22 shlokas
- 1
अध्वर्यो इत्य् आह्वयते चतुर्होतृषु वदिष्यमाणस्तद् आहावस्य रूपम्
adhvaryo ity āhvayate caturhotṛṣu vadiṣyamāṇastad āhāvasya rūpam
- 2
ॐ होतस्तथा होतर् इत्य् अध्वर्युः प्रतिगृणात्य् अवसिते ऽवसिते दशसु पदेषु
oṃ hotastathā hotar ity adhvaryuḥ pratigṛṇāty avasite 'vasite daśasu padeṣu
- 3
तेषां चित्तिः स्रुग् आसीत्
teṣāṃ cittiḥ srug āsīt
- 4
चित्तम् आज्यम् आसीत्
cittam ājyam āsīt
- 5
वाग्वेदिर् आसीत्
vāgvedir āsīt
- 6
आधीतम्बर्हिर् आसीत्
ādhītambarhir āsīt
- 7
केतो अग्निर् आसीत्
keto agnir āsīt
- 8
विज्ञातम् अग्नीद् आसीत्
vijñātam agnīd āsīt
- 9
प्राणो हविर् आसीत्
prāṇo havir āsīt
- 10
सामाध्वर्युर् आसीत्
sāmādhvaryur āsīt
- 11
वाचस्पतिर्होतासीत्
vācaspatirhotāsīt
- 12
मन उपवक्तासीत्
mana upavaktāsīt
- 13
ते वा एतं ग्रहम् अगृह्णत वाचस्पते विधे नामन्विधेम ते नाम विधेस्त्वम् अस्माकं नाम्ना द्यां गच्छ यां देवाः प्रजापतिगृहपतय ऋद्धिम् अराध्नुवंस्ताम् ऋद्धिं रात्स्यामः
te vā etaṃ graham agṛhṇata vācaspate vidhe nāmanvidhema te nāma vidhestvam asmākaṃ nāmnā dyāṃ gaccha yāṃ devāḥ prajāpatigṛhapataya ṛddhim arādhnuvaṃstām ṛddhiṃ rātsyāmaḥ
- 14
अथ प्रजापतेस्तनूर् अनुद्रवति ब्रह्मोद्यं च
atha prajāpatestanūr anudravati brahmodyaṃ ca
- 15
अन्नादा चान्नपत्नी चान्नादा तद् अग्निर् अन्नपत्नी तद् आदित्यः
annādā cānnapatnī cānnādā tad agnir annapatnī tad ādityaḥ
- 16
भद्रा च कल्याणी च भद्रा तत्सोमः कल्याणी तत्पशवः
bhadrā ca kalyāṇī ca bhadrā tatsomaḥ kalyāṇī tatpaśavaḥ
- 17
अनिलया चापभया चानिलया तद्वायुर्न ह्य् एष कदाचनेलयत्य् अपभया तन्मृत्युः सर्वं ह्य् एतस्माद्बीभाय
anilayā cāpabhayā cānilayā tadvāyurna hy eṣa kadācanelayaty apabhayā tanmṛtyuḥ sarvaṃ hy etasmādbībhāya
- 18
अनाप्ता चानाप्या चानाप्ता तत्पृथिव्य् अनाप्या तद्द्यौः
anāptā cānāpyā cānāptā tatpṛthivy anāpyā taddyauḥ
- 19
अनाधृष्या चाप्रतिधृष्या चानाधृष्या तद् अग्निर् अप्रतिधृष्या तद् आदित्यः
anādhṛṣyā cāpratidhṛṣyā cānādhṛṣyā tad agnir apratidhṛṣyā tad ādityaḥ
- 20
अपूर्वा चाभ्रातृव्या चापूर्वा तन्मनो ऽभ्रातृव्या तत्संवत्सरः
apūrvā cābhrātṛvyā cāpūrvā tanmano 'bhrātṛvyā tatsaṃvatsaraḥ
- 21
एता वाव द्वादश प्रजापतेस्तन्व एष कृत्स्नः प्रजापतिस्तत्कृत्स्नम्प्रजापतिम् आप्नोति दशमम् अहः
etā vāva dvādaśa prajāpatestanva eṣa kṛtsnaḥ prajāpatistatkṛtsnamprajāpatim āpnoti daśamam ahaḥ
- 22
अथ ब्रह्मोद्यम्वदन्त्य् अग्निर्गृहपतिर् इति हैक आहुः सो ऽस्य लोकस्य गृहपतिर्वायुर्गृहपतिर् इति हैक आहुः सो ऽन्तरिक्षलोकस्य गृहपतिर् असौ वै गृहपतिर्यो ऽसौ तपत्य् एष पतिर् ऋतवो गृहा येषां वै गृहपतिं देवं विद्वान्गृहपतिर्भवति राध्नोति स गृहपती राध्नुवन्ति ते यजमाना येषां वा अपहतपाप्मानं देवं विद्वान्गृहपतिर्भवत्य् अप स गृहपतिः पाप्मानं हते ऽप ते यजमानाः पाप्मानं घ्नते ऽध्वर्यो अरात्स्मारात्स्म
atha brahmodyamvadanty agnirgṛhapatir iti haika āhuḥ so 'sya lokasya gṛhapatirvāyurgṛhapatir iti haika āhuḥ so 'ntarikṣalokasya gṛhapatir asau vai gṛhapatiryo 'sau tapaty eṣa patir ṛtavo gṛhā yeṣāṃ vai gṛhapatiṃ devaṃ vidvāngṛhapatirbhavati rādhnoti sa gṛhapatī rādhnuvanti te yajamānā yeṣāṃ vā apahatapāpmānaṃ devaṃ vidvāngṛhapatirbhavaty apa sa gṛhapatiḥ pāpmānaṃ hate 'pa te yajamānāḥ pāpmānaṃ ghnate 'dhvaryo arātsmārātsma

