12 shlokas
- 1
आ त्वा वहन्तु हरय इति प्रातःसवन उन्नीयमानेभ्यो ऽन्वाह वृषण्वतीः पीतवतीः सुतवतीर्मद्वती रूपसमृद्धाः
ā tvā vahantu haraya iti prātaḥsavana unnīyamānebhyo 'nvāha vṛṣaṇvatīḥ pītavatīḥ sutavatīrmadvatī rūpasamṛddhāḥ
- 2
ऐन्द्रीर् अन्वाहैन्द्रो वै यज्ञः
aindrīr anvāhaindro vai yajñaḥ
- 3
गायत्रीर् अन्वाह गायत्रं वै प्रातःसवनम्
gāyatrīr anvāha gāyatraṃ vai prātaḥsavanam
- 4
नव न्यूनाः प्रातःसवने ऽन्वाह न्यूने वै रेतः सिच्यते
nava nyūnāḥ prātaḥsavane 'nvāha nyūne vai retaḥ sicyate
- 5
दश मध्यंदिने ऽन्वाह न्यूने वै रेतः सिक्तम्मध्यं स्त्रियै प्राप्य स्थविष्ठम्भवति
daśa madhyaṃdine 'nvāha nyūne vai retaḥ siktammadhyaṃ striyai prāpya sthaviṣṭhambhavati
- 6
नव न्यूनास्तृतीयसवने ऽन्वाह न्यूनाद्वै प्रजाः प्रजायन्ते
nava nyūnāstṛtīyasavane 'nvāha nyūnādvai prajāḥ prajāyante
- 7
तद्यद् एतानि केवलसूक्तान्य् अन्वाह यजमानम् एव तद्गर्भम्भूतम्प्रजनयति यज्ञाद्देवयोन्यै
tadyad etāni kevalasūktāny anvāha yajamānam eva tadgarbhambhūtamprajanayati yajñāddevayonyai
- 8
ते हैके सप्त सप्तान्वाहुः सप्त प्रातःसवने सप्त माध्यंदिने सप्त तृतीयसवने यावत्यो वै पुरोनुवाक्यास्तावत्यो याज्याः सप्त वै प्राञ्चो यजन्ति सप्त वषट्कुर्वन्ति तासाम् एताः पुरोनुवाक्या इति वदन्तः
te haike sapta saptānvāhuḥ sapta prātaḥsavane sapta mādhyaṃdine sapta tṛtīyasavane yāvatyo vai puronuvākyāstāvatyo yājyāḥ sapta vai prāñco yajanti sapta vaṣaṭkurvanti tāsām etāḥ puronuvākyā iti vadantaḥ
- 9
तत्तथा न कुर्याद्यजमानस्य ह ते रेतो विलुम्पन्त्य् अथो यजमानम् एव यजमानो हि सूक्तम्
tattathā na kuryādyajamānasya ha te reto vilumpanty atho yajamānam eva yajamāno hi sūktam
- 10
नवभिर्वा एतम्मैत्रावरुणो ऽस्माल्लोकाद् अन्तरिक्षलोकम् अभि प्रवहति दशभिर् अन्तरिक्षलोकाद् अमुं लोकम् अभ्य् अन्तरिक्षलोको हि ज्येष्ठो नवभिर् अमुष्माल्लोकात्स्वर्गं लोकम् अभि
navabhirvā etammaitrāvaruṇo 'smāllokād antarikṣalokam abhi pravahati daśabhir antarikṣalokād amuṃ lokam abhy antarikṣaloko hi jyeṣṭho navabhir amuṣmāllokātsvargaṃ lokam abhi
- 11
न ह वै ते यजमानं स्वर्गं लोकम् अभि वोᄆहुम् अर्हन्ति ये सप्त सप्तान्वाहुः
na ha vai te yajamānaṃ svargaṃ lokam abhi voᄆhum arhanti ye sapta saptānvāhuḥ
- 12
तस्मात्केवलश एव सूक्तान्य् अनुब्रूयात्
tasmātkevalaśa eva sūktāny anubrūyāt

