभावे तण्डुलैर् आतञ्च्यात्तण्डुलाभाव ओषधीभिः
uccheṣaṇābhāve taṇḍulair ātañcyāttaṇḍulābhāva oṣadhībhiḥ
- 3
आपो हविःषु जागृत यथा देवेषु जाग्रथ
एवम् अस्मिन्यज्ञे यजमानाय जागृतेत्य् अयस्पात्रे दारुपात्रे वाप आनीयादस्तम् असि विष्णवे त्वा यज्ञायापिदधाम्य् अहम्
अद्भिर् अरिक्तेन पात्रेण याः पूताः परिशेरत इति तेनापिदधाति
अमृन्मयं देवपात्रं यज्ञस्यायुषि प्रयुज्यताम्
तिरः पवित्रम् अतिनीता आपो धारय मातिगुर् इति यजमानो जपति
āpo haviḥṣu jāgṛta yathā deveṣu jāgratha
evam asminyajñe yajamānāya jāgṛtety ayaspātre dārupātre vāpa ānīyādastam asi viṣṇave tvā yajñāyāpidadhāmy aham
adbhir ariktena pātreṇa yāḥ pūtāḥ pariśerata iti tenāpidadhāti
amṛnmayaṃ devapātraṃ yajñasyāyuṣi prayujyatām
tiraḥ pavitram atinītā āpo dhāraya mātigur iti yajamāno japati
- 4
यदि मृन्मयेनापिदध्यात्तृणं काष्ठं वापिधाने ऽनुप्रविध्येत्
yadi mṛnmayenāpidadhyāttṛṇaṃ kāṣṭhaṃ vāpidhāne 'nupravidhyet
- 5
विष्णो हव्यं रक्षस्वेत्य् अनधो निदधाति
viṣṇo havyaṃ rakṣasvety anadho nidadhāti
- 6
इमौ पर्णं च दर्भं च देवानां हव्यशोधनौ
प्रातर्वेषाय गोपाय विष्णो हव्यं हि रक्षसीति प्रज्ञातं शाखापवित्रं निदधाति
imau parṇaṃ ca darbhaṃ ca devānāṃ havyaśodhanau
prātarveṣāya gopāya viṣṇo havyaṃ hi rakṣasīti prajñātaṃ śākhāpavitraṃ nidadhāti
- 7
तयैव शाखया दर्भैर्वा सायंदोहवत्प्रातर्दोहाय वत्सान् अपाकरोति
tayaiva śākhayā darbhairvā sāyaṃdohavatprātardohāya vatsān apākaroti
- 8
उपधाय कपालानि सायंदोहवत्प्रातर्दोहं दोहयति
आतञ्चनापिधाने निधानं च निवर्तते
नासोमयाजी संनयेत्संनयेद्वा
upadhāya kapālāni sāyaṃdohavatprātardohaṃ dohayati
ātañcanāpidhāne nidhānaṃ ca nivartate
nāsomayājī saṃnayetsaṃnayedvā
- 9
नागतश्रीर्महेन्द्रं यजेत
त्रयो वै गतश्रिय इत्य् उक्तम्
nāgataśrīrmahendraṃ yajeta
trayo vai gataśriya ity uktam
- 10
और्वो गौतमो भारद्वाजस्ते ऽनन्तरं सोमेज्याया महेन्द्रं यजेरन्
aurvo gautamo bhāradvājaste 'nantaraṃ somejyāyā mahendraṃ yajeran
- 11
यो वा कश्चित्
yo vā kaścit
- 12
ततः संप्रेष्यति परिस्तृणीत परिधत्ताग्निं परिहितो ऽग्निर्यजमानं भुनक्तु
अपां रस ओषधीणां सुवर्णो निष्का इमे यजमानस्य सन्तु कामदुघा अमुत्रामुष्मिंल्लोक इति
tataḥ saṃpreṣyati paristṛṇīta paridhattāgniṃ parihito 'gniryajamānaṃ bhunaktu
apāṃ rasa oṣadhīṇāṃ suvarṇo niṣkā ime yajamānasya santu kāmadughā amutrāmuṣmiṃlloka iti
- 13
परिस्तरणीम् एताम् एके समामनन्ति
paristaraṇīm etām eke samāmananti
- 14
उदगग्रैः प्रागग्रैश्च दर्भैर् अग्नीन्परिस्तृणाति
udagagraiḥ prāgagraiśca darbhair agnīnparistṛṇāti
- 15
उदगग्राः पश्चात्पुरस्ताच्च
udagagrāḥ paścātpurastācca
- 16
एतत्कृत्वोपवसति
etatkṛtvopavasati
- 17
अग्न्यन्वाधानं वत्सापाकरणम् इध्माबर्हिर्वेदो वेदिः
प्रागुत्तरात्परिग्राहात्कृत्वा श्वो भूत आप्यलेपं निनीयोत्तरं परिगृह्णीयात्
परिस्तरणं च पूर्वेद्युर् अमावास्यायां पौर्णमास्यां त्व् अन्वाधानपरिस्तरणोपवासाः
agnyanvādhānaṃ vatsāpākaraṇam idhmābarhirvedo vediḥ
prāguttarātparigrāhātkṛtvā śvo bhūta āpyalepaṃ ninīyottaraṃ parigṛhṇīyāt
paristaraṇaṃ ca pūrvedyur amāvāsyāyāṃ paurṇamāsyāṃ tv anvādhānaparistaraṇopavāsāḥ
- 18
सद्यो वा सद्यस्कालायां सर्वं क्रियते
sadyo vā sadyaskālāyāṃ sarvaṃ kriyate

