20 shlokas
- 1
ऐतशप्रलापं शंसति
aitaśapralāpaṃ śaṃsati
- 2
ऐतशो ह वै मुनिर् अग्नेर् आयुर्ददर्श यज्ञस्यायातयामम् इति हैक आहुः सो ऽब्रवीत्पुत्रान्पुत्रका अग्नेर् आयुर् अदर्शं तद् अभिलपिष्यामि यत्किंच वदामि तन्मे मा परिगातेति स प्रत्यपद्यतैता अश्वा आप्लवन्ते प्रतीपम्प्रातिसत्वनम् इति
aitaśo ha vai munir agner āyurdadarśa yajñasyāyātayāmam iti haika āhuḥ so 'bravītputrānputrakā agner āyur adarśaṃ tad abhilapiṣyāmi yatkiṃca vadāmi tanme mā parigāteti sa pratyapadyataitā aśvā āplavante pratīpamprātisatvanam iti
- 3
तस्याभ्यग्निर् ऐतशायन एत्याकाले ऽभिहाय मुखम् अप्यगृह्णाद् अदृपन्नः पितेति
tasyābhyagnir aitaśāyana etyākāle 'bhihāya mukham apyagṛhṇād adṛpannaḥ piteti
- 4
तं होवाचापेह्य् अलसो ऽभूर्यो मे वाचम् अवधीः शतायुं गाम् अकरिष्यं सहस्रायुम्पुरुषम्पापिष्ठां ते प्रजां करोमि यो मेत्थम् असक्था इति
taṃ hovācāpehy alaso 'bhūryo me vācam avadhīḥ śatāyuṃ gām akariṣyaṃ sahasrāyumpuruṣampāpiṣṭhāṃ te prajāṃ karomi yo mettham asakthā iti
- 5
तस्माद् आहुर् अभ्यग्नय ऐतशायना और्वाणाम्पापिष्ठा इति
tasmād āhur abhyagnaya aitaśāyanā aurvāṇāmpāpiṣṭhā iti
- 6
तं हैके भूयांसं शंसन्ति
taṃ haike bhūyāṃsaṃ śaṃsanti
- 7
स न निषेधेद्यावत्कामं शंसेत्य् एव ब्रूयाद् आयुर्वा ऐतशप्रलापः
sa na niṣedhedyāvatkāmaṃ śaṃsety eva brūyād āyurvā aitaśapralāpaḥ
- 8
आयुर् एव तद्यजमानस्य प्रतारयति य एवं वेद
āyur eva tadyajamānasya pratārayati ya evaṃ veda
- 9
यद् एवैतशप्रलापाः
yad evaitaśapralāpāḥ
- 10
छन्दसां हैष रसो यद् ऐतशप्रलापश्छन्दस्स्व् एव तद्रसं दधाति
chandasāṃ haiṣa raso yad aitaśapralāpaśchandassv eva tadrasaṃ dadhāti
- 11
सरसैर्हास्य छन्दोभिर् इष्टम्भवति सरसैश्छन्दोभिर्यज्ञं तनुते य एवं वेद
sarasairhāsya chandobhir iṣṭambhavati sarasaiśchandobhiryajñaṃ tanute ya evaṃ veda
- 12
यद्व् एवैतशप्रलापाः
yadv evaitaśapralāpāḥ
- 13
अयातयामा वा अक्षितिर् ऐतशप्रलापो ऽयातयामा मे यज्ञे ऽसद् अक्षितिर्मे यज्ञे ऽसदिति
ayātayāmā vā akṣitir aitaśapralāpo 'yātayāmā me yajñe 'sad akṣitirme yajñe 'saditi
- 14
तं वा एतम् ऐतशप्रलापं शंसति पदावग्राहं यथा निविदम्
taṃ vā etam aitaśapralāpaṃ śaṃsati padāvagrāhaṃ yathā nividam
- 15
तस्योत्तमेन पदेन प्रणौति यथा निविदः
tasyottamena padena praṇauti yathā nividaḥ
- 16
प्रवल्हिकाः शंसति प्रवल्हिकाभिर्वै देवा असुरान्प्रवल्ह्याथैनान् अत्यायंस्तथैवैतद्यजमानाः प्रवल्हिकाभिर् एवाप्रियम्भ्रातृव्यम्प्रवल्ह्याथैनम् अतियन्ति
pravalhikāḥ śaṃsati pravalhikābhirvai devā asurānpravalhyāthainān atyāyaṃstathaivaitadyajamānāḥ pravalhikābhir evāpriyambhrātṛvyampravalhyāthainam atiyanti
- 17
ता अर्धर्चशः शंसति प्रतिष्ठाया एव
tā ardharcaśaḥ śaṃsati pratiṣṭhāyā eva
- 18
आजिज्ञासेन्याः शंसत्य् आजिज्ञासेन्याभिर्वै देवा असुरान् आज्ञायाथैनान् अत्यायंस्तथैवैतद्यजमाना आजिज्ञासेन्याभिर् एवाप्रियम्भ्रातृव्यम् आज्ञायाथैनम् अतियन्ति ता अर्धर्चशः शंसति प्रतिष्ठाया एव
ājijñāsenyāḥ śaṃsaty ājijñāsenyābhirvai devā asurān ājñāyāthainān atyāyaṃstathaivaitadyajamānā ājijñāsenyābhir evāpriyambhrātṛvyam ājñāyāthainam atiyanti tā ardharcaśaḥ śaṃsati pratiṣṭhāyā eva
- 19
प्रतिराधं शंसति प्रतिराधेन वै देवा असुरान्प्रतिराध्याथैनान् अत्यायंस्तथैवैतद्यजमानाः प्रतिराधेनैवाप्रियम्भ्रातृव्यम्प्रतिराध्याथैनम् अतियन्ति
pratirādhaṃ śaṃsati pratirādhena vai devā asurānpratirādhyāthainān atyāyaṃstathaivaitadyajamānāḥ pratirādhenaivāpriyambhrātṛvyampratirādhyāthainam atiyanti
- 20
अतिवादं शंसत्य् अतिवादेन वै देवा असुरान् अत्युद्याथैनान् अत्यायंस्तथैवैतद्यजमाना अतिवादेनैवाप्रियम्भ्रातृव्यम् अत्युद्याथैनम् अतियन्ति तम् अर्धर्चशः शंसति प्रतिष्ठाया एव
ativādaṃ śaṃsaty ativādena vai devā asurān atyudyāthainān atyāyaṃstathaivaitadyajamānā ativādenaivāpriyambhrātṛvyam atyudyāthainam atiyanti tam ardharcaśaḥ śaṃsati pratiṣṭhāyā eva

