10 shlokas
- 1
तद् आहुः कियतीभिर् अभिष्टुयाद् इति शतेनेत्य् आहुः शतायुर्वै पुरुषः शतवीर्यः शतेन्द्रिय आयुष्य् एवैनं तद्वीर्य इन्द्रिये दधाति
tad āhuḥ kiyatībhir abhiṣṭuyād iti śatenety āhuḥ śatāyurvai puruṣaḥ śatavīryaḥ śatendriya āyuṣy evainaṃ tadvīrya indriye dadhāti
- 2
त्रयस्त्रिंशता वेत्य् आहुस्त्रयस्त्रिंशतो वै स देवानाम्पाप्मनो ऽपाहंस्त्रयस्त्रिंशद्वै तस्य देवा इति
trayastriṃśatā vety āhustrayastriṃśato vai sa devānāmpāpmano 'pāhaṃstrayastriṃśadvai tasya devā iti
- 3
अपरिमिताभिर् अभिष्टुयाद् अपरिमितो वै प्रजापतिः प्रजापतेर्वा एषा होत्रा यद्ग्रावस्तोत्रीया तस्यां सर्वे कामा अवरुध्यन्ते स यद् अपरिमिताभिर् अभिष्टौति सर्वेषां कामानाम् अवरुद्ध्यै
aparimitābhir abhiṣṭuyād aparimito vai prajāpatiḥ prajāpatervā eṣā hotrā yadgrāvastotrīyā tasyāṃ sarve kāmā avarudhyante sa yad aparimitābhir abhiṣṭauti sarveṣāṃ kāmānām avaruddhyai
- 4
सर्वान्कामान् अवरुन्द्धे य एवं वेद
sarvānkāmān avarunddhe ya evaṃ veda
- 5
तस्माद् अपरिमिताभिर् एवाभिष्टुयात्
tasmād aparimitābhir evābhiṣṭuyāt
- 6
तद् आहुः कथम् अभिष्टुयाद् इत्य् अक्षरशः चतुरक्षरशः पच्छः अर्धर्चशः ऋक्शः इति तद्यद् ऋक्शो न तद् अवकल्पते ऽथ यत्पच्छो नो एव तद् अवकल्पते ऽथ यद् अक्षरशश्चतुरक्षरशो वि तथा छन्दांसि लुप्येरन्बहूनि तथाक्षराणि हीयेरन्न् अर्धर्चश एवाभिष्टुयात्प्रतिष्ठाया एव
tad āhuḥ katham abhiṣṭuyād ity akṣaraśaḥ caturakṣaraśaḥ pacchaḥ ardharcaśaḥ ṛkśaḥ iti tadyad ṛkśo na tad avakalpate 'tha yatpaccho no eva tad avakalpate 'tha yad akṣaraśaścaturakṣaraśo vi tathā chandāṃsi lupyeranbahūni tathākṣarāṇi hīyerann ardharcaśa evābhiṣṭuyātpratiṣṭhāyā eva
- 7
द्विप्रतिष्ठो वै पुरुषश्चतुष्पादाः पशवो यजमानम् एव तद्द्विप्रतिष्ठं चतुष्पात्सु पशुषु प्रतिष्ठापयति तस्माद् अर्धर्चश एवाभिष्टुयात्
dvipratiṣṭho vai puruṣaścatuṣpādāḥ paśavo yajamānam eva taddvipratiṣṭhaṃ catuṣpātsu paśuṣu pratiṣṭhāpayati tasmād ardharcaśa evābhiṣṭuyāt
- 8
तद् आहुर्यन्मध्यंदिने मध्यंदिन एव ग्राव्णो ऽभिष्टौति कथम् अस्येतरयोः सवनयोर् अभिष्टुतम्भवतीति यद् एव गायत्रीभिर् अभिष्टौति गायत्रं वै प्रातःसवनं तेन प्रातःसवने ऽथ यज्जगतीभिर् अभिष्टौति जागतं वै तृतीयसवनं तेन तृतीयसवने
tad āhuryanmadhyaṃdine madhyaṃdina eva grāvṇo 'bhiṣṭauti katham asyetarayoḥ savanayor abhiṣṭutambhavatīti yad eva gāyatrībhir abhiṣṭauti gāyatraṃ vai prātaḥsavanaṃ tena prātaḥsavane 'tha yajjagatībhir abhiṣṭauti jāgataṃ vai tṛtīyasavanaṃ tena tṛtīyasavane
- 9
एवम् उ हास्य मध्यंदिने मध्यंदिन एव ग्राव्णो ऽभिष्टुवतः सर्वेषु सवनेष्व् अभिष्टुतम्भवति य एवं वेद
evam u hāsya madhyaṃdine madhyaṃdina eva grāvṇo 'bhiṣṭuvataḥ sarveṣu savaneṣv abhiṣṭutambhavati ya evaṃ veda
- 10
तद् आहुर्यद् अध्वर्युर् एवान्यान् ऋत्विजः संप्रेष्यत्य् अथ कस्माद् एष एताम् असम्प्रेषितः प्रतिपद्यत इति मनो वै ग्रावस्तोत्रीयासम्प्रेषितं वा इदं मनस्तस्माद् एष एताम् असम्प्रेषितः प्रतिपद्यते
tad āhuryad adhvaryur evānyān ṛtvijaḥ saṃpreṣyaty atha kasmād eṣa etām asampreṣitaḥ pratipadyata iti mano vai grāvastotrīyāsampreṣitaṃ vā idaṃ manastasmād eṣa etām asampreṣitaḥ pratipadyate

