15 shlokas
- 1
एवयामरुतं शंसति प्रतिष्ठा वा एवयामरुत्प्रतिष्ठाम् एवास्य तत्कल्पयति
evayāmarutaṃ śaṃsati pratiṣṭhā vā evayāmarutpratiṣṭhām evāsya tatkalpayati
- 2
तं न्यूङ्खयत्य् अन्नं वै न्यूङ्खो ऽन्नाद्यम् एवास्मिंस्तद्दधाति
taṃ nyūṅkhayaty annaṃ vai nyūṅkho 'nnādyam evāsmiṃstaddadhāti
- 3
स जागतो वातिजागतो वा सर्वं वा इदं जागतं वातिजागतं वा
sa jāgato vātijāgato vā sarvaṃ vā idaṃ jāgataṃ vātijāgataṃ vā
- 4
स उ मारुत आपो वै मरुत आपो ऽन्नम् अभिपूर्वम् एवास्मिंस्तद् अन्नाद्यं दधाति
sa u māruta āpo vai maruta āpo 'nnam abhipūrvam evāsmiṃstad annādyaṃ dadhāti
- 5
तान्य् एतानि सहचराणीत्य् आचक्षते नाभानेदिष्ठं वालखिल्या वृषाकपिम् एवयामरुतं तानि सह वा शंसेत्सह वा न शंसेत्
tāny etāni sahacarāṇīty ācakṣate nābhānediṣṭhaṃ vālakhilyā vṛṣākapim evayāmarutaṃ tāni saha vā śaṃsetsaha vā na śaṃset
- 6
यद् एनानि नाना शंसेद्यथा पुरुषं वा रेतो वा विच्छिन्द्यात्तादृक्तत्तस्माद् एनानि सह वा शंसेत्सह वा न शंसेत्
yad enāni nānā śaṃsedyathā puruṣaṃ vā reto vā vicchindyāttādṛktattasmād enāni saha vā śaṃsetsaha vā na śaṃset
- 7
स ह बुलिल आश्वतर आश्विर्वैश्वजितो होता सन्न् ईक्षांचक्र एषां वा एषां शिल्पानां विश्वजिति सांवत्सरिके द्वे मध्यंदिनम् अभि प्रत्येतोर्हन्ताहम् इत्थम् एवयामरुतं शंसयानीति तद्ध तथा शंसयांचकार
sa ha bulila āśvatara āśvirvaiśvajito hotā sann īkṣāṃcakra eṣāṃ vā eṣāṃ śilpānāṃ viśvajiti sāṃvatsarike dve madhyaṃdinam abhi pratyetorhantāham ittham evayāmarutaṃ śaṃsayānīti taddha tathā śaṃsayāṃcakāra
- 8
तद्ध तथा शस्यमाने गौश्ल आजगाम स होवाच होतः कथा ते शस्त्रं विचक्रम्प्लवत इति
taddha tathā śasyamāne gauśla ājagāma sa hovāca hotaḥ kathā te śastraṃ vicakramplavata iti
- 9
किं ह्य् अभूद् इति
kiṃ hy abhūd iti
- 10
एवयामरुद् अयम् उत्तरतः शस्यत इति स होवाचैन्द्रो वै मध्यंदिनः कथेन्द्रम्मध्यंदिनान्निनीषसीति
evayāmarud ayam uttarataḥ śasyata iti sa hovācaindro vai madhyaṃdinaḥ kathendrammadhyaṃdinānninīṣasīti
- 11
नेन्द्रम्मध्यंदिनान्निनीषामीति होवाच
nendrammadhyaṃdinānninīṣāmīti hovāca
- 12
छन्दस्त्व् इदम् अमध्यंदिनसाच्य् अयं जागतो वातिजागतो वा सर्वं वा इदं जागतं वातिजागतं वा स उ मारुतो मैव शंसिष्टेति
chandastv idam amadhyaṃdinasācy ayaṃ jāgato vātijāgato vā sarvaṃ vā idaṃ jāgataṃ vātijāgataṃ vā sa u māruto maiva śaṃsiṣṭeti
- 13
स होवाचारमाछावाकेत्य् अथ हास्मिन्न् अनुशासनम् ईषे
sa hovācāramāchāvākety atha hāsminn anuśāsanam īṣe
- 14
स होवाचैन्द्रम् एष विष्णुन्यङ्गं शंसत्व् अथ त्वम् एतं होतर् उपरिष्टाद्रौद्र्यै धाय्यायै पुरस्तान्मारुतस्याप्य् अस्याथा इति
sa hovācaindram eṣa viṣṇunyaṅgaṃ śaṃsatv atha tvam etaṃ hotar upariṣṭādraudryai dhāyyāyai purastānmārutasyāpy asyāthā iti
- 15
तद्ध तथा शंसयांचकार तद् इदम् अप्य् एतर्हि तथैव शस्यते
taddha tathā śaṃsayāṃcakāra tad idam apy etarhi tathaiva śasyate

