15 shlokas
- 1
एते ह वै संवत्सरस्य चक्रे यद् अहोरात्रे ताभ्याम् एव तत्संवत्सरम् एति स यो ऽनुदिते जुहोति यथैकतश्चक्रेण यायात्तादृक्तद् अथ य उदिते जुहोति यथोभयतश्चक्रेण यान्क्षिप्रम् अध्वानं समश्नुवीत तादृक्तत्
ete ha vai saṃvatsarasya cakre yad ahorātre tābhyām eva tatsaṃvatsaram eti sa yo 'nudite juhoti yathaikataścakreṇa yāyāttādṛktad atha ya udite juhoti yathobhayataścakreṇa yānkṣipram adhvānaṃ samaśnuvīta tādṛktat
- 2
तद् एषाभि यज्ञगाथा गीयते
tad eṣābhi yajñagāthā gīyate
- 3
बृहद्रथंतराभ्याम् इदम् एति युक्तं यद्भूतं भविष्यच्चापि सर्वं ताभ्याम् इयाद् अग्नीन् आधाय धीरो दिवैवान्यज्जुहुयान्नक्तम् अन्यद् इति
bṛhadrathaṃtarābhyām idam eti yuktaṃ yadbhūtaṃ bhaviṣyaccāpi sarvaṃ tābhyām iyād agnīn ādhāya dhīro divaivānyajjuhuyānnaktam anyad iti
- 4
राथंतरी वै रात्र्य् अहर्बार्हतम् अग्निर्वै रथंतरम् आदित्यो बृहद् एते ह वा एनं देवते ब्रध्नस्य विष्टपं स्वर्गं लोकं गमयतो य एवं विद्वान् उदिते जुहोति तस्माद् उदिते होतव्यम्
rāthaṃtarī vai rātry aharbārhatam agnirvai rathaṃtaram ādityo bṛhad ete ha vā enaṃ devate bradhnasya viṣṭapaṃ svargaṃ lokaṃ gamayato ya evaṃ vidvān udite juhoti tasmād udite hotavyam
- 5
तद् एषाभि यज्ञगाथा गीयते
tad eṣābhi yajñagāthā gīyate
- 6
यथा ह वा स्थूरिणैकेन यायाद् अकृत्वान्यद् उपयोजनाय एवं यन्ति ते बहवो जनासः पुरोदयाज्जुह्वति ये ऽग्निहोत्रम् इति
yathā ha vā sthūriṇaikena yāyād akṛtvānyad upayojanāya evaṃ yanti te bahavo janāsaḥ purodayājjuhvati ye 'gnihotram iti
- 7
तां वा एतां देवताम्प्रयतीं सर्वम् इदम् अनुप्रैति यद् इदं किंचैतस्यै हीदं देवताया अनुचरं सर्वं यद् इदं किंच सैषानुचरवती देवता
tāṃ vā etāṃ devatāmprayatīṃ sarvam idam anupraiti yad idaṃ kiṃcaitasyai hīdaṃ devatāyā anucaraṃ sarvaṃ yad idaṃ kiṃca saiṣānucaravatī devatā
- 8
विन्दते ह वा अनुचरम्भवत्य् अस्यानुचरो य एवं वेद
vindate ha vā anucarambhavaty asyānucaro ya evaṃ veda
- 9
स वा एष एकातिथिः स एष जुह्वत्सु वसति
sa vā eṣa ekātithiḥ sa eṣa juhvatsu vasati
- 10
तद्यद् अदो गाथा भवति
tadyad ado gāthā bhavati
- 11
अनेनसम् एनसा सो ऽभिशस्ताद् एनस्वतो वापहराद् एनः एकातिथिम् अप सायं रुणद्धि बिसानि स्तेनो अप सो जहारेति
anenasam enasā so 'bhiśastād enasvato vāpaharād enaḥ ekātithim apa sāyaṃ ruṇaddhi bisāni steno apa so jahāreti
- 12
एष ह वै स एकातिथिः स एष जुह्वत्सु वसत्य् एतां वाव स देवताम् अपरुणद्धि यो ऽलम् अग्निहोत्राय सन्नाग्निहोत्रं जुहोति तम् एषा देवतापरोद्धापरुणद्ध्य् अस्माच्च लोकाद् अमुष्माच्चोभाभ्यां यो ऽलम् अग्निहोत्राय सन्नाग्निहोत्रं जुहोति
eṣa ha vai sa ekātithiḥ sa eṣa juhvatsu vasaty etāṃ vāva sa devatām aparuṇaddhi yo 'lam agnihotrāya sannāgnihotraṃ juhoti tam eṣā devatāparoddhāparuṇaddhy asmācca lokād amuṣmāccobhābhyāṃ yo 'lam agnihotrāya sannāgnihotraṃ juhoti
- 13
तस्माद्यो ऽलम् अग्निहोत्राय स्याज्जुहुयात्
tasmādyo 'lam agnihotrāya syājjuhuyāt
- 14
तस्माद् आहुर्न सायम् अतिथिर् अपरुध्य इति
tasmād āhurna sāyam atithir aparudhya iti
- 15
एतद्ध स्म वै तद्विद्वान्नगरी जानश्रुतेय उदितहोमिनम् ऐकादशाक्षम्मानुतन्तव्यम् उवाच प्रजायाम् एनं विज्ञाता स्मो यदि विद्वान्वा जुहोत्य् अविद्वान्वेति तस्यो हैकादशाक्षे राष्ट्रम् इव प्रजा बभूव राष्ट्रम् इव ह वा अस्य प्रजा भवति य एवं विद्वान् उदिते जुहोति तस्माद् उदिते होतव्यम्
etaddha sma vai tadvidvānnagarī jānaśruteya uditahominam aikādaśākṣammānutantavyam uvāca prajāyām enaṃ vijñātā smo yadi vidvānvā juhoty avidvānveti tasyo haikādaśākṣe rāṣṭram iva prajā babhūva rāṣṭram iva ha vā asya prajā bhavati ya evaṃ vidvān udite juhoti tasmād udite hotavyam

