15 shlokas
- 1
इहोप यात शवसो नपात इति तृतीयसवन उन्नीयमानेभ्यो ऽन्वाह वृषण्वतीः पीतवतीः सुतवतीर्मद्वती रूपसमृद्धास्ता ऐन्द्रार्भव्यो भवन्ति
ihopa yāta śavaso napāta iti tṛtīyasavana unnīyamānebhyo 'nvāha vṛṣaṇvatīḥ pītavatīḥ sutavatīrmadvatī rūpasamṛddhāstā aindrārbhavyo bhavanti
- 2
तद् आहुर्यन्नार्भवीषु स्तुवते ऽथ कस्माद् आर्भवः पवमान इत्य् आचक्षत इति
tad āhuryannārbhavīṣu stuvate 'tha kasmād ārbhavaḥ pavamāna ity ācakṣata iti
- 3
प्रजापतिर्वै पितर्भून्मर्त्यान्सतो ऽमर्त्यान्कृत्वा तृतीयसवन आभजत्तस्मान्नार्भवीषु स्तुवते ऽथार्भवः पवमान इत्य् आचक्षते
prajāpatirvai pitarbhūnmartyānsato 'martyānkṛtvā tṛtīyasavana ābhajattasmānnārbhavīṣu stuvate 'thārbhavaḥ pavamāna ity ācakṣate
- 4
अथाह यद्यथाछन्दसम्पूर्वयोः सवनयोर् अन्वाह गायत्रीः प्रातःसवने त्रिष्टुभो माध्यंदिने ऽथ कस्माज्जागते सति तृतीयसवने त्रिष्टुभो ऽन्वाहेति
athāha yadyathāchandasampūrvayoḥ savanayor anvāha gāyatrīḥ prātaḥsavane triṣṭubho mādhyaṃdine 'tha kasmājjāgate sati tṛtīyasavane triṣṭubho 'nvāheti
- 5
धीतरसं वै तृतीयसवनम् अथैतद् अधीतरसं शुक्रियं छन्दो यत्त्रिष्टुप्सवनस्य सरसताया इति ब्रूयाद् अथो इन्द्रं एवैतत्सवने ऽन्वाभजतीति
dhītarasaṃ vai tṛtīyasavanam athaitad adhītarasaṃ śukriyaṃ chando yattriṣṭupsavanasya sarasatāyā iti brūyād atho indraṃ evaitatsavane 'nvābhajatīti
- 6
अथाह यद् ऐन्द्रार्भवं वै तृतीयसवनम् अथ कस्माद् एष एव तृतीयसवने प्रस्थितानाम्प्रत्यक्षाद् ऐन्द्रार्भव्या यजतीन्द्र ऋभुभिर्वाजवद्भिः समुक्षितम् इति होतैव नानादेवत्याभिर् इतरे कथं तेषाम् ऐन्द्रार्भव्यो भवन्तीति
athāha yad aindrārbhavaṃ vai tṛtīyasavanam atha kasmād eṣa eva tṛtīyasavane prasthitānāmpratyakṣād aindrārbhavyā yajatīndra ṛbhubhirvājavadbhiḥ samukṣitam iti hotaiva nānādevatyābhir itare kathaṃ teṣām aindrārbhavyo bhavantīti
- 7
इन्द्रावरुणा सुतपाव् इमं सुतम् इति मैत्रावरुणो यजति युवो रथो अध्वरं देववीतय इति बहूनि वाह तद् ऋभूणाम्रूपम्
indrāvaruṇā sutapāv imaṃ sutam iti maitrāvaruṇo yajati yuvo ratho adhvaraṃ devavītaya iti bahūni vāha tad ṛbhūṇāmrūpam
- 8
इन्द्रश्च सोमम्पिबतम्बृहस्पत इति ब्राह्मणाच्छंसी यजत्य् आ वां विशन्त्व् इन्दवः स्वाभुव इति बहूनि वाह तद् ऋभूणां रूपम्
indraśca somampibatambṛhaspata iti brāhmaṇācchaṃsī yajaty ā vāṃ viśantv indavaḥ svābhuva iti bahūni vāha tad ṛbhūṇāṃ rūpam
- 9
आ वो वहन्तु सप्तयो रघुष्यद इति पोता यजति रघुपत्वानः प्र जिगात बाहुभिर् इति बहूनि वाह तद् ऋभूणां रूपम्
ā vo vahantu saptayo raghuṣyada iti potā yajati raghupatvānaḥ pra jigāta bāhubhir iti bahūni vāha tad ṛbhūṇāṃ rūpam
- 10
अमेव नः सुहवा आ हि गन्तनेति नेष्टा यजति गन्तनेति बहूनि वाह तद् ऋभूणां रूपम्
ameva naḥ suhavā ā hi gantaneti neṣṭā yajati gantaneti bahūni vāha tad ṛbhūṇāṃ rūpam
- 11
इन्द्राविष्णू पिबतम्मध्वो अस्येत्य् अछावाको यजत्य् आ वाम् अन्धांसि मदिराण्य् अग्मन्न् इति बहूनि वाह तद् ऋभूणां रूपम्
indrāviṣṇū pibatammadhvo asyety achāvāko yajaty ā vām andhāṃsi madirāṇy agmann iti bahūni vāha tad ṛbhūṇāṃ rūpam
- 12
इमं स्तोमम् अर्हते जातवेदस इत्य् आग्नीध्रो यजति रथम् इव सं महेमा मनीषयेति बहूनि वाह तद् ऋभूणां रूपम्
imaṃ stomam arhate jātavedasa ity āgnīdhro yajati ratham iva saṃ mahemā manīṣayeti bahūni vāha tad ṛbhūṇāṃ rūpam
- 13
एवम् उ हैता ऐन्द्रार्भव्यो भवन्ति
evam u haitā aindrārbhavyo bhavanti
- 14
यन्नानादेवत्यास्तेनान्या देवताः प्रीणाति
yannānādevatyāstenānyā devatāḥ prīṇāti
- 15
यद् उ जगत्प्रासाहा जागतं वै तृतीयसवनं तृतीयसवनस्यैव समृद्ध्यै
yad u jagatprāsāhā jāgataṃ vai tṛtīyasavanaṃ tṛtīyasavanasyaiva samṛddhyai

