29 shlokas
- 1
यद्वा एति च प्रेति च तत्सप्तमस्याह्नो रूपम्
yadvā eti ca preti ca tatsaptamasyāhno rūpam
- 2
यद्ध्येव प्रथमम् अहस्तद् एवैतत्पुनर्यत्सप्तमम्
yaddhyeva prathamam ahastad evaitatpunaryatsaptamam
- 3
यद्युक्तवद्यद्रथवद्यद् आशुमद्यत्पिबवद्यत्प्रथमे पदे देवता निरुच्यते यद् अयं लोको ऽभ्युदितः
yadyuktavadyadrathavadyad āśumadyatpibavadyatprathame pade devatā nirucyate yad ayaṃ loko 'bhyuditaḥ
- 4
यज्जातवद्यद् अनिरुक्तम्
yajjātavadyad aniruktam
- 5
यत्करिष्यद्यत्प्रथमस्याह्नो रूपम् एतानि वै सप्तमस्याह्नो रूपाणि
yatkariṣyadyatprathamasyāhno rūpam etāni vai saptamasyāhno rūpāṇi
- 6
समुद्राद् ऊर्मिर्मधुमाꣳ उद् आरद् इति सप्तमस्याह्न आज्यम्भवत्य् अनिरुक्तम्सप्तमे ऽहनि सप्तमस्याह्नो रूपम्
samudrād ūrmirmadhumām̐ ud ārad iti saptamasyāhna ājyambhavaty aniruktamsaptame 'hani saptamasyāhno rūpam
- 7
वाग्वै समुद्रो न वै वाक्क्षीयते न समुद्रः क्षीयते तद्यद् एतत्सप्तमस्याह्न आज्यम्भवति यज्ञाद् एव तद्यज्ञं तन्वते वाचम् एव तत्पुनर् उपयन्ति संतत्यै
vāgvai samudro na vai vākkṣīyate na samudraḥ kṣīyate tadyad etatsaptamasyāhna ājyambhavati yajñād eva tadyajñaṃ tanvate vācam eva tatpunar upayanti saṃtatyai
- 8
संततैस्त्र्यहैर् अव्यवच्छिन्नैर्यन्ति य एवं विद्वांसो यन्ति
saṃtataistryahair avyavacchinnairyanti ya evaṃ vidvāṃso yanti
- 9
आप्यन्ते वै स्तोमा आप्यन्ते छन्दांसि षष्ठे ऽहनि तद्यथैवाद आज्येनावदानानि पुनः प्रत्यभिघारयन्त्य् अयातयामताया एवम् एवैतत्स्तोमांश्च छन्दांसि च पुनः प्रत्युपयन्त्य् अयातयामतायै यद् एतत्सप्तमस्याह्न आज्यम्भवति
āpyante vai stomā āpyante chandāṃsi ṣaṣṭhe 'hani tadyathaivāda ājyenāvadānāni punaḥ pratyabhighārayanty ayātayāmatāyā evam evaitatstomāṃśca chandāṃsi ca punaḥ pratyupayanty ayātayāmatāyai yad etatsaptamasyāhna ājyambhavati
- 10
तद् उ त्रैष्टुभं त्रिष्टुप्प्रातःसवन एष त्र्यहः
tad u traiṣṭubhaṃ triṣṭupprātaḥsavana eṣa tryahaḥ
- 11
आ वायो भूष शुचिपा उप नः प्र याभिर्यासि दाश्वांसम् अच्छा नो नियुद्भिः शतिनीभिर् अध्वरं प्र सोता जीरो अध्वरेष्व् अस्थाद्ये वायव इन्द्रमादनासो या वां शतं नियुतो याः सहस्रं प्र यद्वाम्मित्रावरुणा स्पूर्धन्न् आ गोमता नासत्या रथेना नो देव शवसा याहि शुष्मिन्प्र वो यज्ञेषु देवयन्तो अर्चन्प्र क्षोदसा धायसा सस्र एषेति प्रौगम् एति च प्रेति च सप्तमे ऽहनि सप्तमस्याह्नो रूपं तद् उ त्रैष्टुभं त्रिष्टुप्प्रातःसवन एष त्र्यहः
ā vāyo bhūṣa śucipā upa naḥ pra yābhiryāsi dāśvāṃsam acchā no niyudbhiḥ śatinībhir adhvaraṃ pra sotā jīro adhvareṣv asthādye vāyava indramādanāso yā vāṃ śataṃ niyuto yāḥ sahasraṃ pra yadvāmmitrāvaruṇā spūrdhann ā gomatā nāsatyā rathenā no deva śavasā yāhi śuṣminpra vo yajñeṣu devayanto arcanpra kṣodasā dhāyasā sasra eṣeti praugam eti ca preti ca saptame 'hani saptamasyāhno rūpaṃ tad u traiṣṭubhaṃ triṣṭupprātaḥsavana eṣa tryahaḥ
- 12
आ त्वा रथं यथोतय इदं वसो सुतम् अन्ध इन्द्र नेदीय एद् इहि प्रैतु ब्रह्मणस्पतिर् अग्निर्नेता त्वं सोम क्रतुभिः पिन्वन्त्य् अपः प्र व इन्द्राय बृहत इति प्रथमेनाह्ना समान आतानः सप्तमे ऽहनि सप्तमस्याह्नो रूपम्
