8 shlokas
- 1
वृषशुष्मो ह वातावत उवाच जातूकर्ण्यो वक्ता स्मो वा इदं देवेभ्यो यद्वै तद् अग्निहोत्रम् उभयेद्युर् अहूयतान्येद्युर्वाव तद् एतर्हि हूयत इति
vṛṣaśuṣmo ha vātāvata uvāca jātūkarṇyo vaktā smo vā idaṃ devebhyo yadvai tad agnihotram ubhayedyur ahūyatānyedyurvāva tad etarhi hūyata iti
- 2
एतद् उ होवाच कुमारी गन्धर्वगृहीता वक्ता स्मो वा इदम्पितृभ्यो यद्वै तद् अग्निहोत्रम् उभयेद्युर् अहूयतान्येद्युर्वाव तद् एतर्हि हूयत इति
etad u hovāca kumārī gandharvagṛhītā vaktā smo vā idampitṛbhyo yadvai tad agnihotram ubhayedyur ahūyatānyedyurvāva tad etarhi hūyata iti
- 3
एतद्वा अग्निहोत्रम् अन्येद्युर्हूयते यद् अस्तमिते सायं जुहोत्य् अनुदिते प्रातर् अथैतद् अग्निहोत्रम् उभयेद्युर्हूयते यद् अस्तमिते सायं जुहोत्य् उदिते प्रातः
etadvā agnihotram anyedyurhūyate yad astamite sāyaṃ juhoty anudite prātar athaitad agnihotram ubhayedyurhūyate yad astamite sāyaṃ juhoty udite prātaḥ
- 4
तस्माद् उदिते होतव्यम्
tasmād udite hotavyam
- 5
चतुर्विंशे ह वै संवत्सरे ऽनुदितहोमी गायत्रीलोकम् आप्नोति द्वादश उदितहोमी स यदा द्वौ संवत्सराव् अनुदिते जुहोत्य् अथ हास्यैको हुतो भवत्य् अथ य उदिते जुहोति संवत्सरेणैव संवत्सरम् आप्नोति य एवं विद्वान् उदिते जुहोति तस्माद् उदिते होतव्यम्
caturviṃśe ha vai saṃvatsare 'nuditahomī gāyatrīlokam āpnoti dvādaśa uditahomī sa yadā dvau saṃvatsarāv anudite juhoty atha hāsyaiko huto bhavaty atha ya udite juhoti saṃvatsareṇaiva saṃvatsaram āpnoti ya evaṃ vidvān udite juhoti tasmād udite hotavyam
- 6
एष ह वा अहोरात्रयोस्तेजसि जुहोति यो ऽस्तमिते सायं जुहोत्य् उदिते प्रातर् अग्निना वै तेजसा रात्रिस्तेजस्वत्य् आदित्येन तेजसाहस्तेजस्वत्
eṣa ha vā ahorātrayostejasi juhoti yo 'stamite sāyaṃ juhoty udite prātar agninā vai tejasā rātristejasvaty ādityena tejasāhastejasvat
- 7
अहोरात्रयोर्हास्य तेजसि हुतं भवति य एवं विद्वान् उदिते जुहोति
ahorātrayorhāsya tejasi hutaṃ bhavati ya evaṃ vidvān udite juhoti
- 8
तस्माद् उदिते होतव्यम्
tasmād udite hotavyam

