22 shlokas
- 1
ते हादित्यान् अङ्गिरसो ऽयाजयंस्तेभ्यो याजयद्भ्य इमाम्पृथिवीम्पूर्णां दक्षिणानाम् अददुस्तान् इयम्प्रतिगृहीतातपत्तां न्यवृञ्जन्सा सिंही भूत्वा विजृम्भन्ती जनान् अचरत्तस्याः शोचत्या इमे प्रदराः प्रादीर्यन्त ये ऽस्या इमे प्रदराः समेव हैव ततः पुरा
te hādityān aṅgiraso 'yājayaṃstebhyo yājayadbhya imāmpṛthivīmpūrṇāṃ dakṣiṇānām adadustān iyampratigṛhītātapattāṃ nyavṛñjansā siṃhī bhūtvā vijṛmbhantī janān acarattasyāḥ śocatyā ime pradarāḥ prādīryanta ye 'syā ime pradarāḥ sameva haiva tataḥ purā
- 2
तस्माद् आहुर्न निवृत्तदक्षिणाम्प्रतिगृह्णीयान्नेन्मा शुचा विद्धा शुचा विध्याद् इति
tasmād āhurna nivṛttadakṣiṇāmpratigṛhṇīyānnenmā śucā viddhā śucā vidhyād iti
- 3
यदि त्व् एनाम्प्रतिगृह्णीयाद् अप्रियायैनाम्भ्रातृव्याय दद्यात्परा हैव भवति
yadi tv enāmpratigṛhṇīyād apriyāyaināmbhrātṛvyāya dadyātparā haiva bhavati
- 4
अथ यो ऽसौ तपतीꣳ एषो ऽश्वः श्वेतो रूपं कृत्वाश्वाभिधान्यपिहितेनात्मना प्रतिचक्रम इमं वो नयाम इति स एष देवनीथो ऽनूच्यते
atha yo 'sau tapatīm̐ eṣo 'śvaḥ śveto rūpaṃ kṛtvāśvābhidhānyapihitenātmanā praticakrama imaṃ vo nayāma iti sa eṣa devanītho 'nūcyate
- 5
आदित्या ह जरितर् अङ्गिरोभ्यो दक्षिणाम् अनयन्
ādityā ha jaritar aṅgirobhyo dakṣiṇām anayan
- 6
तां ह जरितर्न प्रत्यायन्न् इति न हि त इमाम्प्रत्यायन्
tāṃ ha jaritarna pratyāyann iti na hi ta imāmpratyāyan
- 7
ताम् उ ह जरितः प्रत्यायन्न् इति प्रति हि ते ऽमुम् आयन्
tām u ha jaritaḥ pratyāyann iti prati hi te 'mum āyan
- 8
तां ह जरितर्न प्रत्यगृभ्णन्न् इति न हि त इमाम्प्रत्यगृभ्णन्
tāṃ ha jaritarna pratyagṛbhṇann iti na hi ta imāmpratyagṛbhṇan
- 9
ताम् उ ह जरितः प्रत्यगृभ्णन्न् इति प्रति हि ते ऽमुम् अगृभ्णन्
tām u ha jaritaḥ pratyagṛbhṇann iti prati hi te 'mum agṛbhṇan
- 10
अहा नेद् असन्न् अविचेतनानीत्य् एष ह वा अह्नां विचेतयिता
ahā ned asann avicetanānīty eṣa ha vā ahnāṃ vicetayitā
- 11
यज्ञा नेद् असन्न् अपुरोगवास इति दक्षिणा वै यज्ञानाम्पुरोगवी यथा ह वा इदम् अनो ऽपुरोगवं रिष्यत्य् एवं हैव यज्ञो ऽदक्षिणो रिष्यति तस्माद् आहुर्दातव्यैव यज्ञे दक्षिणा भवत्य् अप्य् अल्पिकापि
yajñā ned asann apurogavāsa iti dakṣiṇā vai yajñānāmpurogavī yathā ha vā idam ano 'purogavaṃ riṣyaty evaṃ haiva yajño 'dakṣiṇo riṣyati tasmād āhurdātavyaiva yajñe dakṣiṇā bhavaty apy alpikāpi
- 12
उत श्वेत आशुपत्वा
uta śveta āśupatvā
- 13
उतो पद्याभिर्जविष्ठः
uto padyābhirjaviṣṭhaḥ
- 14
उतेम् आशु मानम्पिपर्ति
utem āśu mānampiparti
- 15
आदित्या रुद्रा वसवस्त्वेᄆअते
ādityā rudrā vasavastveᄆate
- 16
इदं राधः प्रतिगृभ्णीह्य् अङ्गिर इति प्रतिग्रहम् एव तद्राधस ऐच्छन्
idaṃ rādhaḥ pratigṛbhṇīhy aṅgira iti pratigraham eva tadrādhasa aicchan
- 17
इदं राधो बृहत्पृथु
idaṃ rādho bṛhatpṛthu
- 18
देवा ददत्व् आ वरम्
devā dadatv ā varam
- 19
तद्वो अस्तु सुचेतनम्
tadvo astu sucetanam
- 20
युष्मे अस्तु दिवे दिवे
yuṣme astu dive dive
- 21
प्रत्य् एव गृभायतेति प्रत्य् एवैनं तद् अजग्रभैषन्
praty eva gṛbhāyateti praty evainaṃ tad ajagrabhaiṣan
- 22
तं वा एतं देवनीथं शंसति पदावग्राहं यथा निविदं तस्योत्तमेन पदेन प्रणौति यथा निविदः
taṃ vā etaṃ devanīthaṃ śaṃsati padāvagrāhaṃ yathā nividaṃ tasyottamena padena praṇauti yathā nividaḥ

