14 shlokas
- 1
असावि देवं गोऋजीकम् अन्ध इति मध्यंदिन उन्नीयमानेभ्यो ऽन्वाह वृषण्वतीः पीतवतीः सुतवतीर्मद्वती रूपसमृद्धाः
asāvi devaṃ goṛjīkam andha iti madhyaṃdina unnīyamānebhyo 'nvāha vṛṣaṇvatīḥ pītavatīḥ sutavatīrmadvatī rūpasamṛddhāḥ
- 2
ऐन्द्रीर् अन्वाहैन्द्रो वै यज्ञस्त्रिष्टुभो ऽन्वाह त्रैष्टुभम्वै माध्यंदिनं सवनम्
aindrīr anvāhaindro vai yajñastriṣṭubho 'nvāha traiṣṭubhamvai mādhyaṃdinaṃ savanam
- 3
तद् आहुर्यत्तृतीयसवनस्यैव रूपम्मद्वद् अथ कस्मान्मध्यंदिने मद्वतीर् अनु चाह यजन्ति चाभिर् इति
tad āhuryattṛtīyasavanasyaiva rūpammadvad atha kasmānmadhyaṃdine madvatīr anu cāha yajanti cābhir iti
- 4
माद्यन्तीव वै मध्यंदिने देवताः सम् एव तृतीयसवने मादयन्ते तस्मान्मध्यंदिने मद्वतीर् अनु चाह यजन्ति चाभिः
mādyantīva vai madhyaṃdine devatāḥ sam eva tṛtīyasavane mādayante tasmānmadhyaṃdine madvatīr anu cāha yajanti cābhiḥ
- 5
ते वै खलु सर्व एव माध्यंदिने प्रस्थितानाम्प्रत्यक्षाद् ऐन्द्रीभिर्यजन्ति
te vai khalu sarva eva mādhyaṃdine prasthitānāmpratyakṣād aindrībhiryajanti
- 6
अभितृण्णवतीभिर् एके
abhitṛṇṇavatībhir eke
- 7
पिबा सोमम् अभि यम् उग्र तर्द इति होता यजति
pibā somam abhi yam ugra tarda iti hotā yajati
- 8
स ईं पाहि य ऋजीषी तरुत्र इति मैत्रावरुणो यजति
sa īṃ pāhi ya ṛjīṣī tarutra iti maitrāvaruṇo yajati
- 9
एवा पाहि प्रत्नथा मन्दतु त्वेति ब्राह्मणाच्छंसी यजति
evā pāhi pratnathā mandatu tveti brāhmaṇācchaṃsī yajati
- 10
अर्वाङ् एहि सोमकामं त्वाहुर् इति पोता यजति
arvāṅ ehi somakāmaṃ tvāhur iti potā yajati
- 11
तवायं सोमस्त्वम् एह्य् अर्वाङ् इति नेष्टा यजति
tavāyaṃ somastvam ehy arvāṅ iti neṣṭā yajati
- 12
इन्द्राय सोमाः प्रदिवो विदाना इत्य् अछावाको यजति
indrāya somāḥ pradivo vidānā ity achāvāko yajati
- 13
आपूर्णो अस्य कलशः स्वाहेत्य् आग्नीध्रो यजति
āpūrṇo asya kalaśaḥ svāhety āgnīdhro yajati
- 14
तासाम् एता अभितृण्णवत्यो भवन्तीन्द्रो वै प्रातःसवने न व्यजयत स एताभिर् एव माध्यंदिनं सवनम् अभ्यतृणद्यद् अभ्यतृणत्तस्माद् एता अभितृण्णवत्यो भवन्ति
tāsām etā abhitṛṇṇavatyo bhavantīndro vai prātaḥsavane na vyajayata sa etābhir eva mādhyaṃdinaṃ savanam abhyatṛṇadyad abhyatṛṇattasmād etā abhitṛṇṇavatyo bhavanti

