16 shlokas
- 1
देवा वै वले गाः पर्यपश्यंस्ता यज्ञेनैवेप्संस्ताः षष्ठेनाह्नाप्नुवंस्ते प्रातःसवने नभाकेन वलम् अनभयंस्तं यद् अनभयान् अश्रथयन्न् एवैनं तत्त उ तृतीयसवने वज्रेण वालखिल्याभिर्वाचः कूटेनैकपदया वलं विरुज्य गा उदाजन्
devā vai vale gāḥ paryapaśyaṃstā yajñenaivepsaṃstāḥ ṣaṣṭhenāhnāpnuvaṃste prātaḥsavane nabhākena valam anabhayaṃstaṃ yad anabhayān aśrathayann evainaṃ tatta u tṛtīyasavane vajreṇa vālakhilyābhirvācaḥ kūṭenaikapadayā valaṃ virujya gā udājan
- 2
तथैवैतद्यजमानाः प्रातःसवने नभाकेन वलं नभयन्ति तं यन्नभयन्तीं श्रथयन्त्य् एवैनं तत्तस्माद्धोत्रकाः प्रातःसवने नाभाकांस्तृचाञ्छंसन्ति
tathaivaitadyajamānāḥ prātaḥsavane nabhākena valaṃ nabhayanti taṃ yannabhayantīṃ śrathayanty evainaṃ tattasmāddhotrakāḥ prātaḥsavane nābhākāṃstṛcāñchaṃsanti
- 3
यः ककुभो निधारय इति मैत्रावरुणः पूर्वीष्ट इन्द्रोपमातय इति ब्राह्मणाच्छंसी ता हि मध्यम्भराणाम् इत्य् अछावाकः
yaḥ kakubho nidhāraya iti maitrāvaruṇaḥ pūrvīṣṭa indropamātaya iti brāhmaṇācchaṃsī tā hi madhyambharāṇām ity achāvākaḥ
- 4
त उ तृतीयसवने वज्रेण वालखिल्याभिर्वाचः कूटेनैकपदया वलं विरुज्य गा आप्नुवन्ति
ta u tṛtīyasavane vajreṇa vālakhilyābhirvācaḥ kūṭenaikapadayā valaṃ virujya gā āpnuvanti
- 5
पच्छः प्रथमं षड्वालखिल्यानां सूक्तानि विहरत्य् अर्धर्चशो द्वितीयम् ऋक्शस्तृतीयं स पच्छो विहरन्प्रगाथे प्रगाथ एवैकपदां दध्यात्स वाचः कूटः
pacchaḥ prathamaṃ ṣaḍvālakhilyānāṃ sūktāni viharaty ardharcaśo dvitīyam ṛkśastṛtīyaṃ sa paccho viharanpragāthe pragātha evaikapadāṃ dadhyātsa vācaḥ kūṭaḥ
- 6
ता एताः पञ्चैकपदाश्चतस्रो दशमाद् अह्न एका महाव्रतात्
tā etāḥ pañcaikapadāścatasro daśamād ahna ekā mahāvratāt
- 7
अथाष्टाक्षराणि माहानामनानि पदानि तेषां यावद्भिः संपद्येत तावन्ति शंसेन्नेतराण्य् आद्रियेत
athāṣṭākṣarāṇi māhānāmanāni padāni teṣāṃ yāvadbhiḥ saṃpadyeta tāvanti śaṃsennetarāṇy ādriyeta
- 8
अथार्धर्चशो विहरंस्ताश्चैवैकपदाः शंसेत्तानि चैवाष्टाक्षराणि माहानामनानि पदानि
athārdharcaśo viharaṃstāścaivaikapadāḥ śaṃsettāni caivāṣṭākṣarāṇi māhānāmanāni padāni
- 9
अथ ऋक्शो विहरंस्ताश्चैवैकपदाः शंसेत्तानि चैवाष्टाक्षराणि माहानामनानि पदानि
atha ṛkśo viharaṃstāścaivaikapadāḥ śaṃsettāni caivāṣṭākṣarāṇi māhānāmanāni padāni
- 10
स यत्प्रथमं षड्वालखिल्यानां सूक्तानि विहरति प्राणं च तद्वाचं च विहरति यद्द्वितीयं चक्षुश्च तन्मनश्च विहरति यत्तृतीयं श्रोत्रं च तद् आत्मानं च विहरति तद् उपाप्तो विहारे काम उपाप्तो वज्रे वालखिल्यासूपाप्तो वाचः कूट एकपदायाम् उपाप्तः प्राणक्ᄆप्त्याम्
sa yatprathamaṃ ṣaḍvālakhilyānāṃ sūktāni viharati prāṇaṃ ca tadvācaṃ ca viharati yaddvitīyaṃ cakṣuśca tanmanaśca viharati yattṛtīyaṃ śrotraṃ ca tad ātmānaṃ ca viharati tad upāpto vihāre kāma upāpto vajre vālakhilyāsūpāpto vācaḥ kūṭa ekapadāyām upāptaḥ prāṇakᄆptyām
- 11
अविहृतान् एव चतुर्थम्प्रगाथाञ्छंसति पशवो वै प्रगाथाः पशूनाम् अवरुद्ध्यै
avihṛtān eva caturthampragāthāñchaṃsati paśavo vai pragāthāḥ paśūnām avaruddhyai
- 12
नात्रैकपदां व्यवदध्यात्
nātraikapadāṃ vyavadadhyāt
- 13
यद् अत्रैकपदां व्यवदध्याद्वाचः कूटेन यजमानात्पशून्निर्हण्याद्य एनं तत्र ब्रूयाद्वाचः कूटेन यजमानात्पशून्निरवधीर् अपशुम् एनम् अकर् इति शश्वत्तथा स्यात्
yad atraikapadāṃ vyavadadhyādvācaḥ kūṭena yajamānātpaśūnnirhaṇyādya enaṃ tatra brūyādvācaḥ kūṭena yajamānātpaśūnniravadhīr apaśum enam akar iti śaśvattathā syāt
- 14
तस्मात्तत्रैकपदां न व्यवदध्यात्
tasmāttatraikapadāṃ na vyavadadhyāt
- 15
व्य् एवोत्तमे सूक्ते पर्यस्यति स एव तयोर्विहारः
vy evottame sūkte paryasyati sa eva tayorvihāraḥ
- 16
तद् एतत्सौबलाय सर्पिर्वात्सिः शशंस स होवाच भूयिष्ठान् अहं यजमाने पशून्पर्यग्रहैषम् अकनिष्ठा उ माम् आगमिष्यन्तीति तस्मै ह यथा महद्भ्य ऋत्विग्भ्य एवं निनाय तद् एतत्पशव्यं च स्वर्ग्यं च शस्त्रं तस्माद् एतच्छंसति
tad etatsaubalāya sarpirvātsiḥ śaśaṃsa sa hovāca bhūyiṣṭhān ahaṃ yajamāne paśūnparyagrahaiṣam akaniṣṭhā u mām āgamiṣyantīti tasmai ha yathā mahadbhya ṛtvigbhya evaṃ nināya tad etatpaśavyaṃ ca svargyaṃ ca śastraṃ tasmād etacchaṃsati

