23 shlokas
- 1
वाग्वै देवता चतुर्थम् अहर्वहत्य् एकविंशः स्तोमो वैराजं सामानुष्टुप्छन्दो यथादेवतम् एनेन यथास्तोमं यथासाम यथाछन्दसं राध्नोति य एवं वेद
vāgvai devatā caturtham aharvahaty ekaviṃśaḥ stomo vairājaṃ sāmānuṣṭupchando yathādevatam enena yathāstomaṃ yathāsāma yathāchandasaṃ rādhnoti ya evaṃ veda
- 2
यद्वा एति च प्रेति च तच्चतुर्थस्याह्नो रूपं यद्ध्येव प्रथमम् अहस्तद् एतत्पुनर्यच्चतुर्थं यद्युक्तवद्यद्रथवद्यद् आशुमद्यत्पिबवद्यत्प्रथमे पदे देवता निरुच्यते यद् अयं लोको ऽभ्युदितो यज्जातवद्यद्धववद्यच्छुक्रवद्यद्वाचो रूपं यद्वैमदं यद्विरिफितं यद्विछन्दा यद् ऊनातिरिक्तं यद्वैराजं यद् आनुष्टुभं यत्करिष्यद्यत्प्रथमस्याह्नो रूपम् एतानि वै चतुर्थस्याह्नो रूपाणि
yadvā eti ca preti ca taccaturthasyāhno rūpaṃ yaddhyeva prathamam ahastad etatpunaryaccaturthaṃ yadyuktavadyadrathavadyad āśumadyatpibavadyatprathame pade devatā nirucyate yad ayaṃ loko 'bhyudito yajjātavadyaddhavavadyacchukravadyadvāco rūpaṃ yadvaimadaṃ yadviriphitaṃ yadvichandā yad ūnātiriktaṃ yadvairājaṃ yad ānuṣṭubhaṃ yatkariṣyadyatprathamasyāhno rūpam etāni vai caturthasyāhno rūpāṇi
- 3
आग्निं न स्ववृक्तिभिर् इति चतुर्थस्याह्न आज्यम्भवति वैमदं विरिफितं विरिफितस्य ऋषेश्चतुर्थे ऽहनि चतुर्थस्याह्नो रूपम्
āgniṃ na svavṛktibhir iti caturthasyāhna ājyambhavati vaimadaṃ viriphitaṃ viriphitasya ṛṣeścaturthe 'hani caturthasyāhno rūpam
- 4
अष्टर्चम्पाङ्क्तम्पाङ्क्तो यज्ञः पाङ्क्ताः पशवः पशूनाम् अवरुद्ध्यै
aṣṭarcampāṅktampāṅkto yajñaḥ pāṅktāḥ paśavaḥ paśūnām avaruddhyai
- 5
ता उ दश जगत्यो जगत्प्रातःसवन एष त्र्यहस्तेन चतुर्थस्याह्नो रूपम्
tā u daśa jagatyo jagatprātaḥsavana eṣa tryahastena caturthasyāhno rūpam
- 6
ता उ पञ्चदशानुष्टुभ आनुष्टुभं ह्य् एतद् अहस्तेन चतुर्थस्याह्नो रूपम्
tā u pañcadaśānuṣṭubha ānuṣṭubhaṃ hy etad ahastena caturthasyāhno rūpam
- 7
ता उ विंशतिर्गायत्र्यः पुनः प्रायणीयं ह्य् एतद् अहस्तेन चतुर्थस्याह्नो रूपम्
tā u viṃśatirgāyatryaḥ punaḥ prāyaṇīyaṃ hy etad ahastena caturthasyāhno rūpam
- 8
तद् एतद् अस्तुतम् अशस्तम् अयातयाम सूक्तं यज्ञ एव साक्षात्तद्यद् एतच्चतुर्थस्याह्न आज्यम्भवति यज्ञाद् एव तद्यज्ञं तन्वते वाचम् एव तत्पुनर् उपयन्ति संतत्यै
tad etad astutam aśastam ayātayāma sūktaṃ yajña eva sākṣāttadyad etaccaturthasyāhna ājyambhavati yajñād eva tadyajñaṃ tanvate vācam eva tatpunar upayanti saṃtatyai
- 9
संततैस्त्र्यहैर् अव्यवच्छिन्नैर्यन्ति य एवं विद्वांसो यन्ति
saṃtataistryahair avyavacchinnairyanti ya evaṃ vidvāṃso yanti
- 10
वायो शुक्रो अयामि ते विहि होत्रा अवीता वायो शतं हरीणाम् इन्द्रश्च वायव् एषां सोमानाम् आ चिकितान सुक्रतू आ नो विश्वाभिर् ऊतिभिस्त्यम् उ वो अप्रहणम् अप त्यं वृजिनं रिपुम् अम्बितमे नदीतम इत्य् आनुष्टुभम्प्रौगम् एति च प्रेति च शुक्रवच्चतुर्थे ऽहनि चतुर्थस्याह्नो रूपम्
