10 shlokas
- 1
अथाह यद् ऐन्द्रो वै यज्ञो ऽथ कस्माद्द्वावेव प्रातःसवने प्रस्थितानाम्प्रत्यक्षाद् ऐन्द्रीभ्यां यजतो होता चैव ब्राह्मणाच्छंसी चेदं ते सोम्यम्मध्विति होता यजतीन्द्र त्वा वृषभं वयं इति ब्राह्मणाच्छंसी नानादेवत्याभिर् इतरे कथं तेषाम् ऐन्द्र्यो भवन्तीति
athāha yad aindro vai yajño 'tha kasmāddvāveva prātaḥsavane prasthitānāmpratyakṣād aindrībhyāṃ yajato hotā caiva brāhmaṇācchaṃsī cedaṃ te somyammadhviti hotā yajatīndra tvā vṛṣabhaṃ vayaṃ iti brāhmaṇācchaṃsī nānādevatyābhir itare kathaṃ teṣām aindryo bhavantīti
- 2
मित्रं वयं हवामह इति मैत्रावरुणो यजति वरुणं सोमपीतय इति यद्वै किंच पीतवत्पदं तद् ऐन्द्रं रूपं तेनेन्द्रम्प्रीणाति
mitraṃ vayaṃ havāmaha iti maitrāvaruṇo yajati varuṇaṃ somapītaya iti yadvai kiṃca pītavatpadaṃ tad aindraṃ rūpaṃ tenendramprīṇāti
- 3
मरुतो यस्य हि क्षय इति पोता यजति स सुगोपातमो जन इतीन्द्रो वै गोपास्तद् ऐन्द्रं रूपं तेनेन्द्रम्प्रीणाति
maruto yasya hi kṣaya iti potā yajati sa sugopātamo jana itīndro vai gopāstad aindraṃ rūpaṃ tenendramprīṇāti
- 4
अग्ने पत्नीर् इहा वहेति नेष्टा यजति त्वष्टारं सोमपीतय इतीन्द्रो वै त्वष्टा तद् ऐन्द्रं रूपं तेनेन्द्रम्प्रीणाति
agne patnīr ihā vaheti neṣṭā yajati tvaṣṭāraṃ somapītaya itīndro vai tvaṣṭā tad aindraṃ rūpaṃ tenendramprīṇāti
- 5
उक्षान्नाय वशान्नायेत्य् आग्नीध्रो यजति सोमपृष्ठाय वेधस इतीन्द्रो वै वेधास्तद् ऐन्द्रं रूपं तेनेन्द्रम्प्रीणाति
ukṣānnāya vaśānnāyety āgnīdhro yajati somapṛṣṭhāya vedhasa itīndro vai vedhāstad aindraṃ rūpaṃ tenendramprīṇāti
- 6
प्रातर्यावभिर् आ गतं देवेभिर्जेन्यावसू इन्द्राग्नी सोमपीतय इति स्वयं समृद्धाछावाकस्य
prātaryāvabhir ā gataṃ devebhirjenyāvasū indrāgnī somapītaya iti svayaṃ samṛddhāchāvākasya
- 7
एवम् उ हैता ऐन्द्र्यो भवन्ति
evam u haitā aindryo bhavanti
- 8
यन्नानादेवत्यास्तेनान्या देवताः प्रीणाति
yannānādevatyāstenānyā devatāḥ prīṇāti
- 9
यद् उ गायत्र्यस्तेनाग्नेय्यः
yad u gāyatryastenāgneyyaḥ
- 10
एतद् उ हैताभिस्त्रयम् उपाप्नोति
etad u haitābhistrayam upāpnoti

