18 shlokas
- 1
यो जात एव प्रथमो मनस्वान् इति सूक्तं समानोदर्कं तृतीये ऽहनि तृतीयस्याह्नो रूपम्
yo jāta eva prathamo manasvān iti sūktaṃ samānodarkaṃ tṛtīye 'hani tṛtīyasyāhno rūpam
- 2
तद् उ सजनीयम् एतद्वा इन्द्रस्येन्द्रियं यत्सजनीयम् एतस्मिन्वै शस्यमान इन्द्रम् इन्द्रियम् आविशति
tad u sajanīyam etadvā indrasyendriyaṃ yatsajanīyam etasminvai śasyamāna indram indriyam āviśati
- 3
तद्धाप्याहुश्छन्दोगास्तृतीये ऽहनि बह्वृचा इन्द्रस्येन्द्रियम्शंसन्तीति
taddhāpyāhuśchandogāstṛtīye 'hani bahvṛcā indrasyendriyamśaṃsantīti
- 4
तद् उ गार्त्समदम् एतेन वै गृत्समद इन्द्रस्य प्रियं धामोपागच्छत्स परमं लोकम् अजयत्
tad u gārtsamadam etena vai gṛtsamada indrasya priyaṃ dhāmopāgacchatsa paramaṃ lokam ajayat
- 5
उपेन्द्रस्य प्रियं धाम गच्छति जयति परमं लोकं य एवं वेद
upendrasya priyaṃ dhāma gacchati jayati paramaṃ lokaṃ ya evaṃ veda
- 6
तत्सवितुर्वृणीमहे ऽद्या नो देव सवितर् इति वैश्वदेवस्य प्रतिपदनुचरौ राथंतरे ऽहनि तृतीये ऽहनि तृतीयस्याह्नो रूपम्
tatsaviturvṛṇīmahe 'dyā no deva savitar iti vaiśvadevasya pratipadanucarau rāthaṃtare 'hani tṛtīye 'hani tṛtīyasyāhno rūpam
- 7
तद्देवस्य सवितुर्वार्यम्महद् इति सावित्रम्
taddevasya saviturvāryammahad iti sāvitram
- 8
अन्तो वै महद् अन्तस्तृतीयम् अहस्तृतीये ऽहनि तृतीयस्याह्नो रूपम्
anto vai mahad antastṛtīyam ahastṛtīye 'hani tṛtīyasyāhno rūpam
- 9
घृतेन द्यावापृथिवी अभीवृते इति द्यावापृथिवीयं घृतश्रिया घृतपृचा घृतावृधेति पुनरावृत्तम्पुनर्निनृत्तं तृतीये ऽहनि तृतीयस्याह्नो रूपम्
ghṛtena dyāvāpṛthivī abhīvṛte iti dyāvāpṛthivīyaṃ ghṛtaśriyā ghṛtapṛcā ghṛtāvṛdheti punarāvṛttampunarninṛttaṃ tṛtīye 'hani tṛtīyasyāhno rūpam
- 10
अनश्वो जातो अनभीशुर् उक्थ्य इत्य् आर्भवम्रथस्त्रिचक्र इति त्रिवत्तृतीये ऽहनि तृतीयस्याह्नो रूपम्
anaśvo jāto anabhīśur ukthya ity ārbhavamrathastricakra iti trivattṛtīye 'hani tṛtīyasyāhno rūpam
- 11
परावतो ये दिधिषन्त आप्यम् इति वैश्वदेवम् अन्तो वै परावतो ऽन्तस्तृतीयम् अहस्तृतीये ऽहनि तृतीयस्याह्नो रूपम्
parāvato ye didhiṣanta āpyam iti vaiśvadevam anto vai parāvato 'ntastṛtīyam ahastṛtīye 'hani tṛtīyasyāhno rūpam
- 12
तद् उ गायम् एतेन वै गयः प्लातो विश्वेषां देवानाम्प्रियं धामोपागच्छत्स परमं लोकम् अजयत्
tad u gāyam etena vai gayaḥ plāto viśveṣāṃ devānāmpriyaṃ dhāmopāgacchatsa paramaṃ lokam ajayat
- 13
उप विश्वेषां देवानाम्प्रियं धाम गच्छति जयति परमं लोकं य एवं वेद
upa viśveṣāṃ devānāmpriyaṃ dhāma gacchati jayati paramaṃ lokaṃ ya evaṃ veda
- 14
वैश्वानराय धिषणाम् ऋतावृध इत्य् आग्निमारुतस्य प्रतिपद् अन्तो वै धिषणान्तस्तृतीयम् अहस्तृतीये ऽहनि तृतीयस्याह्नो रूपम्
vaiśvānarāya dhiṣaṇām ṛtāvṛdha ity āgnimārutasya pratipad anto vai dhiṣaṇāntastṛtīyam ahastṛtīye 'hani tṛtīyasyāhno rūpam
- 15
धारावरा मरुतो धृष्ण्वोजस इति मारुतम्बह्वभिव्याहृत्यम् अन्तो वै बह्व् अन्तस्तृतीयम् अहस्तृतीये ऽहनि तृतीयस्याह्नो रूपम्
dhārāvarā maruto dhṛṣṇvojasa iti mārutambahvabhivyāhṛtyam anto vai bahv antastṛtīyam ahastṛtīye 'hani tṛtīyasyāhno rūpam
- 16
जातवेदसे सुनवाम सोमम् इति जातवेदस्याच्युता
jātavedase sunavāma somam iti jātavedasyācyutā
- 17
त्वम् अग्ने प्रथमो अङ्गिरा ऋषिर् इति जातवेदस्यम्पुरस्तादुदर्कं तृतीये ऽहनि तृतीयस्याह्नो रूपं त्वं त्वम् इत्य् उत्तरं त्र्यहम् अभिवदति संतत्यै
tvam agne prathamo aṅgirā ṛṣir iti jātavedasyampurastādudarkaṃ tṛtīye 'hani tṛtīyasyāhno rūpaṃ tvaṃ tvam ity uttaraṃ tryaham abhivadati saṃtatyai
- 18
संततैस्त्र्यहैर् अव्यवच्छिन्नैर्यन्ति य एवं विद्वांसो यन्ति
saṃtataistryahair avyavacchinnairyanti ya evaṃ vidvāṃso yanti

