14 shlokas
- 1
कस्तम् इन्द्र त्वावसुं कन्नव्यो अतसीनां कद् ऊ न्व् अस्याकृतम् इति कद्वन्तः प्रगाथा आरम्भणीया अहर् अहः शस्यन्ते
kastam indra tvāvasuṃ kannavyo atasīnāṃ kad ū nv asyākṛtam iti kadvantaḥ pragāthā ārambhaṇīyā ahar ahaḥ śasyante
- 2
को वै प्रजापतिः प्रजापतेर् आप्त्यै
ko vai prajāpatiḥ prajāpater āptyai
- 3
यद् एव कद्वन्तः अन्नं वै कम् अन्नाद्यस्यावरुद्ध्यै
yad eva kadvantaḥ annaṃ vai kam annādyasyāvaruddhyai
- 4
यद्व् एव कद्वन्तः अहर् अहर्वा एते शान्तान्य् अहीनसूक्तान्य् उपयुञ्जाना यन्ति तानि कद्वद्भिः प्रगाथैः शमयन्ति तान्य् एभ्यः शान्तानि कम्भवन्ति तान्य् एनाञ्छान्तानि स्वर्गं लोकम् अभि वहन्ति
yadv eva kadvantaḥ ahar aharvā ete śāntāny ahīnasūktāny upayuñjānā yanti tāni kadvadbhiḥ pragāthaiḥ śamayanti tāny ebhyaḥ śāntāni kambhavanti tāny enāñchāntāni svargaṃ lokam abhi vahanti
- 5
त्रिष्टुभः सूक्तप्रतिपदः शंसेयुः
triṣṭubhaḥ sūktapratipadaḥ śaṃseyuḥ
- 6
ता हैके पुरस्तात्प्रगाथानां शंसन्ति धाय्या इति वदन्तः
tā haike purastātpragāthānāṃ śaṃsanti dhāyyā iti vadantaḥ
- 7
तत्तथा न कुर्यात्
tattathā na kuryāt
- 8
क्षत्रं वै होता विशो होत्राशंसिनः क्षत्रायैव तद्विशम्प्रत्युद्यामिनीं कुर्युः पापवस्यसम्
kṣatraṃ vai hotā viśo hotrāśaṃsinaḥ kṣatrāyaiva tadviśampratyudyāminīṃ kuryuḥ pāpavasyasam
- 9
त्रिष्टुभो म इमाः सूक्तप्रतिपद इत्य् एव विद्यात्
triṣṭubho ma imāḥ sūktapratipada ity eva vidyāt
- 10
तद्यथा समुद्रम्प्रप्लवेरन्न् एवं हैव ते प्रप्लवन्ते ये संवत्सरं वा द्वादशाहं वासते तद्यथा सैरावतीं नावम्पारकामाः समारोहेयुर् एवम् एवैतास्त्रिष्टुभः समारोहन्ति
tadyathā samudrampraplaverann evaṃ haiva te praplavante ye saṃvatsaraṃ vā dvādaśāhaṃ vāsate tadyathā sairāvatīṃ nāvampārakāmāḥ samāroheyur evam evaitāstriṣṭubhaḥ samārohanti
- 11
न ह वा एतच्छन्दो गमयित्वा स्वर्गं लोकम् उपावर्तते वीर्यवत्तमं हि
na ha vā etacchando gamayitvā svargaṃ lokam upāvartate vīryavattamaṃ hi
- 12
ताभ्यो न व्याह्वयीत समानं हि छन्दो ऽथो नेद्धाय्याः करवाणीति
tābhyo na vyāhvayīta samānaṃ hi chando 'tho neddhāyyāḥ karavāṇīti
- 13
यद् एनाः शंसन्ति प्रज्ञाताभिः सूक्तप्रतिपद्भिः सूक्तानि समारोहामेति
yad enāḥ śaṃsanti prajñātābhiḥ sūktapratipadbhiḥ sūktāni samārohāmeti
- 14
यद् एवैनाः शंसन्तीन्द्रम् एवैताभिर्निह्वयन्ते यथर्षभं वाशितायै यद्व् एवैनाः शंसन्त्य् अहीनस्य संतत्या अहीनम् एव तत्संतन्वन्ति
yad evaināḥ śaṃsantīndram evaitābhirnihvayante yatharṣabhaṃ vāśitāyai yadv evaināḥ śaṃsanty ahīnasya saṃtatyā ahīnam eva tatsaṃtanvanti

