14 shlokas
- 1
अथाह यद्वैश्वदेवं वै तृतीयसवनम् अथ कस्माद् एतान्य् ऐन्द्राणि जागतानि सूक्तानि तृतीयसवन आरम्भणीयानि शस्यन्त इतीन्द्रम् एवैतैर् आरभ्य यन्तीति ब्रूयाद् अथो यज्जागतं वै तृतीयसवनं तज्जगत्काम्यैव तद्यत्किंचात ऊर्ध्वं छन्दः शस्यते तद्ध सर्वं जागतम्भवत्य् एतानि चेद् ऐन्द्राणि जागतानि सूक्तानि तृतीयसवन आरम्भणीयानि शस्यन्ते
athāha yadvaiśvadevaṃ vai tṛtīyasavanam atha kasmād etāny aindrāṇi jāgatāni sūktāni tṛtīyasavana ārambhaṇīyāni śasyanta itīndram evaitair ārabhya yantīti brūyād atho yajjāgataṃ vai tṛtīyasavanaṃ tajjagatkāmyaiva tadyatkiṃcāta ūrdhvaṃ chandaḥ śasyate taddha sarvaṃ jāgatambhavaty etāni ced aindrāṇi jāgatāni sūktāni tṛtīyasavana ārambhaṇīyāni śasyante
- 2
अथ त्रैष्टुभम् अछावाको ऽन्ततः शंसति सं वां कर्मणेति यद् एव पनाय्यं कर्म तद् एतद् अभिवदति
atha traiṣṭubham achāvāko 'ntataḥ śaṃsati saṃ vāṃ karmaṇeti yad eva panāyyaṃ karma tad etad abhivadati
- 3
सम् इषेत्य् अन्नं वा इषो ऽन्नाद्यस्यावरुद्ध्यै
sam iṣety annaṃ vā iṣo 'nnādyasyāvaruddhyai
- 4
अरिष्टैर्नः पथिभिः पारयन्तेति स्वस्तिताया एवैतद् अहरहः शंसति
ariṣṭairnaḥ pathibhiḥ pārayanteti svastitāyā evaitad aharahaḥ śaṃsati
- 5
अथाह यज्जागतं वै तृतीयसवनम् अथ कस्माद् एषां त्रिष्टुभः परिधानीया भवन्तीति वीर्यं वै त्रिष्टुब्वीर्य एव तद् अन्ततः प्रतितिष्ठन्तो यन्ति
athāha yajjāgataṃ vai tṛtīyasavanam atha kasmād eṣāṃ triṣṭubhaḥ paridhānīyā bhavantīti vīryaṃ vai triṣṭubvīrya eva tad antataḥ pratitiṣṭhanto yanti
- 6
इयम् इन्द्रं वरुणम् अष्ट मे गीर् इति मैत्रावरुणस्य बृहस्पतिर्नः परि पातु पश्चाद् इति ब्राह्मणाच्छंसिन उभा जिग्यथुर् इत्य् अछावाकस्य
iyam indraṃ varuṇam aṣṭa me gīr iti maitrāvaruṇasya bṛhaspatirnaḥ pari pātu paścād iti brāhmaṇācchaṃsina ubhā jigyathur ity achāvākasya
- 7
उभौ हि तौ जिग्यतुः
ubhau hi tau jigyatuḥ
- 8
न परा जयेथे न परा जिग्य इति
na parā jayethe na parā jigya iti
- 9
न हि तयोः कतरश्चन पराजिग्ये
na hi tayoḥ kataraścana parājigye
- 10
इन्द्रश्च विष्णो यद् अपस्पृधेथां त्रेधा सहस्रं वि तद् ऐरयेथाम् इति
indraśca viṣṇo yad apaspṛdhethāṃ tredhā sahasraṃ vi tad airayethām iti
- 11
इन्द्रश्च ह वै विष्णुश्चासुरैर्युयुधाते तान्ह स्म जित्वोचतुः कल्पामहा इति ते ह तथेत्य् असुरा ऊचुः सो ऽब्रवीद् इन्द्रो यावद् एवायं विष्णुस्त्रिर्विक्रमते तावद् अस्माकम् अथ युष्माकम् इतरद् इति स इमांल्लोकान्विचक्रमे ऽथो वेदान् अथो वाचं तद् आहुः किं तत्सहस्रम् इतीमे लोका इमे वेदा अथो वाग् इति ब्रूयात्
indraśca ha vai viṣṇuścāsurairyuyudhāte tānha sma jitvocatuḥ kalpāmahā iti te ha tathety asurā ūcuḥ so 'bravīd indro yāvad evāyaṃ viṣṇustrirvikramate tāvad asmākam atha yuṣmākam itarad iti sa imāṃllokānvicakrame 'tho vedān atho vācaṃ tad āhuḥ kiṃ tatsahasram itīme lokā ime vedā atho vāg iti brūyāt
- 12
ऐरयेथाम् ऐरयेथाम् इत्य् अछावाक उक्थ्ये ऽभ्यस्यति स हि तत्रान्त्यो भवति
airayethām airayethām ity achāvāka ukthye 'bhyasyati sa hi tatrāntyo bhavati
- 13
अग्निष्टोमे होतातिरात्रे च स हि तत्रान्त्यो भवति
agniṣṭome hotātirātre ca sa hi tatrāntyo bhavati
- 14
अभ्यस्येत्षोᄆअशिनि नाभ्यस्यैत् इति अभ्यस्येद् इत्य् आहुः कथम् अन्येष्व् अहःस्व् अभ्यस्यति कथम् अत्र नाभ्यस्येद् इति तस्माद् अभ्यस्येत्
abhyasyetṣoᄆaśini nābhyasyait iti abhyasyed ity āhuḥ katham anyeṣv ahaḥsv abhyasyati katham atra nābhyasyed iti tasmād abhyasyet

