11 shlokas
- 1
असौ वा अस्यादित्यो यूपः पृथिवी वेदिर् ओषधयो बर्हिर्वनस्पतय इध्मा आपः प्रोक्षण्यो दिशः परिधयः
asau vā asyādityo yūpaḥ pṛthivī vedir oṣadhayo barhirvanaspataya idhmā āpaḥ prokṣaṇyo diśaḥ paridhayaḥ
- 2
यद्ध वा अस्य किंच नश्यति यन्म्रियते यद् अपाजन्ति सर्वं हैवैनं तद् अमुष्मिंल्लोके यथा बर्हिषि दत्तम् आगच्छेद् एवम् आगच्छति य एवं विद्वान् अग्निहोत्रं जुहोति
yaddha vā asya kiṃca naśyati yanmriyate yad apājanti sarvaṃ haivainaṃ tad amuṣmiṃlloke yathā barhiṣi dattam āgacched evam āgacchati ya evaṃ vidvān agnihotraṃ juhoti
- 3
उभयान्वा एष देवमनुष्यान्विपर्यासं दक्षिणा नयति सर्वं चेदं यद् इदं किंच
ubhayānvā eṣa devamanuṣyānviparyāsaṃ dakṣiṇā nayati sarvaṃ cedaṃ yad idaṃ kiṃca
- 4
मनुष्यान्वा एष सायमाहुत्या देवेभ्यो दक्षिणा नयति सर्वं चेदं यद् इदं किंच त एते प्रलीना न्योकस इव शेरे मनुष्या देवेभ्यो दक्षिणा नीताः
manuṣyānvā eṣa sāyamāhutyā devebhyo dakṣiṇā nayati sarvaṃ cedaṃ yad idaṃ kiṃca ta ete pralīnā nyokasa iva śere manuṣyā devebhyo dakṣiṇā nītāḥ
- 5
देवान्वा एष प्रातराहुत्या मनुष्येभ्यो दक्षिणा नयति सर्वं चेदं यद् इदं किंच त एते विविदाना इवोत्पतन्त्य् अदो ऽहं करिष्ये ऽदो ऽहं गमिष्यामीति वदन्तः
devānvā eṣa prātarāhutyā manuṣyebhyo dakṣiṇā nayati sarvaṃ cedaṃ yad idaṃ kiṃca ta ete vividānā ivotpatanty ado 'haṃ kariṣye 'do 'haṃ gamiṣyāmīti vadantaḥ
- 6
यावन्तं ह वै सर्वम् इदं दत्त्वा लोकं जयति तावन्तं ह लोकं जयति य एवं विद्वान् अग्निहोत्रं जुहोति
yāvantaṃ ha vai sarvam idaṃ dattvā lokaṃ jayati tāvantaṃ ha lokaṃ jayati ya evaṃ vidvān agnihotraṃ juhoti
- 7
अग्नये वा एष सायमाहुत्याश्विनम् उपाकरोति तद्वाक्प्रतिगृणाति वाग्वाग् इति
agnaye vā eṣa sāyamāhutyāśvinam upākaroti tadvākpratigṛṇāti vāgvāg iti
- 8
अग्निना हास्य रात्र्याश्विनं शस्तम्भवति य एवं विद्वान् अग्निहोत्रं जुहोति
agninā hāsya rātryāśvinaṃ śastambhavati ya evaṃ vidvān agnihotraṃ juhoti
- 9
आदित्याय वा एष प्रातराहुत्या महाव्रतम् उपाकरोति तत्प्राणः प्रतिगृणात्य् अन्नम् अन्नम् इत्य् आदित्येन हास्याह्ना महाव्रतं शस्तम्भवति य एवं विद्वान् अग्निहोत्रं जुहोति
ādityāya vā eṣa prātarāhutyā mahāvratam upākaroti tatprāṇaḥ pratigṛṇāty annam annam ity ādityena hāsyāhnā mahāvrataṃ śastambhavati ya evaṃ vidvān agnihotraṃ juhoti
- 10
तस्य वा एतस्याग्निहोत्रस्य सप्त च शतानि विंशतिश्च संवत्सरे सायमाहुतयः सप्त चो एव शतानि विंशतिश्च संवत्सरे प्रातराहुतयस्तावत्यो ऽग्नेर्यजुष्मत्य इष्टकाः
tasya vā etasyāgnihotrasya sapta ca śatāni viṃśatiśca saṃvatsare sāyamāhutayaḥ sapta co eva śatāni viṃśatiśca saṃvatsare prātarāhutayastāvatyo 'gneryajuṣmatya iṣṭakāḥ
- 11
संवत्सरेण हास्याग्निना चित्येनेष्टम्भवति य एवं विद्वान् अग्निहोत्रं जुहोति
saṃvatsareṇa hāsyāgninā cityeneṣṭambhavati ya evaṃ vidvān agnihotraṃ juhoti