vāyo śukro ayāmi te vihi hotrā avītā vāyo śataṃ harīṇām indraśca vāyav eṣāṃ somānām ā cikitāna sukratū ā no viśvābhir ūtibhistyam u vo aprahaṇam apa tyaṃ vṛjinaṃ ripum ambitame nadītama ity ānuṣṭubhampraugam eti ca preti ca śukravaccaturthe 'hani caturthasyāhno rūpam
- 11
तं त्वा यज्ञेभिर् ईमह इति मरुत्वतीयस्य प्रतिपद् ईमह इत्य् अभ्यायाम्यम् इवैतद् अहस्तेन चतुर्थस्याह्नो रूपम्
taṃ tvā yajñebhir īmaha iti marutvatīyasya pratipad īmaha ity abhyāyāmyam ivaitad ahastena caturthasyāhno rūpam
- 12
इदं वसो सुतम् अन्ध इन्द्र नेदीय एद् इहि प्रैतु ब्रह्मणस्पतिर् अग्निर्नेता त्वं सोम क्रतुभिः पिन्वन्त्य् अपः प्र व इन्द्राय बृहत इति प्रथमेनाह्ना समान आतानश्चतुर्थे ऽहनि चतुर्थस्याह्नो रूपम्
idaṃ vaso sutam andha indra nedīya ed ihi praitu brahmaṇaspatir agnirnetā tvaṃ soma kratubhiḥ pinvanty apaḥ pra va indrāya bṛhata iti prathamenāhnā samāna ātānaścaturthe 'hani caturthasyāhno rūpam
- 13
श्रुधी हवम् इन्द्र मा रिषण्य इति सूक्तं हववच्चतुर्थे ऽहनि चतुर्थस्याह्नो रूपम्
śrudhī havam indra mā riṣaṇya iti sūktaṃ havavaccaturthe 'hani caturthasyāhno rūpam
- 14
मरुत्वान् इन्द्र वृषभो रणयेति सूक्तम् उग्रं सहोदाम् इह तं हुवेमेति हववच्चतुर्थे ऽहनि चतुर्थस्याह्नो रूपम्
marutvān indra vṛṣabho raṇayeti sūktam ugraṃ sahodām iha taṃ huvemeti havavaccaturthe 'hani caturthasyāhno rūpam
- 15
तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते
tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate
- 16
इमं नु मायिनं हुव इति पर्यासो हववांश्चतुर्थे ऽहनि चतुर्थस्याह्नो रूपम्
imaṃ nu māyinaṃ huva iti paryāso havavāṃścaturthe 'hani caturthasyāhno rūpam
- 17
ता उ गायत्र्यो गायत्र्यो वा एतस्य त्र्यहस्य मध्यंदिनं वहन्ति
tā u gāyatryo gāyatryo vā etasya tryahasya madhyaṃdinaṃ vahanti
- 18
तद्वै तच्छन्दो वहति यस्मिन्निविद्धीयते तस्माद्गायत्रीषु निविदं दधाति
tadvai tacchando vahati yasminnividdhīyate tasmādgāyatrīṣu nividaṃ dadhāti
- 19
पिबा सोमम् इन्द्र मन्दतु त्वा श्रुधी हवं विपिपानस्याद्रेर् इति वैराजम्पृष्ठम्भवति बार्हते ऽहनि चतुर्थे ऽहनि चतुर्थस्याह्नो रूपम्
pibā somam indra mandatu tvā śrudhī havaṃ vipipānasyādrer iti vairājampṛṣṭhambhavati bārhate 'hani caturthe 'hani caturthasyāhno rūpam
- 20
यद्वावानेति धाय्याच्युता
yadvāvāneti dhāyyācyutā
- 21
त्वाम् इद्धि हवामह इति बृहतो योनिम् अनु निवर्तयति बार्हतं ह्य् एतद् अहर् आयतनेन
tvām iddhi havāmaha iti bṛhato yonim anu nivartayati bārhataṃ hy etad ahar āyatanena
- 22
त्वम् इन्द्र प्रतूर्तिष्व् इति सामप्रगाथो ऽशस्तिहा जनितेति जातवांश्चतुर्थे ऽहनि चतुर्थस्याह्नो रूपम्
tvam indra pratūrtiṣv iti sāmapragātho 'śastihā janiteti jātavāṃścaturthe 'hani caturthasyāhno rūpam
- 23
त्यम् ऊ षु वाजिनं देवजूतम् इति तार्क्ष्यो ऽच्युतः
tyam ū ṣu vājinaṃ devajūtam iti tārkṣyo 'cyutaḥ

