13 shlokas
- 1
तद् आहुः संशंसेत्षष्ठे ऽहान्न सम्शंसैत् इति
tad āhuḥ saṃśaṃsetṣaṣṭhe 'hānna samśaṃsait iti
- 2
संशंसेद् इत्य् आहुः
saṃśaṃsed ity āhuḥ
- 3
कथम् अन्येष्व् अहःसु संशंसति कथम् अत्र न संशंसेद् इति
katham anyeṣv ahaḥsu saṃśaṃsati katham atra na saṃśaṃsed iti
- 4
अथो खल्व् आहुर्नैव संशंसेत्
atho khalv āhurnaiva saṃśaṃset
- 5
स्वर्गो वै लोकः षष्ठम् अहर् असमायी वै स्वर्गो लोकः कश्चिद्वै स्वर्गे लोके समेतीति स यत्संशंसेत्समानं तत्कुर्याद् अथ यन्न संशंसतीꣳ तत्स्वर्गस्य लोकस्य रूपं तस्मान्न संशंसेद्यद् एव न संशंसतीꣳ
svargo vai lokaḥ ṣaṣṭham ahar asamāyī vai svargo lokaḥ kaścidvai svarge loke sametīti sa yatsaṃśaṃsetsamānaṃ tatkuryād atha yanna saṃśaṃsatīm̐ tatsvargasya lokasya rūpaṃ tasmānna saṃśaṃsedyad eva na saṃśaṃsatīm̐
- 6
आत्मा वै स्तोत्रियः प्राणा वालखिल्याः स यत्संशंसेद् एताभ्यां देवताभ्यां यजमानस्य प्राणान्वीयाद्य एनं तत्र ब्रूयाद् एताभ्यां देवताभ्यां यजमानस्य प्राणान्व्यगात्प्राण एनं हास्यतीति शश्वत्तथा स्यात्तस्मान्न संशंसेत्
ātmā vai stotriyaḥ prāṇā vālakhilyāḥ sa yatsaṃśaṃsed etābhyāṃ devatābhyāṃ yajamānasya prāṇānvīyādya enaṃ tatra brūyād etābhyāṃ devatābhyāṃ yajamānasya prāṇānvyagātprāṇa enaṃ hāsyatīti śaśvattathā syāttasmānna saṃśaṃset
- 7
स यद् ईक्षेताशंसिषं वालखिल्या हन्त पुरस्ताद्दूरोहणस्य संशंसानीति नो एव तस्याशाम् इयात्
sa yad īkṣetāśaṃsiṣaṃ vālakhilyā hanta purastāddūrohaṇasya saṃśaṃsānīti no eva tasyāśām iyāt
- 8
तं यदि दर्प एव विन्देद् उपरिष्टाद्दूरोहणस्यापि बहूनि शतानि शंसेद्यस्यो तत्कामाय तथा कुर्याद् अत्रैव तद् उपाप्तम्
taṃ yadi darpa eva vinded upariṣṭāddūrohaṇasyāpi bahūni śatāni śaṃsedyasyo tatkāmāya tathā kuryād atraiva tad upāptam
- 9
ऐन्द्र्यो वालखिल्यास्तासां द्वादशाक्षराणि पदानि तत्र स काम उपाप्तो य ऐन्द्रे जागते ऽथेदम् ऐन्द्रावरुणं सूक्तम् ऐन्द्रावरुणी परिधानीया तस्मान्न संशंसेत्
aindryo vālakhilyāstāsāṃ dvādaśākṣarāṇi padāni tatra sa kāma upāpto ya aindre jāgate 'thedam aindrāvaruṇaṃ sūktam aindrāvaruṇī paridhānīyā tasmānna saṃśaṃset
- 10
तद् आहुर्यथा वाव स्तोत्रम् एवं शस्त्रं विहृता वालखिल्याः शस्यन्ते विहृतां स्तोत्राम् अविहृताम् इति
tad āhuryathā vāva stotram evaṃ śastraṃ vihṛtā vālakhilyāḥ śasyante vihṛtāṃ stotrām avihṛtām iti
- 11
विहृतम् इति ब्रूयाद् अष्टाक्षरेण द्वादशाक्षरम् इति
vihṛtam iti brūyād aṣṭākṣareṇa dvādaśākṣaram iti
- 12
तद् आहुर्यथा वाव शस्त्रम् एवं याज्या तिस्रो देवताः शस्यन्ते ऽग्निरिन्द्रो वरुण इत्य् अथैन्द्रावरुण्या यजति कथम् अग्निर् अनन्तरित इति
tad āhuryathā vāva śastram evaṃ yājyā tisro devatāḥ śasyante 'gnirindro varuṇa ity athaindrāvaruṇyā yajati katham agnir anantarita iti
- 13
यो वा अग्निः स वरुणस्तद् अप्य् एतद् ऋषिणोक्तं त्वम् अग्ने वरुणो जायसे यद् इति तद्यद् एवैन्द्रावरुण्या यजति तेनाग्निर् अनन्तरितो ऽनन्तरितः
yo vā agniḥ sa varuṇastad apy etad ṛṣiṇoktaṃ tvam agne varuṇo jāyase yad iti tadyad evaindrāvaruṇyā yajati tenāgnir anantarito 'nantaritaḥ