ā tvā rathaṃ yathotaya idaṃ vaso sutam andha indra nedīya ed ihi praitu brahmaṇaspatir agnirnetā tvaṃ soma kratubhiḥ pinvanty apaḥ pra va indrāya bṛhata iti prathamenāhnā samāna ātānaḥ saptame 'hani saptamasyāhno rūpam
- 13
कया शुभा सवयसः सनीᄆआ इति सूक्तं न जायमानो नशते न जात इति जातवत्सप्तमे ऽहनि सप्तमस्याह्नो रूपम्
kayā śubhā savayasaḥ sanīᄆā iti sūktaṃ na jāyamāno naśate na jāta iti jātavatsaptame 'hani saptamasyāhno rūpam
- 14
तद् उ कयाशुभीयम् एतद्वै संज्ञानं संतनि सूक्तं यत्कयाशुभीयम् एतेन ह वा इन्द्रो ऽगस्त्यो मरुतस्ते समजानत तद्यत्कयाशुभीयं शंसति संज्ञात्या एव
tad u kayāśubhīyam etadvai saṃjñānaṃ saṃtani sūktaṃ yatkayāśubhīyam etena ha vā indro 'gastyo marutaste samajānata tadyatkayāśubhīyaṃ śaṃsati saṃjñātyā eva
- 15
तद्व् आयुष्यं तद्यो ऽस्य प्रियः स्यात्कुर्याद् एवास्य कयाशुभीयम्
tadv āyuṣyaṃ tadyo 'sya priyaḥ syātkuryād evāsya kayāśubhīyam
- 16
तद् उ त्रैष्टुभं तेन प्रतिष्ठितपदेन सवनं दाधारायतनाद् एवैतेन न प्रच्यवते
tad u traiṣṭubhaṃ tena pratiṣṭhitapadena savanaṃ dādhārāyatanād evaitena na pracyavate
- 17
त्यं सु मेषम्महया स्वर्विदम् इति सूक्तम् अत्यं न वाजं हवनस्यदं रथम् इति रथवत्सप्तमे ऽहनि सप्तमस्याह्नो रूपम्
tyaṃ su meṣammahayā svarvidam iti sūktam atyaṃ na vājaṃ havanasyadaṃ ratham iti rathavatsaptame 'hani saptamasyāhno rūpam
- 18
तद् उ जागतं जगत्यो वा एतस्य त्र्यहस्य मध्यंदिनं वहन्ति तद्वै तच्छन्दो वहति यस्मिन्निविद्धीयते तस्माज्जगतीषु निविदं दधाति
tad u jāgataṃ jagatyo vā etasya tryahasya madhyaṃdinaṃ vahanti tadvai tacchando vahati yasminnividdhīyate tasmājjagatīṣu nividaṃ dadhāti
- 19
मिथुनानि सूक्तानि शस्यन्ते त्रैष्टुभानि च जागतानि च मिथुनं वै पशवः पशवश्छन्दोमाः पशूनाम् अवरुद्ध्यै
mithunāni sūktāni śasyante traiṣṭubhāni ca jāgatāni ca mithunaṃ vai paśavaḥ paśavaśchandomāḥ paśūnām avaruddhyai
- 20
त्वाम् इद्धि हवामहे त्वं ह्य् एहि चेरव इति बृहत्पृष्ठम्भवति सप्तमे ऽहनि
tvām iddhi havāmahe tvaṃ hy ehi cerava iti bṛhatpṛṣṭhambhavati saptame 'hani
- 21
यद् एव षष्ठस्याह्नस्तत्
yad eva ṣaṣṭhasyāhnastat
- 22
यद्वै रथंतरं तद्वैरूपं यद्बृहत्तद्वैराजं यद्रथंतरं तच्छाक्वरं यद्बृहत्तद्रैवतम्
yadvai rathaṃtaraṃ tadvairūpaṃ yadbṛhattadvairājaṃ yadrathaṃtaraṃ tacchākvaraṃ yadbṛhattadraivatam
- 23
तद्यद्बृहत्पृष्ठम्भवति बृहतैव तद्बृहत्प्रत्युत्तभ्नुवन्त्य् अस्तोमकृन्तत्राय
tadyadbṛhatpṛṣṭhambhavati bṛhataiva tadbṛhatpratyuttabhnuvanty astomakṛntatrāya
- 24
यद्रथंतरं स्यात्कृन्तत्रं स्यात्
yadrathaṃtaraṃ syātkṛntatraṃ syāt
- 25
तस्माद्बृहद् एव कर्तव्यम्
tasmādbṛhad eva kartavyam
- 26
यद्वावानेति धाय्याच्युता
yadvāvāneti dhāyyācyutā
- 27
अभि त्वा शूर नोनुम इति रथंतरस्य योनिम् अनु निवर्तयति राथंतरं ह्य् एतद् अहर् आयतनेन
abhi tvā śūra nonuma iti rathaṃtarasya yonim anu nivartayati rāthaṃtaraṃ hy etad ahar āyatanena
- 28
पिबा सुतस्य रसिन इति सामप्रगाथः पिबवान्सप्तमे ऽहनि सप्तमस्याह्नो रूपम्
pibā sutasya rasina iti sāmapragāthaḥ pibavānsaptame 'hani saptamasyāhno rūpam
- 29
त्यम् ऊ षु वाजिनं देवजूतम् इति तार्क्ष्यो ऽच्युतः
tyam ū ṣu vājinaṃ devajūtam iti tārkṣyo 'cyutaḥ

